1Ana huarmica, cashna nishpami Diosta alicachijurca:
“Mandaj Dioshuanmi, tucui shungumanda cushijuni.
Mandaj Diosmi ninan ushaita carahuan.
Ñucata fiñajcunata rimangapapash ushaita charinimi.
Ñucata quishpichishcamandaca, ninandapachami cushijuni.
2Mandaj Diosllami, ima juchapash illaj, cangui.
Canmanda ashtahuan shujca, na tiyanllu.
Taita Diosllami, ñucanchitaca huacaichishpa charijun.
3Na ashtahuan jariyashpa, jatun tucushpa, rimanachu canguichi.
Cangunapaj shimihuan jariyashpa ninanda rimanataca, saquinami canguichi.
Tucuita yachaj Diosmi, Mandashpa Causajun.
Paimi, imata rurashcatapash pizajunshna ricujun.
4Ninan shinlli runacunapaj arcocunapash, faquirircami.
Ashtahuangarin imatapash na ushajcunami, chumbilirinshna ushaita japinajurca.
5Na munajta micushpa causajcunapash, micunamandallami imatapash ruranajurca.
Yarjachishpa causajcunapash, na ashtahuan yarjachircachu.
Huahuata na charij huarmipash, canchis huahuatami charirca.
Tauca huahuacunata charij huarmipash, llaquirishpami causajun.
6Mandaj Diosmi huañuitapash, causaitapash cujun.
Paimi, Seolmambash cachan, Paillatami llujchimun.
7Mandaj Diosmi, huajcha cachumbash, charij cachumbash saquin.
Paillatami, llaquipipash churan, alipipash churan.
8Paimi, huajchatapash alpaman tigrashcata cutin jatarichin.
Huajchacunataca, mapata shitana pushtumandashna llujchishpami, alicunahuan tandachin.
Mandajcunahuan pacta tiyanajuchun, shinallata, paicunahuan japinajuchunmi chashna ruran.
Cai pachataca, Mandaj Diosmi alipacha shinlli tiyajuchun churarca.
Chai jahuapimi tucui ima tiyajtapash churashca.
9Paimi, paipajlla causajcunataca, maipi purijpipash huacaichin.
Ashtahuangarin paita na cazujcunaca, yana tutapishnami chingashca purinajun.
Pipash, paipaj ushaihuanllata shinlli tucuitaca na ushangachu.
10Mandaj Diosta, fiñajcunaca, Paipaj ñaupajpimi llaquichi tucunga.
Chai llaquicunaca, jahua pachamandami, culun nijshna shamunga.
Cai pachapi causajcuna imata rurashpa, causashcata, Mandaj Diosmi ricuchinga.
Paillatami, Pai agllashca Jatun Mandajmambash ushaita cunga.
Pai agllashca Jatun Mandajmanga, Paillatami ashtahuan ushaita cunga” nishpami mañajurca.
11Chai jipami Elcana runaca, Ramá pueblopi tiyajuj paipaj huasiman tigrarca. Samuelca, sacerdote Elipaj ñaupajpimi, Mandaj Diospajta rurajurca.
Elipaj churicuna, juchata rurashcamanda12Elipaj churicunaca, Diosta na cazujcuna cashpami, Mandaj Diosmandaca imatallapash na yacharca.
13Diosman animalta cushpa huañuchishca aichata yanujujpica, sacerdotepajta ruraj runami, imatapash japina quimsa pundayu jirruhuan, upallamanda japingapa shamuj carca.
14Paicunaca, calderapi, mangapi, jatun mangapi, pailapi cashpapash, chai jirruhuanmi paicuna munashcata llujchishpa, sacerdotepajman apaj carca. Chashnami, Silo puebloman shamuj tucui Israelcunahuanga ruranajurca.
15Shinallata, viratapash nara rupachijpillatami, sacerdotepajta ruraj runaca, animalta huañuchij runapajman shamushpa, cashna nijuj carca: “Aichata cusashpa sacerdoteman carangapa cuhuai. Paica, yanushca aichata cujpica, na chasquingachu, chahua aichata cujpillami chasquinga” nijmi carca.
16Animalta huañuchij runaca: “Viratara punda rupachinajuchun saquipai. Chai jipaca, mashna munashcatapash apanguillami” nijpica, sacerdotepajta ruraj runaca, cashnami nij carca: “Napacha saquishachu, cunanllata cuhuai. Can na cujpica, quichushpami apasha” nijmi carca.
17Elipaj churi huambracunaca, Mandaj Diosman carashca ofrendacunataca yangapimi churan carca. Chaimandami paicuna juchata rurashcacunaca, Mandaj Diospaj ñaupajpica, na alipacha ricurirca.
18Samuel huambraguca, lino puchahuan rurashca, efod churajunata churajushpami, Mandaj Diospajta rurashpa causajurca.
19Paipaj mamaca, túnica uchilla churajunata rurashpami, Taita Diosman animalta cushpa huañuchina punllapi, paipaj cusandi shamushpa, huatacuna chayajpica apamuj carca.
20Chaimandami Elcana shuti runatapash, paipaj huarmitapash, Elí runaca cashna nishpa bendiciarca: “Mandaj Diosta mañajpi carashca cai huahuagupaj randica, Mandaj Diosllata canmanga cai huarmihuan ashtahuan huahuacunata carachun” nircami. Chai jipaca, paicunapaj huasiman tigrarcallami.
