ROMANOS 1 - Quichua Imbabura 2016

“Alillachu capanguichi” nishcami

1Jesucristopajta ruraj apóstol Pablomi cani. Taita Diosmanda ali villanata villachun, shicanyachi tucushcami cani.

2Chaitaca Diosllatami, “pactachishapachami” nishpa pundallata profetacunahuan jucha illaj Shimipi quilcachishca carca.

3Chaipimi, Diospaj Churi ñucanchi Apunchi Jesucristomanda villajun. Paica, Runa Aichayuj cashcamandaca, Davidpaj miraimi carca.

4Paica, “Taita Diospaj Churipachami, ninan ushaita charijmi” ni tucurcami. Paica, huañushcacunapaj chaupimanda causarishpami, Diospaj jucha illaj Espiritumanda shina ni tucurca.

5Paimandami Diospaj ninan juyaitapash, apóstol canatapash chasquircanchi. Tucui llactacunapi causajcuna, Paipaj shutita juyashpa, Paita crishpa cazunajuchunmi, villachun cacharca.

6Paicunapurapica, cangunapashmi Jesucristopaj causangapa cayai tucushcacuna canguichi.

7Roma pueblopi tucuilla crijcuna, cangunaca Taita Dios juyashcacunami canguichi. Paipajlla causanajuchun cayai tucushcacunami canguichi. Ñucanchi Taita Diospash, Apunchi Jesucristopash ninan juyaita, ali causaiguta cangunaman carachunmi munani.

Roma pueblomanmi, Pabloca ringapa munashca

8Callaripica, ñuca Taita Diostami cangunamandaca Jesucristopaj shutipi pashi nijuni: Canguna crishpa catinajujtaca, tucui cai pachapimi uyanajun.

9Diosta mañajushpaca, na cungashpami cangunamandapash mañajuni. Chaitaca, Taita Diosllata yachahuanmi. Paiman tucui shunguhuan rurajushpami, Paipaj Churimandaca ali villanata villajunilla.

10Shinallata, Taita Diospaj munai cajpica, imashnallapash cangunata ricungapa rishpa ali chayangapami ninanda mañajuni.

11Canguna ashtahuan shinllitapacha catichun, Diospaj Espíritu ñucaman imashna yachachishcashna, cangunamambash yachachingapa shamungapami munani.

12Shujmanda, shujmanda, shinlli tucushpa ashtahuan aliguta crishpa catingapami, yarichingapa shamusha.

13Huauquicuna, ashtahuangarin cangunapajman shamungapa cutin cutin munajushcata yachachunmi munani. (Shina cashpapash cunangamanmi na shamui ushashcani). Caishuj na Israelcunapishna, cangunapurapipash granota fucuchijshna mirachingapami munani.

14Griegocunamambash, na griegocunamambash, alipacha yachajushcacunaman, na yachajushca gentecunamambashmi villanapacha cani.

15Shinamandami, Roma pueblopi causaj cangunamambash, quishpirinamanda villajuj shimita villangapa ninanda munajuni.

Quishpirinamanda ali villanaca, ninan ushaitami charin

16Maijan crijpipash, quishpichingapami Taita Diosca ushaita charin. Chaimandami, quishpirinamanda villanataca na pinganayachini. Chai ali villanami, judiocunatapash, griegocunatapash quishpichi ushan.

17Quishpirinamanda villajuj shimipica: “Jesusta crishcamandallami, Taita Diosca alitalla ruraj caimanda chasquijun” nijunmi. Ashtahuangarin, “alitalla ruraj runaca, crishcamandallami causanga” nishpami, quilcashcapica villajun.

Tucui gentecunami juchata rurashca

18Taita Dios ninanda fiñarishcataca, jahua pachamandami ricuchimujun. Diosta na cazujcunatapash, na alitalla rurajcunatapash fiñashpa llaquichinatami ricuchimujun. Paicunaca, na llullashpa villajuj shimitami, jatun na alitalla rurashpa jarcanajun.

19Ashtahuangarin, Taita Diosmanda imata yachanatapash, Taita Diosllata ricuchijpimi yachai ushanchi.

20Diosca, pipash na ricui ushanallacunatapash, Paipaj na tucurina ushaitapash, Pai Diospacha cashcatapash, Pai tucuita rurashcacunapimi ricuchishpa yachachishca. Shinamandami, pipash “na yachai ushashcanichu” nitaca na ushanga.

21Paicunaca, Taita Diosta rijsishpapash, Paitaca na alicachishpa, na pashi nishpami causanajurca. Ashtahuangarin, paicunapaj yuyaicunapash yanayashpami, paicunapaj shungupash shinlliyashpa causanajurca.

22Alipacha yachajushcami canchi ninajushpapash, paicunaca shinlli shungumanmi tigrarca.

23Shina cashpami, na tucurij ninan ushaita charij Taita Diosta alicachingapa randica, huañuna genteman rijchajta, jahuata purij alasyu animalcunata, chuscu chaquita charij animalcunata, llucajuj animalcunaman rijchajcunatara alicachinajurca.

24Chaimandami, paicunapaj shungu munashcashna, na alicunatalla rurashpa causanajuchun Taita Diospash saquirca. Shinamandami, paicunapurallata paicunapaj cuerpocunata huaglichishpa causanajurca.

25Shina cashpami, Taita Diospaj na llullaj Shimita saquishpa, llullatara catinajurca. Tucuita Ruraj Diosta alicachina randica, Dios rurashcacunatarami alicachinajurca. Diosca, causaita causaicamanmi ninanda alicachi tucunga. Chashna cachun.

26Chashna na alicuna cajpimi, pinganayai na ali munaicunata rurachun, Taita Diosca saquirca. Paicunapaj huarmicunapash, jarihuan causangapa randica, paipurallata na alita rurashpami causanajurca.

27Shinallatami jaricunapash, huarmihuan causanata saquishpami, jaripurallata ninanda munarinajushpa jatun na ali pinganayaita ruranajurca. Chashna na alita ruranajushpami, llaquichi tucunapacha cashcamanda, ninan llaquita apanajunga.

28Taita Diosta catingapa paicunallata na munajpimi, paicunapaj na ali yuyaicunatalla rurashpa causanajuchun, Taita Diosca saquirca. Napash ruranacunatara ruranajuchunmi saquirca.

29Paicunaca: Na alitalla rurashpa, huainayashpa, jatun na alita rurashpa, charijyashpa, imatapash na alitalla rurashpa causana munaicunahuan jundacunami. Shinallata, shujcuna imatalla charishcata munajcuna, huañuchijcuna, paicunapura fiñanajujcuna, umachijcuna, imatapash na alitalla yarishpa causajcunami.

30Huasha parlajcuna, na alicachishpa rimajcuna,Taita Diostapash na ricunayachijcuna, jariyashpa jatun tucuncunami. Na alita rurangapaca ashtahuan mushujta yarijcuna, taitata mamatapash na cazujcunami.

31Shinlli shungucuna, mandashcatapash napacha cazujcuna, pitapash na juyajcunami. Fiñanajushpapash napacha ali tucungapa munajcuna, pitapash na llaquijcunami.

32Taita Dios llaquichinata ali yachashpata chashna na alicunata rurajcunaca, huañushpa chingagrinatapachami charin. Na chashna rurajcunalla chingagringachu, ashtahuangarin chashna ruranajujpi alicachishpa cushijujcunapashmi chingagringa.