1Jacobmanda mirai Israelcunalla, aliguta uyaichi:
‘Cangunaca, Juda ayllumanda miraicunami canguichi.
Cangunaca, Mandaj Diospaj shutipimi pactachingapa ari’ nircanguichi.
Israelcunapaj Diostaca, shimi jahuallami yarishpa causanguichi.
Diostaca, na shungumanda yarishpami causanguichi.
2Cangunaca: ‘Jucha illaj pueblomandami canchi.
Israelcunapaj Diosta yarishpami causanchi.
Paipaj shutica, tucuita Mandaj Diosmi’ ninguichimi.
3Cunanbi ima tucunataca, Ñucami pundallata villarcani.
Ñuca shimihuan villashcacunaca, ñami pactamushca.
4Canguna shinlli shungucuna cajtaca yachanimi.
Cangunapaj cunga tullupash barra jirrushna, cangunapaj umapash, bronceshna cajtapash yachanimi.
5Canmanga, pundallatami villarcani.
Nara imapash tucujpillatami, ña canmanga nircani.
Caspita rurashca dioscuna, imatapash yacuyachishpa rurashca dioscunami, chashna rurashca nishpa, ama nijuchunmi, chashna pundallata villarcani.
6Canga tucuita uyashpa, ricushcanguimi.
Chaicunataca: ¿Nachu villagringuichi?
Cunanga, canguna na uyashca, shuj mushujtami villarcani.
7Cunanbi chashna tucushcacunaca, pundacunaca, na tiyarcachu.
‘Ñucaca, chaitaca ñami yacharcanchi’ nishpa ama nijuchunmi, pundata chashna rurarcani.
8Caicunataca nara uyashpa, nara yachashpami causarcanguichi.
Cangunaca napacha uyangapa munashpami causarcanguichi.
Imata mandashcatapash na cazushpami causarcanguichi.
Chaimandami: ‘Caicunaca, huacharishca punllamandapachami na cazujcuna’ nircani.
9Ñucaca, ninan juyaita charishpami, fiñarishpa llaquichinamandaca jarcarircani.
Ñucata alicachishpa causachunmi, cangunataca na tucuchircani.
10Cangunataca, culquita punchayachinatapash yalita rurashpami, jucha illajta saquircani.
Candaca, ashtahuan shinlli llaquicunata cushpami, jucha illajta saquishcani.
11Ñucata alicachishpa causachunmi, Ñucallata chashna rurarcani.
Ñucata Shutita ama yangapi churashpa, Ñuca Shutita jatunyachishpa causachunmi chashna rurarcani.
12Ñuca agllashca Jacobmanda mirai Israelcuna, uyahuaichi.
Ñucami Dios cani. Ñucami callarichijpash, tucuchijpash cani.
13Cai pachatapash, Ñuca maquihuanmi churarcani.
Ñuca maquihuan tupushpami, jahua pachatapash churarcani.
Ñuca Shimihuan rimajpimi tandanajushpa tiyarirca.
14Tucuicuna tandanajushpa uyaichi.
¿Pita caicunata villangapaca tiyanga?
Mandaj Dios juyashca runami, Babilonia llactataca, Pai ima nishcataca pactachinga.
Paillatami, caldeo gentecunatapash mandajunga.
15Ñucami paitaca, cayashpa pushamurcani.
Chaimandami, pai imata rurashcapash ali llujshinga.
16Ñucapajman shamushpami, ali uyana canguichi.
Tucui imatapash callarimandapachami na pacashpa villarcani.
Imata rurarijujpipash, chaipillatami carcani” ninmi.
Cunanga, Mandaj Dios Ñucami, Ñucapaj Espirituhuan paitaca cachamurcani.
17Cangunata Quishpichij, Israelcunapaj jucha illaj, Mandaj Diosca, cashnami nijun:
“Ñucami, cangunata Mandaj Taita Dios cani.
Ñucami, cangunapaj ali cachun yachachini.
Canguna maijan ñanda rinatapash, ñucami ricuchishpa pushani.
18¡Ñuca mandashcacunata canguna cazujpica, cushijushpa aliguta causanami tiyanman carca!
Imatapash alitalla rurashpa causajpica,
mama cucha yacu caiman chaiman juyaillaguta shitarijunshnami canman carca.
19Cambaj miraicunapash, ninandami miranman carca.
Cambaj mirai huahuacunapash, ñutu alpashna, ashtacami canman carca.
Cambaj shutitapash, napacha anchuchimanllu carcani.
Ñuca ñaupajmandapash, napacha anchuchimanllu carcani” ninmi.
20Babilonia llactamanda llujshishpa, caldeo gentecunamanda pacajushpa richilla.
Chashna tucushcataca, cushijuihuan caparishpa villaichi.
Cai pacha manñacaman rishpa, cashna nishpa villaichi:
“Mandaj Diosca, Paipajta ruraj Jacobmanda mirai huahuacunataca quishpichircamari” ninguichi.
21Jichushca pambata pushajujpipash, na yacunayachircachu.
Jatun rumimandami yacutaca llujchirca.
Jatun jaca rumita faquijpimi, yacuca calpajurca.
22Mandaj Diosca cashnami nirca:
“Ñucata na cazushpa causajcunaca, napacha ali causaita charingachu” nircami.
Who We AreWhat We EelieveWhat We Do
2025 by iamachristian.org,Inc All rights reserved.
