EZEQUIEL 20 - Quichua Imbabura 2016

Israelcuna na cazujpi, Taita Dios llaquichishcamanda

1Canchis huata, picha quilla, chunga punllapimi, Israelcunata mandaj huaquin ancianocunaca, Mandaj Diosta tapungapa shamushpa, ñuca ñaupajpi tiyarinajurca.

2Chaipimi Mandaj Diosca, cashna nihuarca:

3“Huañuna aichayuj runa, Israelcunata mandaj ancianocunaman, cashna nishpa villai: ‘Mandaj Jatun Diosca, cashnami nin: Cangunaca, ¿Ñucata tapungapachu shamunguichi? Ñucaca ricujunimi. Canguna tapushcataca, napacha tigrachishachu’ ninmi Mandaj Jatun Diosca.

4Huañuna aichayuj runa, ¿paicuna imatalla rurashcamandaca, llaquichingapa munanguichu? Chaita munashpaca, paicunapaj taitacuna, na alita rurashcatarami rijsichina cangui.

5Chai jipaca cashna ningui: ‘Mandaj Jatun Diosca, cashnami nin: Israelcunata agllai punllallatami, Jacobpaj huasi ucupuracunahuan juramentushpa ari nircani. Paicuna Egipto llactapi cajpillatami, paicunapajman shamushpa, cashna ari nircani: Ñucaca, cangunata Mandaj Taita Diosmi cani nishpami juramenturcani.

6Chai punllapica, Egipto llactamanda llujchishpami, lechepash, balun mishquipash ashtacapacha tiyaj llactaman pushashpa carasha. Chai llactaca, tucui llactacunata yali juyailla llactagumi’ nircanimi.

7Cashnatapashmi nircani: ‘Chai rurashcalla dioscunataca, tucuillatami cangunapaj ñaupajmanda llujchishpa shitana canguichi. Egiptopi tiyaj rurashcalla dioscunahuanga, na mapayanachu canguichi. Ñucami, cangunata Mandaj Taita Dios cani’ nircanimi.

8Ashtahuangarin paicunaca, Ñucata fiñashpami, na cazunajurca. Rurashcalla dioscunata, paicunapaj ñaupajmanda anchuchingapaca, tucuicunallata na munarcachu. Egipto llactapi tiyaj rurashcalla dioscunatapash, na saquingapa munarcachu. Chaimandami cashna nircani: ‘Egipto llactapi cajpillata ninanda fiñarishpa llaquichisha nishcata pactachingapami, paicunataca ninandapacha llaquichisha’ nircanimi.

9Shina nishca cashpapash, shuj llactacunapi causajcunapaj ñaupajpi, ama na alicachi tucushca cangapami, na llaquichircani. Chai llactapi causaj gentecuna ricujtami, Israelcunataca, Egipto llactamanda llujchimurcani.

10Paicunata Egipto llactamanda llujchimushpaca, jichushca pambamanmi pushamurcani.

11Chaipimi, tucui Ñuca mandashca shimicunata curcani. Chai mandashcacunata pactachishpami, runaca causaita charinga.

12Ñucahuan, paicunahuan imatapash pactachij cashcata ricuchij cachunmi, samana punllacunataca curcani. Mandaj Dios Ñucallata, Ñucapajlla cachun shicanyachij cashcata yachachunmi curcani.

13Ashtahuangarin, Israelcunaca jichushca pambapimi, Ñucataca na cazunajurca. Ñuca tucui mandashca shimicunatapash, na cazushpa, na pactachishpami, yangapi churanajurca. Chaicunata pactachijcunallami causaita charinga nishpami villarcani. Samana punllacunatapash, yangapimi churanajurca. Chaimandami paicunataca: ‘Ñuca ninanda fiñarishpa, jichushca pambapillata llaquichishpa tucuchisha’ nircani.

14Ashtahuangarin shuj llacta runacuna chaita ricushpa, Ñucata ama na alicachinajuchunmi, na llaquichircani. Paicunataca, chai gentecuna ricujtami Egipto llactamanda llujchimurcani.

15Paicunahuanga, jichushca pambapi juramentushpami: ‘Lechepash, balun mishquipash ashtacapacha tiyaj, tucuita yali juyailla llactaman na pushashachu’ nircani.

