2 SAMUEL 3 - Quichua Imbabura 2016

1Saulpaj ayllucunahuan, Davidpaj ayllucunahuanga, unai punllacunatami macanajushpa causarca. Davidpaj ayllucunaca, ninandami shinlliyashpa catinajurca. Ashtahuangarin, Saulpaj ayllucunaca ushai illajmi saquirinajurca.

Hebrón pueblopi, Davidpaj huahuacuna huacharishcamanda(1 Crón. 3:1-4)

2Hebrón pueblopimi Davidpaj huahuacunaca huacharishca. Davidpaj punda churica, Jezreel pueblomanda Ahinoam shuti huarmihuan charishca Amnón shutimi carca.

3Jipa churica, Quileab shutimi carca. Paitaca Carmel shuti pueblomanda Nabal runapaj huarmi cashca Abigail huarmihuanmi charirca. Ishcaipaj cati churica, Absalón shutimi carca. Paitaca Gesur shuti pueblota jatun mandaj, Talmai shuti runapaj ushi Maaca huarmihuanmi charirca.

4Quimsapaj cati churica, Adonías shutimi carca. Paitaca, Haguit shuti huarmihuanmi charirca. Chuscupaj cati churica, Sefatías shutimi carca. Paitaca, Abital shuti huarmihuanmi charirca.

5Pichapaj cati churica, Itream shutimi carca. Paitaca, Egla shuti huarmihuanmi charirca. Cai churicunatami Davidca, Hebrón pueblopi causajushpa charirca.

Abner runahuan, Davidhuan, Hebronbi pactachingapa ari ninajushcamanda

6Saulpaj ayllucunahuan, Davidpaj ayllucunahuanmi macanajushpa catinajurca. Abner runaca, Saulpaj huasi ucupuramandami macanajushpa catijurca.

7Saulca, Aja shuti runapaj ushi, Rizpa shuti huarmitapashmi charirca. Chai huarmimandami, Is-boset runaca:

“¿Imashpata ñuca taitapaj huarmihuan pacta causangui?” nishpa, Abner runataca rimarca.

8Is-boset runa chashna rimajpimi, Abner runaca ninanda fiñarishpa, cashna nijurca:

“¿Ñucaca, Judá llactapi causajcunapaj alcuchu cani? Ashtahuangarin ñucami, cambaj taita Saulpaj huasitapash, huauquicunatapash, paipaj cumbacunatapash llaquishpa candaca, Davidpaj maquipi na churarcani. Shinachu, cunanga ¿cai huarmihuan juchata rurashca nihuangui?

9Mandaj Dios, Davidman imatalla cusha nishpa juramentushcata na pactachijpica, Taita Dios ñucata ninandapacha llaquichihuachun.

10Cunanga, Saulpaj ayllucuna mandajushcata quichushpami, Israel llactatapash, Judá llactatapash, Danmanda callarishpa, Beersebacaman, David mandajuchun cugrini” nijurcami.

11Shina nijpica, Abner runata manllashpami Is-boset runaca, imata tigrachitapash na usharca.

12Shinamandami Abner runaca: “¿Pipajta cai llactaca?” nishpa Davidta tapuchun cacharca. Shinallata: “Ñucahuan ali tucungapa ari nilla. Tucui Israel llactataca, ñucallata canman tigrachishallami” nichumbashmi cacharca.

13Shina nijpimi Davidca, cashna nirca: “Ñucaca, canhuan chaita pactachingapa ari nishallami. Ashtahuangarin caitallami mañani: Ñucata ricungapa shamushpaca, Saulpaj ushi Mical huarmitapash pushashpa shamungui” nircami.

14Chai jipami Davidca, Saulpaj churi Is-boset runata, cashna nichun, shuj runacunata cacharca: “Ñuca huarmi Micalta tigrachihuai. Paitaca, patsaj filisteo runacunata huañuchishpa paicunapaj fitishca aichata ricuchishpa, Saulman cushpami cazararcani” nichunmi cacharca.

15Shina nijpimi Is-boset runaca, Lais shuti runapaj churi, Paltiel shuti runapajman huarmita quichushpa apamuchun cacharca.

16Shina quichujpimi, paipaj cusaca paipaj huarmita catishpa, Bahurim shuti pueblocaman huacashpa rijurca. Shina catijujpimi, Abner runaca: “Tigrashpa rilla” nirca. Shina nijpimi, Paltiel shuti runaca tigrarca.

17Chai jipami Abner runaca, Israelcunata mandaj rucucunahuan cashna nishpa parlanajurca: “Cangunaca, pundallatami Davidtaca cangunata jatun mandaj cachun munarcanguichi.

18Cunanga chashna ruraichilla. Mandaj Diosllatami, Davidman cashna nishca: ‘Ñucapajta ruraj Davidpaj maquihuanmi, ñuca agllashca Israel llactataca filisteocunapaj maquimandapash, paicunata tucui fiñajcunapaj maquimandapash quishpichisha’ nishcami carca” nijurca.

19Abner runaca, Benjamín ayllu runacunamambashmi parlajurca. Chai jipaca, Abner runaca, Hebrón shuti puebloman rishpami Israelcunahuan, Benjamín ayllucunahuan imatalla parlashcata Davidman villajurca.

20Shinami Abner runaca, ishcai chunga runacunandi, Hebrón pueblopi Davidpajman shamurca. Shina shamujpimi Davidca, Abner runamambash, paihuan shamuj runacunamambash, jatun micuita rurarca.

