HECHOS 25 - Quichua Imbabura 2016

Pabloca, Cesarpaj ñaupajpi tapuchi tucungapami munashca

1Festo shuti runaca, mandangapa yaicushca, quimsa punlla jipami, Cesarea pueblomanda Jerusalenman vichai rirca.

2Chaipica, Pablota fiñashpami, sacerdotecunata mandajcunapash, ashtahuan alicachi tucushca judiocunapash, Festo shuti runapajman rirca.

3Paitami cashna ninajurca:

“Pablotaca, ñucanchi mañashcata uyashpa, Jerusalenman cachamupai” ninajurcami.

Paita cachamujpica, chaupi ñambi chapashpa huañuchingapami, paicunapura parlarishpa, chashna mañanajurca.

4Ashtahuangarin Festo shuti runaca, cashnami nirca:

“Pabloca, Cesarea pueblopimi vichariyajun. Ñucapash, chaiman ñami rigrijuni.

5Cangunapurapi maijambash ri ushashpaca, Cesarea puebloman ñucahuan jacuchilla. Imapash na alita rurashca cajpica, chaipimi ricuchinguichi” nircami.

6Festo runaca pusaj punlla, canatashna Jerusalenbi paicunahuan cashpami, Cesarea puebloman tigrarca. Cayandi punllami paica, mandangapa jatun tiyarinapi tiyarishpa, Pablota pushamuchun cacharca.

7Pablo chaiman chayajpica, Jerusalenmanda shamushca judiocunaca, chaupipi churashpami shayarirca. Paicunaca: Cai runaca, ashtaca na alicunatami rurashca nishpami juchachishpa villanajurca. Shina cashpapash, chashnapacha cajtaca na ricuchi usharcachu.

8Paita cacharichunmi Pabloca, cashna nijurca:

“Judiocunata mandashcatapash, Diospaj huasitapash, na yangapi churashcanichu. Mandaj Cesartapash ima na alita rurashpaca, na fiñachishcanichu” nijurcami.

9Ashtahuangarin Festo runaca, judiocunapaj ñaupajpi alipi ricuringapa munashpami, Pablotaca cashna nishpa tapurca:

“¿Jerusalenman vichai ringapa munanguichu? Can imatalla rurashcataca chaipimi ñucallata ali tapuchingapa munani” nircami.

10Shina nijpimi Pabloca, cashna nirca:

“César churashca mandajpaj ñaupajpimi tapuchi tucuna cani. Judiocunataca, ima na alitapash na rurashcanichu, chaitaca canllata alimi yachangui.

11Ima na alitapash, huañuchi tucuna ima llaquitapash rurashca cashpaca, huañuchi tucuimanllami. Ashtahuangarin, paicuna juchachishcashna, imamanda ñucata llaquichina na tiyajpica, pipash ñucataca na paicunapajman cachangallachu. Ñucataca, César tapuchihuachunmi mañani” nircami.

12Shina nijpimi Festo shuti runaca, paiman yuyaita cuj runacunata tapurca. Chai jipami Pablotaca:

“Canga: ‘César ñucata tapuchihuachun’ nishpami mañashcangui. Chaimandami, cunanga, Cesarpajman rina cangui” nishpa mandani.

Agripa shuti runapaj, Berenice shuti huarmipaj ñaupajmanmi Pablotaca apashca

13Huaquin punlla yalishca jipami, Agripa shuti jatun mandajca, Berenice shuti huarmindi, Cesarea pueblopi Festo runata ricungapa shamurca.

14Ña tauca punllacunata, paicunaca chaipi cajpimi Festo shuti runaca, Pablo imashna cajta chai jatun mandajman parlashpa, cashna nijurca:

“Félix runaca, shuj runatami prezuna huasipi saquishca.

15Chaimanda parlangapa Jerusalenman ñuca rijpica, sacerdotecunata mandajcunandi, judiocunata mandaj ancianocunandimi, ñucapajman shamurca. Paicunaca, ‘cai runata ninanda llaquichipai’ ninajurcami.

16Shina cajpimi, paicunataca cashna nircani: ‘Juchachi tucuj runaca, juchachijcunapaj ñaupajpica ima na alitapash na rurarcanichu ninata charinrami. Na chashna chimbapurashpa rimajpica, Roma llactamanda mandajcunaca, na huañuchi ushanachu canchi’ nircanimi.

17Shina nijpimi, paicunaca tandanajushpa, caiman catimurca. Paicuna shamujpica, ñuca mandangapa tiyarinapi, cayandi punllallata tiyarishpami, chai runata pushamuchun cacharcani.

18Paitaca, ‘na alitapachami rurashca canga’ yarcanimi. Ashtahuangarin paita juchachijcunaca, ima na alita rurashcatapash paipaj ñaupajpica na ricuchi usharcachu.

19Paicunaca, pai imata crishcatallami fiñashpa rimanajurca. Shinallata: ‘Jesús shuti shuj runa huañushpapash causarircami’ nishpa Pablo villashcatallami juchachinajurca.

20Chashna ninajujpi ñuca na yachai ushashpami, Pablotaca cashna nircani: ‘Can imatalla rurashcatapash, paicuna ricuchinajuchunga, ¿nachu Jerusalenman ringapa munangui?’ nishpami tapurcani.

21Shina nijpimi Pabloca: ‘Augusto César tapuchihuachunmi mañani’ nihuarca. Shina nijpimi, chai jatun mandajpajman paita cachangacaman, prezu tiyajuchunlla nircani” nijurcami.

22Shina villajpimi Agripa shuti mandajca, Festo runataca:

“Ñucapash chai runa villajta uyangapami munaiman” nirca. Shina nijpimi Festo runaca:

“Cayapa uyanguillami” nirca.

23Chai cayandimi Agripa shuti mandajca, Berenice shuti huarmindi juyailla churajunata churajushpa, huaranga macanajuj runacunata mandajcunandi, chai pueblopi mandajcunandi, tapuchishpa yachana ucuman shamurca. Paicuna chayajpimi Festo shuti runaca, Pablota pushamuchun cacharca.

24Chaipimi Festo runaca, cashna nijurca:

“Agripa shuti mandajpash, ñucanchihuan caipi tandanajushca tucui gentecunapash uyahuaichi. Jerusalenbica, ashtaca judiocunami: ‘Cai runaca na causanachu’ nishpa caparinajun. Paica, caipimi shayajun.

25Ashtahuangarin, na alita rurashcamanda huañuchi tucunapacha cajtaca, na tarinichu. Paillata: ‘Mandaj Augusto tapuchihuachun’ nijpimi paitaca, chaiman cachana tucurcani.

26Imata rurashcatapash, ñucata mandajpajman quilcashpa cachaita na ushashpami cangunapaj ñaupajman pushamushcani. Ashtahuambachaca, mandaj Agripalla, cambaj ñaupajpi ima nishcata ñuca quilcai ushangapami, can tapuchijuchun pushamuparcani.

27Shuj prezuta cachangapaca, imamanda juchachi tucushcatapash, quilcashpami cachana cani. Na chashna rurashpaca, na yachashcashnami ricurigrini” nijurcami.