JOB 17 - Quichua Imbabura 2016

1Ñuca samaipash, ñuca causana punllacunapash ñami tucurijun.

Ñucata pambana utujutapash, ña allashcallami.

2Na alicachishpa asijcunallami, ñucahuanga tiyanajun.

Ñuca ñavica, paicuna llaquichijtallami ricujun.

3Taita Dioslla, ñucata yanapahuayari.

Ñucata huacaichishpa charihuayari.

Ñucamanda shayaringapaca, ¿pita munangayari?

4Canmi, paicuna yachajushcataca quichushcangui.

Shinamandami, paicunataca na jatumbi churangui.

5Culquimanda, paipaj cumbatallata llullashpa juchachijcunaca,

paicunapaj huahuacuna llaquita apanajujtami ricunajunga.

6Na alicachishpa rimanajuchunmi, Diosca saquihuashca.

Huaquingunaca, ñuca ñavipi tucashpami saquinajun.

7Nanaihuanga, ñuca ñavipashmi amsayarca.

Ñuca yuyaicunapash, llandushcashnami tucurca.

8Chaita ricushpami, alitalla rurajcunaca manllarinajunga.

Alitalla ruraj runaca, Diosta na manllaj runata llaquichingapami jataringa.

9Ashtahuangarin alitalla ruraj runaca, alitalla rurashpa catijungallami.

Alitalla ruraj runaca, ashtahuanmi shinlli tucunga.

10Cunanga, tucuicuna shamushpa rimanajuichilla.

Cangunapurapica, alipacha yachajushca runaca na tiyanllu.

11Ñuca causana punllacunaca, ñami tucurijun.

Ñuca imatalla rurangapa yarijushcapash ñami tucurishca.

Ñuca imata munajushcapash, ñami tucurishca.

12Chai gentecunaca, tutataca punllami ninajunmi.

Yana tutataca, micha punchallami ninajunmi.

13Seol ñuca huasi cachun shuyajushpaca,

yana tutapimi puñujusha.

14Ñucaca, ismushpa tucurinatami:

‘Ñuca taitami cangui’ nircani.

Jurucunataca: ‘Ñuca mama, ñuca panicunami canguichi’ nircanimi.

15Cunanga, ñuca shuyashpa causanaca, ¿maipitayari?

Ñuca, imata shuyajujtapash, ¿pita yachangayari?

16Chaicunaca, Seol ucumanmi, ñucahuan urai ringa.

Alpa ucupimi samagrishun” nijurcami.