ÉXODO 34 - Quichua Imbabura 2016

Mandashca shimicunatami cutin cushcamanda(Deut. 10:1-5)

1Mandaj Diosca, Moisestaca cashnami nirca:

“Punda canman curcani, chashnallata ishcai tabla rumicunata rurashpa apamui. Chai tabla rumicunapimi, punda can faquishca tabla rumicunapi mandashca shimicuna tiyajushcataca cutin quilcasha.

2Cayapaca tutamandata Sinaí urcuman vichai shamungapami alichirina cangui. Chai urcu pundapimi Ñucahuan tuparishun.

3Canhuanga, maijambash na vichai shamungachu. Chai urcupica, maijanllapash na chaipi cangachu. Shinallata urcupica, llamacunapash, huagracunapash na micunajungachu” nircami.

4Moisesca, punda rumicunatashnami, ishcaita rurajurca. Chai jipami, Mandaj Dios imashna paita mandashcashna ishcai tabla rumicunata apashpa, tutamandata jatarishpa, Sinaí urcuman vichai rirca.

5Chaipimi Mandaj Diosca, fuyupi uriajumurca. Shina uriajumushpami, Moiseshuan chaipi cashpa, Mandaj Diosca, paipaj shutita villajurca.

6Mandaj Diosca, Moisespaj ñaupajta yalijushpami, cashna nijurca:

“¡Mandaj Diosmi cani!, ¡Mandaj Diosmi cani! Tucui ushaita charij, ninanda llaquij, ninanda juyajmi cani. Shinallata, na ñapash fiñarij, ninanda llaquij, napacha llullajmi cani.

7Huaranga huaranga miraicunacaman llaquijmi cani. Na alita rurajcunata, na cazujcunata, juchata rurajcunatapash perdonaj Diosmi cani. Shina cashpapash, napacha cazushpa, na alitalla rurajcunataca llaquichishapachami. Ashtahuangarin, taitacuna na alita rurashcamandaca, paicunapaj huahuacunata, chai huahuacunapaj huahuacunatami, quimsa miraicunacaman, chuscu miraicunacaman llaquichisha” nircami.

8Shina nijpimi Moisesca, alpaman uchalla urai cumurishpa, Diosta ninanda alicachirca.

9Paica cashnami nijurca:

“Jatun Dioslla, Cambaj ñavipi ñuca ali ricurishca cajpica, cunanga Can Jatun Dios ñucanchi chaupipi ripashunyari. Cai gentecunaca, napacha cazujcunamari capan. Na alita rurashcata, ñucanchipaj juchacunata perdonashpa, Cambajlla cachun ñucanchita chasquihuayari” nijurcami.

10Shina nijpimi Mandaj Diosca cashna nirca: “Cunanga, tucui gentecunapaj ñaupajpimi pactachingapa ari nigrini. Tucui cai pachapica, maijan llactapipash na rurashcatami, imapash juyaillacunata rurashpa ricuchisha. Shina rurajpimi, tucui cambaj muyundipi causaj gentecunaca, Mandaj Dios rurashcata ricunajunga. Canhuanga, shuj jatun manllarinata rurajpimi, chashna ricunajunga” nircami.

Canaán llactapi rurashcalla dioscunata ama mañachun yachachishcamanda(Deut. 7:1-5)

11Cashnatapashmi nirca: “Cunan Ñuca mandashcataca cazushpa pactachingui. Chashna rurajpimi, amorreo, cananeo, heteo, ferezeo, heveo, jebuseo gentecunataca, cangunapaj ñaupajmanda llujchishpa cachasha.

12Canguna maipi causana llactapi causajcunahuanga, imata pactachingapapash na ari ninachu canguichi. Cangunata ama pandachinajuchunmi, chaitaca napacha rurana canguichi.

13Paicuna rurashca altarcunatapash, rumita rurashca dioscunatapash tucuchinami canguichi. Shinallata, Asera shuti diosta yarina quirucunatapash, cuchushpa tucuchinami canguichi.

14Cangunaca, rurashcalla dioscunapaj ñaupajpica napacha cungurinachu canguichi. Mandaj Diosca, Paipajlla causachun munaj Taita Diosmi.

15Shina cashcamanda, chai llactapi causajcunahuanga, imata pactachingapapash na ari ninachu canguichi. Paicunapaj dioscunata catishpaca, huainahuan rijshnami, paicunapaj dioscunaman animalcunata cushpa huañuchinajunga. Shina rurashpaca, chai rurashcalla dioscunaman carashcatami micunajunguichi.

16Cangunapaj churicunata, paicunapaj ushicunahuan cazarachijpica, chai huarmicunaca, paicunapaj dioscunata catishpami, cangunapaj churicunatapash, chai dioscunata catichun huainayachinshna pandachinga.

