EZEQUIEL 25 - Quichua Imbabura 2016

Amón shuti llactata llaquichinata villashcamanda

1Mandaj Diosca, cashnami nihuarca:

2“Huañuna aichayuj runa, Amón shuti llacta gentecunapajman rishpa, paicunata llaquichinata villagri.

3Amón shuti llacta gentecunataca, cashna ningui: Mandaj Jatun Dios rimashcata uyaichi. Mandaj Jatun Diosca, cashnami nin: ‘Ñucapajlla huasita yangapi churashcatapash, Israel llactata tucuchishcatapash, Judá llactapi causajcuna prezu apashcata ricushpapash: ¡Alita chashna tucurca! nircanguichimi.

4Chaimandami cangunataca, indi llujshimujman causaj gentecunapaj maquipi saquisha. Cangunapaj llactapica corralcunata, carpacunata shayachishpami causanajunga. Canguna tarpushca granocunatapash paicunami micunga, lechetapash paicunami ufianajunga.

5Rabá shuti pueblotaca, camellocuna causachunmi saquisha. Amón shuti llactataca, llamacunata michina pambamanmi tigrachisha. Shina rurajpimi Ñucataca, Mandaj Dios cajta yachanguichi’ ninmi nishpa villangui” nihuarcami.

6Mandaj Jatun Diosca, cashnatapashmi nijurca: “Israel llactataca, ninanda na alicachishpami, maquita huactarishpa, chaquihuan tushurishpa ninanda cushijurcanguichi.

7Shinamandami canguna imata charishcatapash quichushpa apachun, shuj llactacunapi causajcunapaj maquipi churasha. Cangunataca, shuj gentecunapaj chaupipi causanajujpipash ninanda llaquichishpami tucuchisha. Shina tucuchijpimi Ñucataca, Mandaj Dios cajta yachanguichi” nijurcami.

Moab llactata llaquichinata villashcamanda

8Mandaj Jatun Diosca, cashnami nirca: “Moab shuti, Seir shuti llactacunapi causajcunaca, cashnami ninajurca: ‘Judá llacta gentecunaca, shuj llacta gentecunashnallatami causanajun’ ninajurcami.

9Chaimandami ñucapash, Moab llacta mujungunapi tiyaj pueblocunataca, tucuilla quichunajuchun saquigrini. Chai alpacunaca, paicuna ninanda alicachishca, Bet-jesimot, Baal-meón, Quiriataim shuti pueblocunami.

10Indi llujshimujman causajcunataca, Amón shuti llacta gentecunahuan macanajuna yuyaitami cusha. Amón shuti llacta gentecunataca, shuj llactapurapica, yaritapash ama yarinajuchunmi, chashna rurasha.

11Moab llactatapashmi, ninanda llaquichisha. Shina rurajpimi Ñucataca, Mandaj Dios cajta yachanajunga” nircami.

Edom shuti llactata llaquichinata villashcamanda

12Mandaj Jatun Diosca, cashnami nirca: “Edom shuti llactapi causajcunaca, paicunata llaquichishcamandami Judá llactapi causajcunataca, randi llaquichinajurca. Paicunataca, chashna rurashpami, jatun na alita ruranajurca.

13Chashna cashcamandami, Mandaj Jatun Dios Ñucaca, cashna nini: Ñucapash, Edom shuti llactataca ninandapachami llaquichisha. Chai llactapica, runacunatapash, animalcunatapash huañuchishpami, tucuillata tucuchisha. Temán shuti llactamanda callarishpaca, Dedán shuti llactacamanmi llaquichishpa tucuchisha.

14Paicuna llaquichishcashnallata llaquichingapami, Edom shuti llactapi causajcunataca, Ñuca agllashca Israelcunapaj maquipi churasha. Paicunami, Edom shuti llactapi causajcunataca, Ñuca ninanda fiñarishpa llaquichingapa munashcashnallata llaquichinajunga. Shina rurajpimi, Ñucataca imashna llaquichishcashna llaquichij cajtaca yachanajunga” nijurcami Mandaj Jatun Diosca.

Filisteocunata llaquichinata villashcamanda

15Mandaj Jatun Diosca, cashnami nirca: “Filisteocunaca, punda fiñanajushcata na cungashpami, Judá llactataca ninandapacha fiñarishpa tucuchirca.

16Chashna rurashcamandami Mandaj Dios Ñucaca, cashna nini: Filisteocunataca, Ñuca ninan ushaihuan llaquichishpami, cereteo runacunatapash huañuchisha. Shinallata, mama cucha manñapi causaj gentecunatapashmi tucuillata tucuchisha.

17Paicunataca, na alita rurashcamandami ninandapacha fiñarishpa llaquichisha. Imashna llaquichishcashnallata llaquichijpimi Ñucataca, Mandaj Dios cajta yachanajunga” nircami.