DEUTERONOMIO 23 - Quichua Imbabura 2016

Diospajlla tandanajuiman na yaicui ushanalla cashcamanda

1Jaricunapaj lulun tugyashca cashpa, na cashpaca, cuchushpa anchuchishca cashpaca, Mandaj Diospajlla tandanajuimanga na yaicui ushangachu.

2Huainayashpa charishca churipash, paipaj miraicunapash, chunga miraicamanmi, Mandaj Diospaj huasimanga na yaicui ushanga.

3Amón llacta gentecunapash, Moab llacta gentecunapash, Mandaj Diospaj huasimanga na yaicungachu. Paicunapaj miraicunaca, chunga miraicamambash, tucui causaipi napacha yaicui ushangachu.

4Paicunaca, canguna Egiptomanda llujshimujpica, yacuhuanllapash, micunahuanllapash na tuparimurcachu. Ashtahuangarin, Mesopotamia llactapi tiyaj, Petor shuti pueblomanda, Beor shuti runapaj churi Balaam runaman culquita cushpami, llaquichina shimicunata rimachun cachamurca.

5Ashtahuangarin, canda Mandaj Taita Diosca, Balaam runataca na uyangapa munarcachu. Llaquichina shimicunata rimashcataca, canda Mandaj Taita Diosca, bendicionmanmi tigrachirca. Canda Mandaj Taita Diosca, canda juyaimandami shina rurarca.

6Shinamandami, chai llacta gentecunahuan ali cangapa munashpa, ima alicunatapash na rurana canguichi.

7Edom llacta gentecunataca, cangunapaj huauquipurallata cajpimi, na millanayachina canguichi. Caru llactamanda rishpa, paicunapaj llactapi causashcamandami, Egipto llactapi causajcunatapash na millanayachina canguichi.

8Paicunamandaca, quimsa miraimanda vichaimanmi, Mandaj Diospaj huasimanga yaicui ushanga.

Ama mapa causachun mandashcacunamanda

9Canda fiñajcunahuan macanajungapa llujshishpaca, ima mapayanacunatapash na ruranachu canguichi.

10Maijan cashpapash, tuta puñujushpa muyu yacu llujshijushpa mapayashca cashpaca, carpacunamanda llujshishpami canllaman saquiringa.

11Shina cashpapash, ña amsayajujpimi, yacuhuan armashpa, indi ña huashajujpi carpaman tigrai ushanga.

12Shinallata, ishpana pushtutapash, carpamandaca carupimi charina canguichi.

13Shinallata, macanajunacunata apashpa rijushpaca, estacatapashmi apashpa rina cangui. Can ishpagrishpaca, chai estacahuan alpata allashpami alpahuan quilpana cangui.

14Mandaj Taita Diosca, canda fiñajcunatapash, cangunapaj ñaupajpi churangapami, huacaichishpa carpa chaupipi purijunga. Cambaj carpacunaca, Diospajllami canga. Ima mapapash tiyajta ricushpa, Dios canmanda ama anchurichunmi chashna causana cangui.

Tucuicunahuan ali causachun mandashcamanda

15Gañan runa, paita mandaj runapaj huasimanda pacajushpa shamujpica, ama cutin paipajmanllata tigrachinguichu.

16Paica, cangunahuan maijan pueblopi ali canatapash agllashpami, pai munashcapi causagringa. Paitaca na llaquichishpa charinachu cangui.

17Israelpurapica, rurashcalla dioscunata yarishpa huainayaj huarmicunapash, jaripurallata huarmihuanshna sirijcunapash napacha tiyanachu.

18Jari cashpa, huarmi cashpapash, rurashcalla dioscunata yarishpa huainayashpa charishca culquitaca, canda Mandaj Taita Diospaj huasimanga, na apamunachu cangui. Canda Mandaj Taita Diosca, chashna na alita rurajcunataca napacha ricunayachinllu.

19Israelpuraman culquita mañachishpaca, mama culquimanda mirashca culquitaca na mañanachu cangui. Shinallata, granota mañachishpapash, ashtahuan imata mañachishpapash, na mirachishpa mañanachu cangui.

20Shuj llactamanda gentecunataca mirachishpa mañanguilla. Ashtahuangarin, cambaj huauqui cajpica, na chashna mañanachu cangui. Can causana llactapi, cambaj maquihuan tucui imata rurashcapipash, canda Mandaj Taita Diosca bendiciachunmi, chashna causana cangui.

21Canda Mandaj Taita Diosman imatapash ari nishcataca pactachinami cangui. Na pactachishpa juchata rurashcamandami, canda Mandaj Taita Diosca llaquichinga.

22Na pactachi ushana cashpaca na ari ninachu cangui, chaica na juchachu canga.

23Shina cashcamandami, cambaj shimihuan pactachishnami nishpaca, pactachinapacha cangui. Canda Mandaj Taita Diosman ofrendata cushami nishcataca pactachinami cangui.

24Cambaj cumba runagupaj uva chagraman yaicushpaca, na munangacaman micunguilla. Ashtahuangarin, canastapi tandachishpa apaitaca na ushanguichu.

25Cambaj cumba runagupaj trigo pambaman yaicushpaca, trigo caspacunataca maquihuan fitinguilla. Ashtahuangarin, hoceshuanga na cuchunachu cangui.