16Paicunallatami, tucui Ñuca mandashca shimicunataca, na pactachishpa yangapi churajurca. Samana punllacunatapash yangapi churashpami, paicunapaj rurashcalla dioscunatara mañashpa causanajurca.

17Chashna cajpipash, cangunata perdonashpami, jichushca pambapica na huañuchishpa tucuchircani.

18Ashtahuangarin paicunapaj huahuacunatapash, jichushca pambapillatami cashna nircani: ‘Cangunapaj taitacuna mandashpa yachachishcataca, na pactachinachu canguichi. Paicunapaj rurashcalla dioscunatapash, na catinachu canguichi.

19Ñucami, cangunata Mandaj Taita Dios cani. Cangunaca, Ñuca mandashca shimicunataca pactachishpami causana canguichi.

20Ñuca churashca samana punllacunaca, cangunahuan ari nishcata pactachina cashcata ricuchingapami canga. Shina rurajpimi cangunaca, cangunata Mandaj Taita Dios cajta yachanguichi’ nircanimi.

21‘Ashtahuangarin paicunapaj huahuacunaca na cazurcachu. Tucui Ñuca mandashca shimicunatapash, na pactachishpami causanajurca. Ñuca mandashca shimicunata pactachishpaca, causaita charinmanmi carca’ nircanimi. Paicunaca, Ñuca churashca samana punllacunatapash, yangapimi churanajurca.

Chaimandami: ‘Ñucaca ninandapacha fiñarishpa, paicunataca chai jichushca pambapi llaquichisha’ nircani.

22Ashtahuangarin, shuj llactapi causajcuna Ñucata ama na alicachinajuchunmi, na llaquichircani. Paicunataca, chai gentecuna ricujtami Egipto llactamanda llujchimurcani.

23Shinallata, jichushca pambapillatami, paicunataca shuj llactacunaman, caita chaita cachasha nishpa, juramenturcani.

24Paicunaca, Ñuca mandashca shimicunataca, yangapi churashpami na pactachinajurca. Ñuca churashca samana punllacunatapash, yangapi churashpami, paicunapaj taitacunapaj rurashcalla dioscunatara catinajurca.

25Chaimandami Ñucapash, shuj mandashcacunata pactachishpa causanajuchun saquircani. Chai mandashcacuna, napacha causaita cui ushanllu.

26Paicunapaj punda churicunata, rurashcalla dioscunaman ofrendata carashpa rupachinajuchunmi saquircani. Chaita rurashcamanda llaquichijpi, paicunapaj Mandaj Dios cajta yachachunmi, chashna rurarcani.

27Huañuna aichayuj runa, chashna cashcamanda Israel gentecunaman, cashna nishpa villangui: ‘Mandaj Jatun Diosca, cashnami nin: Cangunapaj taitacunaca, chashna na alicunata rurashpa, na cazushpami, Ñucataca fiñachinajurca.

28Cangunaman carashapachami nishpa, Ñuca juramentushca llactamanmi pushamurcani. Chai llactaman pushamujpica, chaipi tiyaj jatun lomacunata, jatun quirucunata ricushpami, chaipi animalcunata carashpa huañuchinajurca. Ñuca na ricunayachishcatami, chaicunapica ruranajurca. Mishquilla ashnajun inciensotapash cushnichishpami, talina vinotapash cunajurca’ ninmi nishpa villangui.

29Chaita ricushpami, ñucaca: ‘Lomacunapi altarcunaca, ¿ima cajpita chaiman ringuichi?’ nishpa tapurcani. Chai altarcunaca, cunan punllacamanmi Bama shutihuan tiyanajun.

30Shina cashcamanda Israelcunataca, cashna ningui: ‘Mandaj Jatun Diosca, cashnami nin: Cangunapash, cangunapaj taitacunashnami na alita rurashpa causarcanguichi. Rurashcalla dioscunata catishpami na alita rurarcanguichi. ¿Chashnachu na alitalla rurashpa catina canguichi?

31Cangunaca, imatalla caranacunatapash carashpa, cangunapaj churicunatapash rurashcalla dioscunaman carashpa rupachishpami, cunangaman ninan na alita ruranajunguichi. Israel gentecuna, ¿chashna na alita rurashca jahua, tapuj shamujpica tigrachinachu cani? Ñucaca causajunipachami, canguna tapushcataca napacha tigrachishachu’ ninmi Mandaj Jatun Diosca ningui.