21Chai jipami Abner runaca, Davidtaca cashna nirca:

“Ñuca caimanda rishpaca, tucuilla Israelcunatami, jatun mandaj ñuca amupajman tandachisha. Paicunataca, canhuan ari ninajuchun tandachijpimi, cambaj shungupi yarijushcashnallata, mandashpa causangui” nircami.

“Cayacaman” nishpa David cachajpimi Abner runaca, aliguta tigrarca.

Joab runa, Abner runata huañuchishcamanda

22Davidta catijcunapash, Joab runapash, macanajuimanda shamushpami, imalla tiyashcacunata quichushpa apamunajurca. Shina cajpimi, Abner runaca, David “cayacaman” nishpa cachajpi, Hebrón pueblomanda rishca carca.

23Chai jipami Joab runapash, paihuan purij tucui macanajunata yachaj runacunapash chaiman chayamurca. Chaipimi Joab runaman cashna villanajurca: “Ner shuti runapaj churi Abner runami, jatun mandajpajman shamurca. Ña tigrajujpimi jatun mandajca, ‘cayacaman’ nishpa cacharca. Shinamandami, aliguta tigrarca” ninajurcami.

24Shina nijpimi Joab runaca, jatun mandajpajman shamushpa cashna nirca:

“¿Imatata rurashcangui? Abner runa cambajman shamujpica, ¿imashpata richun saquircanguillayari?

25Ner shuti runapaj churi Abner runataca, canllata rijsinguimi. Paica, canda umachingapallami shamushcanga. Can maiman rishpa, cutin tigramujtapash, imatalla rurajtapash ricungapallami shamushcanga” nircami.

26Shina nishca jipaca, Davidpaj ñaupajmanda rishpami, Abner runata catishpa richun, villaj runacunata Joab runaca cacharca. Chai runacunaca, Sira shuti jatun pugyupi Abner runata japigrishpami, David na yachajta cutin tigrachimurca.

27Hebrón puebloman Abner runa tigramujpimi, Joab runaca, chai pueblo punguman pacalla parlangapa jacu nishpa pusharca. Chaipimi, paipaj huauqui Asaelta huañuchishcamandaca ninanda fiñarishpa, vijsapi chugrichishpa huañuchirca.

28Chaita yachashpami, Davidca cashna nijurca: “Ner shuti runapaj churi Abnerta huañuchishcamandaca, ñucapash, ñuca mandajushcapash, Mandaj Diospaj ñaupajpica, causaita causaicaman, imatallapash na juchachi tucunachu canchi.

29Jatun llaquicunaca, Joab runapi, paipaj taitapaj tucuilla huasi ucupurapi shamuchun. Joab runapaj ayllupurapica: Yahuar llujshijujlla ungüipash, lepra ungüipash, suchucunapash, espadahuan huañuchi tucun runapash, yarjaihuan llaquita apaj runapash amapacha illashca cachun” nijurcami.

30Joab runapash, paipaj huauqui Abisai shuti runapashmi, Abner runataca huañuchirca. Chaitaca, Gabaón shuti pueblopi macanajui tiyajpi, Abner runa, paicunapaj huauqui Asael runata huañuchishcamandami, chashna huañuchirca.

31Chaimandami Davidca, Joab runatapash paita catij runacunatapash cashna nishpa mandarca: “Cangunapaj churajushcacunata liquirichi, cañamuta churajushpa huatarichi. Abner huañushcamandaca, ninanda llaquirichi” nircami. Abner runata pambangapa huandushpa rinajujpica, jatun mandaj Davidpashmi huashata catijurca.

32Shina rishpami Abner runata, Hebrón pueblopi pambajpi, jatun mandaj Davidpash, tucuilla gentecunapash ninanda huacanajurca.

33Jatun mandajca, Abner runamandaca, ninanda llaquirishpami cashna nishpa huacajurca:

“Abnerca, ¿shuj na ali runashnachu huañuna carca?

34Cambaj maquipash, na huatashcachu carca.

Cambaj chaquipash, na huatashcachu carca.

Na alita ruraj runacunata huañuchijpishnami huañushcangui” nishpami huacajurca.

Shinallata tucuilla gentecunapashmi, paimandaca cutin huacanajurca.

35Punllapash nara chishajpillata tucuilla gentecuna Davidpajman shamushpami, “imagutallapash micupayari” ninajurca. Ashtahuangarin Davidca, cashna nishpami juramenturca:

“Taita Diosca, cashnatapacha rurahuachun. Nara indi huashajujpillata tandata cashpa, ima micunata cashpapash micujpica, Taita Diosca ashtahuan llaquichihuachun” nircami.

36Shina nishcata tucui gentecuna yachashpami, alicachinajurca. Jatun mandaj David tucui imatalla rurashcatapash, tucuicunami alicachinajurca.

37Shinamandami, Israel gentecunaca, Ner shuti runapaj churi Abner runataca, jatun mandaj David na yachajta huañuchishcata yacharca.

38Jatun mandajca, paipajta rurajcunataca cashnami nirca:

“Israel llactapi alicachi tucushca, cati mandaj cunan huañushcataca, ¿nachu yachanguichi?

39Jatun mandaj cachun aceiteta talishpa javi tucushca cashpapash, cunanga imata ruraitapash na ushanichu. Sarvia shuti huarmipaj churicunaca, napacha cazuj runacunami. Paicuna na alita rurashcamandaca, Mandaj Diosllata chashnallata llaquichishpami ali canman” nijurcami.