1Sion urcupimi, trompetata huacachina canguichi.
Ñucapajlla lomapica, caparishpami villana canguichi.
Cai pachapi tucui causajcunaca, manllarichiyari.
Mandaj Dios shamuna punllami ñapacha pactamujun.
2Chai punllapica, yana yana tutami tucunga.
Fuyu quilpashca llandu llandu punllami tucunga.
Punllayajujpi, lomacunata punchalla shitamujshnami, ashtaca ninan shinlli runacuna shamunga.
Chashnataca, ima punllapash pipash na ricushcachu.
Jipa miraicunapash, na ricungachu.
3Chai ninan shinlli runacunaca, paicuna yalinajushpapash,
ña yalishca jipamambash nina rupachishpa tucuchinshnami tucuchinga.
Paicuna nara chayamujpica cai llactaca, Edén huertashnami canga.
Paicuna rishca jipaca, chaquishca pambami saquiringa.
Paicunamandaca, pipash na quishpiringachu.
4Chai runacunaca, caballocunashnami canga.
Caballopi tiyarishpa macanajuj runacunashnami calpanajunga.
5Paicunaca, macanajuna carretacuna culun nijshnami, urcu jahuacunapi fahuanajunga.
Chaquishca fangacuna rupajujshnami uyaringa.
Jatun macanajuiman rinalla shuyanajuj ninan shinlli runacunashnami canga.
6Paicunapaj ñaupajpica, tucui gentecuna manllashpami, ñavicunapash huañungashna tucunajunga.
7Ninan shinlli runacunashnami calpanajunga.
Macanajunata ali yachaj runacunashnami, pirca jahuaman rinajunga.
Tucuicunami, paicunapaj ñanda japishpa, chai ñandallata catishpa rinajunga.
8Maijambash na caishuj chaishuj tangarinajungachu.
Tucuicunami paicunapaj ñandalla rinajunga.
Paicunapajman flechacunata cacharijpipash, chai ñanmandaca, na anchuringachu.
9Pueblo ucumanmi yaicunajunga.
Pirca jahuacunatami calpanajunga.
Huasi jahuacunamanmi, rinajunga.
Shuhuacunashna, ventanacunatami yaicunajunga.
10Paicunapaj ñaupajpica, cai pachapash, jahua pachapash ninandapachami manllaringa.
Indipash, lunapash yanayangami,
luzerocunapash na punchayachingachu.
11Mandaj Diosca, Paipaj macanajuj runacunapaj ñaupajpimi shinllita rimanga.
Paipaj macanajuj runacunaca, ashtacapachami.
Pai mandashcata pactachijcunaca, ninan shinllicunapachami.
Mandaj Dios shamui punllapica, manllanayai jatun llaquimi tiyanga.
Chai llaquicunataca, ¿pita yali ushangayari?
Mandaj Dios llaquishpa juyanamanda12Mandaj Diosca cashnami nin:
“Cunanga, na micushpa huacashpa, ninanda llaquirishpami,
tucui shunguhuan Ñucapajman tigrana canguichi” ninmi.
13Churajushcata liquingapa randica,
tucui shunguhuanmi, Cangunata Mandaj Taita Diospajman tigrana canguichi.
Paica llaquishpa, ninanda juyaj Diosmi.
Na ñapash fiñarij, ninanda llaquij Diosmi.
Paica, na llaquichingapa munanllu.
14Pai shamushpaca, pitapash na llaquichishpa,
ashtahuangarin bendiciashpa tigranatapash, ¿pita yachanguichiyari?
Chashna cajpica ofrendatapash, talina vinotapashmi Mandaj Diosman cuna canga.
15Sión lomapimi, trompetata huacachina canguichi.
Cangunaca, tucuicunata tandachishpami:
“Na micushpami Diosta mañana canguichi” nishpa villana canguichi.
16Gentecunata tandachishpami, Diospajlla shutipi tandanajuna canguichi.
Rucucunata, huambracunata, chuchujuj huahuacunatapashmi tandachina canguichi.
Chairalla cazarashcacunaca, paicuna puñunajuj ucuta saquishpami llujshinga.
17Mandaj Diospajta ruraj sacerdotecunaca,
yaicuna punguhuan altarhuan chaupipi shayarishpa huacashpa, cashna ninguichi:
“Mandaj Dioslla, Can agllashca gentecunataca perdonapayari.
