1Shina nijpimi Job runaca, cashna nishpa tigrachirca:
2“Cangunaca, gentecuna ima nishcata villajcunami canguichi.
Canguna huañujpica, ali yachashcapash tucuringami.
3Ñucapash, cangunashnallata ali yuyaitami charini.
Ñucapash, cangunashnallatami cani.
Canguna rimashcataca, ¿pita na yachai ushangayari?
4Ñucapash, ñuca cumbahuanllata na alicachi tucushcami cani.
Taita Diosta mañajpica, Paica tigrachimunllami.
Alitalla ruraj runatapash, na cazushpa asinllami.
5Chaqui llushpishpa urmagrijun runataca asishpami ricun.
Ali causanchi yancunami chashna ricun.
6Shuhuacunapaj huasipirami, imapash ali tiyan.
Taita Diosta fiñachijcunarami, imatapash na manllashpa causanajun.
Paicuna imatalla charishcataca, Diosllatami carahuashca yashpami causanajun.
7Shina cajpica cunanga, animalcunata ricushpa ali yachajuyari.
Canda yachachinajuchunga, jahuata rij alasyu animalcunata tapuyari.
8Na cashpaca alpahuan parlayari. Paipash villangallami.
Mama cuchapi tiyaj pijicunapash villangallami.
9Cai tucuicunamandaca, ¿maijanshi, Mandaj Diospaj maquihuan rurashcataca, na yachan?
10Causaita tucui charijcunapaj almaca, paipaj maquipimi.
Tucui gentecunapaj samaipash, paipaj maquipimi.
11Rinri uyajpimi, alita nijtapash, na alita nijtapash yachai usharin.
Micunata shimipi churashpami, ali cajtapash, na ali cajtapash yacharin.
12Rucucunami, ali yachaita charin.
Unai huatacunata causajcunami, tucuita alipacha yachan.
13Ali yachanapash, ushaipash Taita Dioshuanmi.
Ali yuyaita cunapash, alita yachachinapash Diosmandami shamun.
14Pai urmachishcataca, pipash na cutin shayachi ushanllu.
Runata vichashpa churashcataca, pipash na llujchi ushanllu.
15Yacucunata Pai quichujpica, tucuilla chaquinllami.
Yacucunata yapata cachamujpica, alpata tucuchinllami.
16Ushaipash, ali yachanapash Diosmandami shamun.
Pandaj runapash, pandachij tucun runapash, pandaj runapash, Paipajllatami.
17Ali yuyaita cuj runacunataca, Paimi chai yuyaitaca quichun.
Paimi, juezcunatapash muspayachin.
18Paimi, llaquichishpa charij mandajcunapaj ushaitaca quichun.
Paillatami, chai runacunataca huascahuan huatan.
19Paimi, sacerdotecuna mandana ushaitapash quichun.
Paillatami, ushaita charijcunatapash tucuchin.
20Na llullashpa rimajcunatapash upallayachinllami.
Mandaj ancianocuna ali yuyaita cunatapash quichunllami.
21Paimi, jatun mandajcunatapash yangapi churan.
Paimi, ninan shinllicunatapash ushaita quichushpa pingaichin.
22Paica, yana yana ucuman cajtapash tarinllami.
Huañuchij llandutapash, punchapambaman llujchinllami.
23Paica, llactacunata mirachishpapash, Paillata tucuchinllami.
Llactacunamanda caita chaita cachashpapash, cutin tandachimunllami.
24Paimi, cai pachapi causajcunata mandajcunapaj yuyaita quichun.
Paicunataca, ñan illaj jichushca pambata chingashcashna purinajuchunmi saquin.
25Paicunaca, micha illaj yana yana tutapishnami, tacarishpalla purinajun.
Machashca runacunashna purinajuchunmi saquin.
Who We AreWhat We EelieveWhat We Do
2025 by iamachristian.org,Inc All rights reserved.
