Psalms 135 - Quichua Imbabura 2016

Ninan ushaita charij Diosmandapash, rurashcalla dioscunamandapashAleluya.

1Mandaj Diospaj shutita alicachinguichi.

Mandaj Diospajta rurajcuna, Paita alicachinguichi.

2Mandaj Diospaj huasipi tiyajcunapash,

ñucanchi Taita Diospaj huasi patiocunapi tiyajcunapash,

Paitami alicachina canguichi.

3Mandaj Diostaca ali cajpimi, Paitaca alicachina canguichi.

Paipaj shutitaca, salmocunahuan candaichi.

Paica, ali shungutami charin.

4Mandaj Diosmi Jacobtaca, Paipajta ruraj cachun agllarca.

Paimi, Israelcunataca, Paipajlla cachun shicanyachirca.

5Mandaj Dios ninan ushaita charijtaca yachanimi.

Ñucanchi Mandaj Diosca, rurashcalla dioscunataca yali ushaitami charin.

6Mandaj Diosca, tucuita rurangapa munashcatami rurajun.

Jahua pachapipash, cai pachapipash, mama cuchapipash, manllanayai ucu ucupipash,

Pai munashcatami rurajun.

7Paimi, cai pacha tucurij manñamanda fuyutaca vichai apajun.

Paimi, tamiachumbash punchapamba shitamujun.

Paimi, huairatapash alichishca pushtumanda llujchimujun.

8Paimi, Egiptopi causajcunapaj punda huacharishca huahuacunataca huañuchirca.

Gentecunatapash, animalcunatapashmi chashna huañuchirca.

9Egipto llactapi causajcunalla,

cangunamanmi, ninan manllarinacunata rurashpa ricuchirca.

Faraondapash, paipajta rurajcunatapashmi llaquichirca.

10Ashtaca llactacunatami tucuchirca.

Ninan ushaita charij, jatun mandajcunatapashmi huañuchirca.

11Amorreo gentecunata jatun mandaj Sehón shuti runatapash,

Basán llactata jatun mandaj Og shuti runatapash,

Canaán llactata jatun mandajcunatapash, tucuillatami huañuchirca.

12Chai runacunapaj llactacunata quichushpami,

Pai agllashca Israelcunaman cararca.

13Mandaj Dioslla,

Cambaj shutica causaita causajungallami canga.

Mandaj Dioslla,

Canda yarinapash mirai miraicamanmi canga.

14Mandaj Diosmi, Pai agllashca gentecunataca tapuchijunga.

Paipajta rurajcunataca llaquingami.

15Shuj llactapi causajcunapaj dioscunaca, culquita, curita rurashcallami.

Runacunapaj maquihuanlla rurashcallami.

16Shimita charishpapash, na rimanllu.

Ñavita charishpapash, na ricunllu.

17Rinrita charishpapash, na uyanllu.

Paicunapaj shimimandaca, samaipash na llujshinllu.

18Chai dioscunata rurajcunapash,

chaicunata yarishpa causajcunapash, chai dioscunaman rijchajcunami.

19Israel gentecunalla,

Mandaj Diostaca alimari cangui ninami canguichi.

Aaronbaj miraicunalla,

Mandaj Diostaca alimari cangui ninami canguichi.

20Levipaj miraicunalla,

Mandaj Diostaca alimari cangui ninami canguichi.

Mandaj Diosta manllashpa causajcunapash,

Mandaj Diostaca alimari cangui ninami canguichi.

21Mandaj Diostaca, Sion pueblomandami alicachina canguichi.

Jerusalenbi causaj Diostami, alicachina canguichi.

Aleluya.