Can agllashca gentecunata na alicachishpa rimanajuchunga, ama saquipaichuyari.
Paicunataca, shuj llactapi causajcuna mandanajuchumbash, ama saquipaichuyari” ninguichi.
“¿Paicunapaj Taita Diosca maipitayari?” nishpa rimachunga ama saquinguichu.
18Mandaj Diosca, Paipaj llactata ninanda juyashpami,
Pai agllashcacunataca perdonarca.
19Mandaj Diosca, Pai agllashcacunataca cashnami ninga:
“Ñucami trigotapash, llullu vinotapash, aceitetapash canguna na munajta carasha.
Shuj llactacunapi llaquichi tucunajuchumbash, na alicachi tucunajuchumbash, cutinga na saquishachu.
20Cangunata llaquichijcuna janajman tiyaj llactamanda shamujpica, jarcashpa na saquishachu.
Paicunataca, chaquishca jichushca pambamanmi cachasha.
Ñaupashpa shamujcunataca, cachi tiyaj cuchapimi shitasha.
Huashata catimujcunataca, indi huashajun mama cuchapimi shitasha.
Chai huañushcacunapaj aicha ismushpami, ninandapacha ashnanajunga.
Paicunataca, ninandapachami llaquichisha” ningami.
21Cai llactapi causajcunalla,
imatapash na manllashpa, ninandami cushijuna canguichi.
Mandaj Diosca, pipash na rurai ushashcacunatami ruranga.
22Pambapi causaj animalcunapash, na manllanachu canguichi.
Jichushca pambapi, jihuacunapash cutinmi viñai callaringa.
Yuracunapica, higocunapash, uvacunapashmi cutinllata fucunga.
23Sión pueblopi causajcunapash, cangunata Mandaj Taita Dioshuanmi ninanda cushijuna canguichi.
Paimi callari tamiataca, tamiana punllapillata cangunaman caramurca.
Paimi, callari tamiatapash, jipa tamiatapash callaripishnallata cachamunga.
24Trigota huajtana pambacunapash, trigohuan jundami canga.
Vinota cutana pushtumandaca, vinopash, aceitepashmi jundashpa jicharijunga.
25Taita Diosca: “Oruga, saltón, revoltón, langosta jurucuna,
granocunata micushpa llaquichinajushca huatacunataca, cutinmi alichisha.
Paicunataca, Ñucapajta rurajcuna cajpimi, cangunata llaquichinajuchun cachamurcani.
26Cangunaca, na munajtami micunguichi.
Cangunaman jatun manllarinacunata ruraj, cangunata Mandaj Taita Dios Ñucapaj shutitami alicachinguichi.
Ñuca agllashcacunaca, napacha cutinga pingai tucungachu.
27Shina rurajpimi, Jatun Dios Ñucataca,
Israelcunapaj chaupipi causajujta yachanguichi.
Ñucataca, cangunata Mandaj Taita Dios cajta,
Ñucamanda shuj Diosca pipash na tiyajtami yachanguichi.
Ñuca agllashcacunaca, napacha cutinga pingaichi tucungachu.
Taita Diospaj Espirituta, talijshna cachamunamanda28Cai tucuita rurashca jipaca,
Ñuca Espiritutami tucui gentecunaman cachamusha.
Shinamandami, cangunapaj churicunapash, ushicunapash villanajunga.
Rucucunapash, chairalla viñaicunapash, muscuipishnami ricunajunga.
29Chai punllacunami, gañan jaricunamambash,
huarmicunamambash, Ñuca Espirituta cachamusha.
30Jahua pachapipash, cai pachapipash jatun manllarinacunatami rurashpa ricuchisha.
Yahuarpash, ninapash, pilarshna shayajuj cushnipashmi ricuringa.
31Indica yana yanami tucunga.
Lunapash yahuarshnami tigranga.
Mandaj Dios agllashca ninan manllarina jatun punlla nara chayamujpillatami chashna tucunga.
32Maijan cashpapash Jatun Diosta crishpa mañashpaca quishpiringami.
Sión urcupipash, Jerusalén pueblopipashmi quishpirina tiyanga.
Mandaj Dios villashcashnallata Pai agllashcacunallami quishpiringa.
Who We AreWhat We EelieveWhat We Do
2025 by iamachristian.org,Inc All rights reserved.