32Canguna munashcashnaca napacha pactangachu. Cangunaca, cashnami ninajunguichi: ‘Shuj llactacunapi causajcunashna caspita, rumita rurashca dioscunata catishunchi’ ninguichimi.

33Mandaj Jatun Dios Ñucami cashna nini: Ñucapaj ninan ushaihuan fiñarishpami, cai pachapica cangunataca mandasha.

34Shuj llactacunapi caipi chaipi causanajujtami, Ñucapaj ninan ushaihuan, ninanda fiñarishpa caiman tandachimusha.

35Chai llactacunamanda jichushca pambaman llujchimushpami, cangunahuanga ñavi ñavi rimasha.

36Egipto llactamanda llujchimushpa, jichushca pambapi cangunapaj taitacunahuan rimashcashnallatami cangunahuambash rimasha. Mandaj Jatun Dios Ñucami, chashna nini.

37Cangunataca, varahuan yupajshnami, Ñucahuan ari ninajushcata pactachinajuchun mandasha.

38Cangunapuramandaca, Ñucata na cazujcunatapash, Ñucata yangapi churajcunatapashmi shicanyachisha. Shuj llactamanda llujchimujpipash, Israel llactamanga napacha yaicui ushangachu. Shina rurajpimi Ñucataca, Mandaj Dios cajta yachanguichi.

39Israel gentecuna, cangunata Mandaj Jatun Dios Ñucallatami, cashna nini: Canguna Ñucata na cazungapa munashpaca, rurashcalla dioscunata catishpa, causagrichilla. Ñucapaj jucha illaj shutitaca, ofrendacunahuan, rurashcalla dioscunahuanga, na mapayachinachu canguichi.

40Mandaj Jatun Dios Ñucallatami, cashna nini: Ashtahuangarin Israel llactapi, Ñucapajlla shicanyachishca lomapimi, Israelcunaca Ñucapajta ruranajunga. Chaipimi, Ñucaman imatalla carangapa apamushca ofrendacunataca Ñucapajlla cajpi chasquisha.

41Shuj llactacunapi, shuj pueblocunapi causanajushcamanda tandachimushpami, cangunataca mishquilla ashnajun inciensotashna chasquisha. Chashna rurajpimi tucuicuna ricujta ninanda alicachihuanguichi.

42Israel llactaman pushamujpimi, ñucataca Mandaj Dios cajta yachanguichi. Chai llactatami, cangunapaj ñaupa taitacunaman carashapachami nishpa juramenturcani.

43Chai llactapi cashpami, canguna na alita rurashpa causanajushcata yaringuichi. Shinamandami, canguna rurashca juchacunataca, cangunallata na ricunayachinguichi.

44Israel gentecuna, canguna na alita rurashpa causanajujpipash, Ñucallata tucuita juyashpa pactachij, Mandaj Dios cajtami yachanguichi” ninmi Mandaj Jatun Diosca.

Neguev pambata llaquichina cashcamanda

45Mandaj Diosca, cashnami nihuarca:

46“Huañuna aichayuj runa, uraiman ricushpa, Neguev pambapi, quirucuna jundashca pambata llaquichinata villagri.

47Neguev pambapi, quiru junda pambataca, cashna ningui: Mandaj Diospaj shimita uyaichi. Mandaj Jatun Diosca, cashnami nin: ‘Ñuca ninata japichijpimi, chaipi quirucunapash, chaquishca quirucunapash, tucuilla rupashpa tucuringa. Chai ninaca, tucuilla tucuchingacamanmi rupajunga. Uramanda callarishpa, janajcamanmi tucuchinga.

48Mandaj Dios Ñucallata, chai ninata japichishcataca, tucuicunami ricunajunga. Chai ninaca, napacha huañungachu’ nishpa villai” nihuarcami.

49Shina nijpimi ñucaca, cashna nircani: “¡Aij, Mandaj Jatun Dioslla! ñucataca: ‘Chimbapurana shimicunahuan rimajujpimi, ñucataca na alicachishpa parlanajun’ ninajunmi” nircanimi.