1 TESALONICENSES 2 - Quichua Imbabura 2016

Tesalónica pueblopimi Pabloca Diospajta rurajushca

1Juyashca huauquicuna, cangunata ñucanchi ricungapa shamushpaca, na yanga shamushcatami, cangunallata yachanguichi.

2Filipos pueblopica, ñucanchita ninanda na alicachishpami pundaca llaquichirca. Shinallata, quishpirinamanda ama villachun ninanda jarcajpipash, Taita Diosllata ushaita carajpimi villarcanchi. Chaitapash yachanguichimi.

3Cangunata alipacha yachachinajushpaca, na alita yachachishpa, umachishpa, cangunata pandachingapaca na shamushcachu carcanchi.

4Ñucanchitaca, Taita Diosllatami, quishpirinamanda villachun ali cajta ricushpa mingarca. Shinamandami gentecunata cushichinataca, na mascashpa, ashtahuangarin, ñucanchi shungutapash ricujuj Taita Diosta cushichingapa chashna villanajunchi.

5Uyanayai shimicunata villaj tucushpa, cangunamanda ñucanchi charijyangapa munashpaca na villashcachu canchi. Chaitaca Taita Diospash yachanmi, cangunapash yachanguichimi.

6Shujcuna cashpa, canguna cashpa, maijan cashpapash, ñucanchita “alicachishcanman” yashpaca, na purishcachu canchi. Ñucanchica, Cristopaj apostolcuna cashpami, canguna imata rurachumbash mañai ushanalla carcanchi.

7Ashtahuangarin, paipaj huahuacunata, shuj mama juyashpa viñachijshnami cangunataca charircanchi.

8Cangunataca ninanda juyashpami, Taita Diospaj shimita villashcahuanlla na cushijushpa, cangunamandaca huañuitapash huañunchimanlla carca. Cangunaca ninanda juyai tucushcapachami canguichi.

9Juyashca huauquicuna, imata cashpapash shaijungacaman ñucanchi ruranajushcataca yaripanguichimi. Taita Diospaj shimita villanajushpapash, cangunataca, imatapash mañashpa ama fiñachingapami, imaguta charingapapash, tutandi, punllandimi ñucanchi maquihuambacha ruranajurcanchi.

10Cangunahuan cashpaca, Diospajlla causashpami, alitalla rurashpa, pipash na juchachijpi causarcanchi. Chaitaca, Taita Diospash, cangunapash yachanguichimi.

11Huahuacunata, taita viñachijshnami, cangunataca shinllitapacha rimashpa, aliguta yachachishpa, cushichishpa causarcanchi. Chaitapash alimi yachanguichi.

12Cangunataca, Taita Dios munashcashnapacha causachunmi chashna yachachircanchi. Paimi cangunataca, Paipaj juyailla llactagupi causagrichun cayarca.

13Taita Diospaj Shimita ñucanchi villanajujpi, canguna uyashpa chasquishpaca, runacunapaj munailla villashcatashnaca na chasquishpami, Taita Diospaj Shimipacha cajta yachashpa chasquircanguichi. Diospaj Shimica, canguna crij cajpimi aliguta yarichijun. Chaita yarishpami, Taita Diostaca, cangunamandaca “pashi” ninajunchilla.

14Juyashca huauquicuna, Jesusmanda Taita Diospajlla tandanajuj, Judea llactapi crijcunashnallami tucushcanguichi. Paicunataca, Judea llactapi causajcunallatami ninanda llaquichinajurca. Cangunapash chashnallatami, cangunapaj llactapuracunallata llaquichijpi causanguichi.

15Paicunallatami, Apunchi Jesustapash, Dios cachamushca profetacunatapash huañuchishpa, ñucanchitapash llujchishpa calpachirca. Paicunaca, Taita Diostapash na cazushpami, tucuicuna ima alita rurachumbash na saquinajun.

16Shinallata, na Israelcuna quishpirichun, ñucanchi villanajuchumbash na saquinllu. Paicunaca, chashna rurashpami juchacunata ashtahuan rurashpa catinajun. Chashna cashcamandami, Taita Diosca ninandapacha fiñarishpa llaquichinga.

Pabloca, crijcunataca cutinmi ricugringapa munashca

17Juyashca crijcuna, cangunataca ña unaitami na ricushcanchi. Cangunapaj ñavitaca na ricushpapash, shungupica napacha cungashpami, cutin ricungapa rishumbachami yashpa causanajunchi.

18Shina cashcamandami, cangunapajman shamungapa munarcanchi. Ñucallapash, cutin cutinmi “shamushapacha” yashpa purijurcani. Ashtahuangarin, Satanasmi ñucanchitaca jarcajurcalla.

19Ñucanchica, ¿coronatachu japishun, ninan cushijuitachu? japishun yashpami cushijushpa shuyanajunchi. ¿Nachu canguna, ñucanchi Apunchi Jesucristo tigramujpi japina corona canguichi?

20Cangunamandami, alicachi tucushpa, ninanda cushijuna canchi.