17Cangunaca, imatapash yacuyachishpa rurashca dioscunataca na ruranachu canguichi” nircami.

Huatapi cushijuna punllacunata ruranamanda(Éx. 23:14-19; Deut. 16:1-7)

18Ashtahuan cashnatapashmi nirca: “Levadura illaj tandata micushpa cushijuna punllacunataca pactachinami cangui. Levadura illaj tandataca, Ñuca mandashcashna canchis punllacamanmi micuna cangui. Ñuca mandashcashna, Abib quillapimi micuna cangui. Chai Abib quillapimi, Egiptomandaca llujshimurcangui.

19Punda huacharishca tucui jari huahuacunaca, Ñucapajmi. Cambaj animalcunamanda, punda huacharishca jari huagrapash, jari llamapash, Ñucapajmi.

20Ashtahuangarin, punda huachashca huahua burrupaj randica, shuj llamagutami cuna cangui. Chaita rurangapa na munashpaca burrupaj cunga tullutami faquina cangui. Punda huacharishca tucuilla cambaj churicunamandapash, chashnallatami cuna cangui. Ñuca ñaupajpica, maijan cashpapash chushaj maquihuanga na ricurimungachu.

21Tucui imata ruranatapash sucta punllatallami rurana cangui. Ashtahuangarin canchis punllapica samanami cangui. Yapuna tiyajpipash, cozechana tiyajpipash samanami cangui.

22Shinallata, punda fucushca trigota tandachijui punllacunapipash, Semana shuti jatun cushijuita rurangui. Shinallata, huata tucuripi granocunata tandachijui punllacunapipash, jatun cushijuita ruranami cangui.

23Tucui jaricunami, huatapica quimsacaman, Mandaj Jatun Dios Ñuca ñaupajpi ricuringapa shamunga. Ñucaca, Israelcunapaj Taita Diosmi cani.

24Ashtahuangarin, chai llactacunapi causajcunataca, cambaj ñaupajmanda llujchishpa cachashpami, cambaj llactataca mirachisha. Canda Mandaj Taita Dios Ñuca ñaupajpi, huatapi quimsacaman ricuringapa, can vichai shamujpica, cambaj alpataca pipash na japi ushangachu.

25Ñucaman cushpa huañuchishca animalpaj yahuarta, Ñucaman carajushpaca, levadurahuan rurashca imatapash tandachishpaca na caranachu cangui. Pascua punllapi huañuchishca animalpaj aichataca, imatallapash cayapaca na puchuchinachu cangui.

26Cambaj alpapi punda fucushca granocunataca, canda Mandaj Taita Diospaj huasimanmi punda apamuna cangui. Huahua chivopaj aichataca, ama paipaj mamapaj lechepillata yanunguichu” nijurcami.

Mandashca shimicunata Moisés apamushcamanda

27Mandaj Diosca, Moisestaca cashnami nirca: “Canga, cai shimicunatami quilcana cangui. Cai shimicunapi nijujshnallatami, canhuambash, Israelcunahuambash ari nircani” nircami.

28Moisesca, chuscu chunga punllata, chuscu chunga tutatami, micuitapash na micushpa, yacutapash na ufiashpa, Mandaj Dioshuan chaipi carca. Chaipimi, Dios ari nishca shimicunatapash, tabla rumicunapi quilcarca. Chaicunaca, chunga mandashca shimicunami.

29Moisesca, Sinaí urcumanda uriajumushpaca, mandashca shimicunata quilcashca ishcai tabla rumicunata apashpami urai shamujurca. Moisesca, Taita Dioshuan parlashca jipa, paipaj ñavi punchapamba cajtaca, na yacharcachu.

30Aaronbash, tucuilla Israelcunapashmi, Moisestaca ricunajurca. Paicunaca, Moisespaj ñavi punchapamba cajta ricushpami, manllashpa na quimiri ushanajurca.

31Ashtahuangarin, Moisesca Aarondapash, tandanajushca Israelcunata tucuilla mandajcunatapashmi cayarca. Shina cayashpami Moisesca, paicunahuan rimajurca.

32Chaipaj catica, tucuilla Israel gentecuna paipajman quimirimujpimi, Mandaj Dios, Sinaí urcupi tucui imatalla rurachun mandashcata paicunaman villajurca.

33Paicunahuan Moisés rimaita tucuchishpaca, shuj quilparina finduhuanmi paipaj ñavita quilparirca.

34Mandaj Dioshuan parlangapa Moisés rishpaca, chai quilparishca findutaca anchuchinmi carca. Chaimanda llujshishpami, paiman imata mandashcataca, Israelcunaman villan carca.

35Moisespaj ñavita Israelcuna ricunajushpaca, punchapamba cajtami ricunajurca. Shinamandami, Moisesca, Taita Dioshuan rimangapa yaicungacaman, quilparina finduhuan paipaj ñavita quilparijuj carca.