EZEQUIEL 17 - Quichua Imbabura 2016

Jatun angacunamandapash, uva chagramandapash

1Mandaj Diosca, cashnami nihuarca:

2“Huañuna aichayuj runa, Israel gentecunaman, yarichishpa yachachina shimicunata rimangui.

3Chai jipaca, cashna nishpa yachachingui:

Mandaj Jatun Diosca, cashnami nin:

‘Shuj jatun alasyu, muru pluma junda, jatun angami,

cedro quirupaj ñavita, Líbano shuti urcumanda apangapa shamurca.

4Chai quirupaj ashtahuan ali ñavita fitishpaca, randishpa jatujcunapaj llactamanmi aparca.

Chaitaca jatujcunapaj, randijcunapaj pueblopimi saquirca.

5Alpapi tarpuna muyutapash, ali alpapi tarpungapami aparca.

Chai muyutaca, sauce quiruta tarpujshnami, ashtaca yacu rijuj manñapi tarpurca.

6Chai muyu viñashpaca, fanga jundashca, uchillalla uva yurami tucurca.

Chai yurapaj malquicunaca, chai jatun anga maipi cashcamanmi viñarca.

Chai yurapaj sapica, alpa ucumanmi viñarca.

Chai yura viñashpaca, uchilla huahua yuracunapashmi viñarca.

7Shinallata, jatun alascunata charij, plumasapa shuj jatun angapashmi tiyarca.

Chai yurapaj malquicunaca, chaishuj jatun anga maipi cashcamanmi viñarca.

Chai uva yura ashtahuan yacuta cacharingapami, chaiman viñarca.

8Chai uva yurataca, ali yacu tiyaj pambapimi tarpushca carca.

Malquisapa viñashpa, ali fucuchunmi, chashna tarpushca carca.

Ashtahuan ali viñashca cachunmi chaipi tarpushca carca’ ninmi ningui.

9Cashnatapash ningui: Mandaj Jatun Diosca, cashnatapashmi nin:

‘¿Chai uva yuraguca, ali viñajungallachu?

¿Nachu paipaj sapicuna fitirijpica, muyupash chingashpa tucuilla chaquinga?

Paipaj juyailla fangacunaca anguyashpami, tucuilla chaquinga.

Chai yurataca, ashalla gentecunapash sapindi llujchingallami.

10Shujman yalichishpa tarpujpica, ¿chai yuraguca cutin viñangallachu?

Indi llujshimunmanda ninanda rupamujpica, ¿nachu tucuilla chaquinga?

Maipimi viñana cashcapillatami chaquishpa tucuringa’ ninmi nigri” nihuarcami.

11Mandaj Diosca, cashnatapashmi nihuarca:

12“Chai na cazuj runacunataca, cashna nigri: ‘Cai yachachishcacuna ima cajtaca, ¿nachu yachanguichi?’ ningui. Shinallata cashnatapash ningui: ‘Babilonia llactata jatun mandajca, Jerusalenman shamushpami, jatun mandajtapash, cati mandajcunatapash, Babilonia llactaman aparca.

13Shinallata, jatun mandajpaj miraipuramanda shuj mandajta agllashpami, paihuan ari ninajuchun juramentuchirca. Cai llactapi causanajuj ninan ushaita charijcunatapashmi, apashpa rirca.

14Jerusalén pueblopi ashtahuan shuj mandajcuna ama tiyachun, shinallata paihuan ari nishcata pactachishpa, paita cazushpa catichunmi, shina rurarca.

15Ashtahuangarin, agllashpa churashca mandajca, chai ari nishcata na pactachishpami, Egipto llactamanda, caballocunata, ashtaca runacunata mañamuchun cacharca. ¿Chashna ruraj runaca, ima alitapash taringachu? ¿Ari ninajushcata na pactachij runaca quishpiringachu?

16Ñucaca causaitami causajuni. Mandaj Jatun Dios Ñucami, cashna nini: Chai runaca, paita mandaj cachun churashca jatun mandajpaj Babilonia llactapimi huañunga. Paihuan ari nishpa juramentushcata yangapi churashcamandami, chashna tucunga.

17Ashtaca gentecunata huañuchingapa shamushpa, macanajuna pushtucunata, torrecunata shayachishca cajpica, Faraonbaj macanajuj runacuna ashtaca cashpapash, paimanda imata ruraitapash na ushangachu.

18Tucuita pactachingapa maquita cushpa, ari ninajushpa juramentushcata, yangapi churashcamandami chashna llaquichi tucunga. Cai tucui na alicunata chashna rurashcamandaca, napacha quishpiringachu’ ningui” nihuarcami.

19Chaimanda Mandaj Jatun Diosca, cashnami nin: “Ñucaca causaitami causajuni. Ñucahuan ari ninajushpa juramentushcata yangapi churashpa na cazushcamandami, paitaca ninanda llaquichisha.

20Ñucami, paitaca cabiahuan tugllashpa japisha. Chai jipaca, Babilonia llactaman apashpami, imamanda chashna rurashcata tapuchishpa llaquichisha.

21Shinallata, pacajushpa calpajcunapash, macanajuj runacunapash, tucuillami espadahuan huañuchi tucunajunga. Chaipi puchushcacunaca, caita chaitami calpanga. Shina rurajta ricushpami, Mandaj Dios Ñuca rimashcataca yachanguichi” ninmi.

22Mandaj Jatun Diosca, cashnatapashmi nihuarca: “Jatun cedro quirumanda retoñajun ñavita fitishpami tarpusha. Punda malquishcata japishpami, juyailla jatun urcu jahuapi tarpusha.

23Chai caspitaca, Israel llactapi tiyaj jatun urcupimi tarpusha. Shina tarpujpi viñashpami, jatun cedro quiru tucushpa ninanda fucunga. Chai quiru malquicunapimi, ashtaca alasyu animalcuna causanga.

24Tucuilla jatun quirucunami, Mandaj Dios Ñuca, alicachi tucushca quirucunata urmachishpa, uchilla quirucunata viñachij cajtaca yachanga. Mandaj Dios Ñucallatami, juyailla quirutapash chaquichircani. Ñucallatami chaquishca quirutapash cutin viñachircani. Chaitaca pactachishami” nircami.