21Mandaj Diosllata, Ana huarmita llaquishpa bendiciajpimi, paica vijsayu tucushpa quimsa churita, ishcai ushita charirca. Shinallata, Samuel huambraguca, Mandaj Diosta cazushpami viñajurca.
22Elí runaca, ñami rucu rucugu carca. Paica, paipaj churicuna, Israelcunata imatalla rurajtaca tucuitami yacharca. Shinallata, Dioshuan tuparina jatun carpa pungupi ricuj huarmicunahuan puñushpa causajtapashmi yacharca.
23Chaimandami Elí runaca, cashna nirca: “¿Imashpata chashna na alita rurashpa causanguichi? Canguna na alita rurashpa causanajujtaca, tucuicuna parlanajujtami uyani.
24Ñuca huahuacunalla, cangunataca, ninan juchacunata rurashpa causanajun nijtami uyani. Cangunaca, Mandaj Dios agllashcacunatami, juchata rurachinajunguichi.
25Maijambash shuj runata fiñashpa llaquichijpica, juezcunami ricushpa llaquichinga. Ashtahuangarin, Mandaj Diosta na cazushpa juchata rurajpica, ¿pita chai na ali runamandaca mañanga?” nircami. Shina nijpipash paicunapaj taita rimashcataca na cazurcachu. Paicunataca, Mandaj Diosllata, causaita quichuna cajpimi na cazurca.
26Ashtahuangarin Samuel huambraguca, tucuipi ali viñajushpami, Taita Diospaj ñaupajpipash, runacunapaj ñaupajpipash, alicachi tucushpa causajurca.
27Chai punllacunapimi, Taita Diospajta ruraj shuj runaca, Elipajman shamushpa cashna nijurca: “Mandaj Diosmi, cashna nijun: ‘¿Nachu cambaj ñaupa taitacunapaj huasi ucupuramambash, Egiptopi Faraonbajta rurashpa causanajujpillata, imatapash na pacashpa, tucuita villarcani?
28Shinallata, tucui Israel ayllupuramandapash, cambaj ñaupa taitacunatami, ñucapaj sacerdotecuna cachun agllarcani. Paicunataca, ñuca altarpi rupachinajuchun, inciensota cushnichinajuchun, ñuca ñaupajpi efod churajunata churajuchunmi agllarcani. Shinallata, Israelcuna apamushca ofrendacunatapash, cambaj ñaupa taitacunapaj huasi ucupuramanmi cararcani.
29Ñucahuan tandajuna carpa huasipi, animalta Ñucaman cushpa huañuchinajuchun, ofrendacunata cunajuchun Ñuca mandashcataca ¿Imashpata yangapi churanajunguichi? Cambaj churicunatara, Ñucatapash yali alicachishpami, Ñuca agllashca Israelcuna apamushca, tucui ofrendacunamanda, ashtahuan alicunata micuchishpa racuyachijungui’ ninmi.
30Chaimandami, Israelcunata Mandaj Taita Diosca cashna nijun: ‘Cambaj huasi ucupurapash, cambaj taitacunapaj huasi ucupurapash, causaita causaicamanmi Ñuca ñaupajpi causanajunga nircanimi’ ninmi. Cunanga, Mandaj Diosmi cashna nijun: ‘Ñuca imata cusha nishcataca, napacha pactachishachu. Ashtahuangarin, Ñucata cazujcunata alicachishpami, Ñucata yangapi churajcunataca llaquichisha.
31Cunanga, cambaj ushaitapash, cambaj taitapaj huasi ucupuracunapaj ushaitapash anchuchina punllami chayamugrin. Cambaj huasi ucupuramandaca, pipash na rucucaman causangachu.
32Israelcunaman ninanda, Taita Dios bendiciajpimi, cambaj huasi ucupurataca, ninanda pingai tucushpa llaquirijta ricungui. Cambaj huasi ucupuramandaca, pipash na rucucaman causangachu.
33Ñuca altarpi rupachishpa causaj cambaj huasi ucupuramandaca, shuj runatallami saquisha. Chai runaca, ninanda huacashpa ñavi chingaringapa, shungupipash ninanda llaquirishpa causangapallami canga. Ashtahuangarin cambaj miraimandaca, chaira viñanajushpallatami huañunga.
34Chashna pactanata can ricuchunga, Ofni shuti, Finees shuti cambaj churicunami, shuj punllapilla ishcandi huañunga.
35Chai jipami, Ñucata ali cazuj sacerdoteta churasha. Paica, Ñuca shungu, Ñuca alma munashcatami ruranga. Paipaj huasi ucupuratapash, shinlli cachun churajpimi, Ñuca agllashca Mandajpaj ñaupajpi, punllandi tucuita rurashpa pactachijunga.
36Ashtahuangarin cambaj huasi ucupuramanda puchushca runaca, shuj culquitallapash, asha micunatallapash carachun munashpami, sacerdotepaj ñaupajpi cunguringapa shamunga. Paica cashnami nijunga: Asha tandagutallapash micushpa causangapa, imaguta ruranapillapash churahuai nishpami ninanda mañajunga’ ninmi” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
