Psalms 41 - Quichua Imbabura 2016

Huañujushpa Diosta mañashcamandaCandajcunata mandaj candachijuchun, David rurashca Salmomi.

1Huajchacunata llaquij runaca, ninandami cushijun.

Llaqui punllapica, Mandaj Diosmi paitapash quishpichinga.

2Mandaj Diosmi, huacaichishpa causaita caranga.

Cai pachapipash, ninanda cushijushpami causajunga.

Paita fiñajcunapaj maquipica na saquinguichu.

3Nanaihuan sirijujpipash, Mandaj Diosmi yanapanga.

Paimi nanaitapash samachi callaringa.

4Ñucaca: “Mandaj Dioslla, ñucata ninanda llaquishpa alichihuayari.

Cambaj ñaupajpimi, juchata rurapashcani” nircanimi.

5Ñucata fiñajcunaca, ñucata fiñashpami:

“¿Ima punllashi huañunga, ima punllashi na ricusha?” ninajunmi.

6Ñucata ricungapa shamushpapash, llullashpami parlanajun.

Paicunapaj shungupica, na alitallami yarinajun.

Canllaman llujshishpaca, tucuicunamanmi parlanajun.

7Ñucata millanayachij runacunaca, tandanajushpa huashallami parlanajun.

Ñucata na alicachishpami cashna ninajun:

8“Paitaca, manllanayai ungüimi japirca.

Chai ungüihuan sirijushcamandaca, na cutin jatari ushangachu” ninajunmi.

9Ñucapaj ali cumba, ñucahuan pacta purij,

ñuca micunatallata micuj runapashmi, ñucata fiñashpa jatarirca.

10Mandaj Dioslla,

ñucata llaquishpa jatarichihuayari.

Shina jatarichijpimi, paicunaman cuna cashcata cusha.

11Ñucata fiñajcuna mishashpa cushijunajuchun na saquijpimi,

Cambaj ñaupajpi ali ricurishcataca yachasha.

12Ama pandarichunmi, jarcashpa charihuashcangui.

Causaita causaipajmi, Cambaj ñaupajpi charihuashcangui.

13Israelcunata Mandaj Taita Diosca,

causaita causaicaman alicachi tucushca cachun.

Chashna cachun. Chashna cachun.