OSEAS 11 - Quichua Imbabura 2016

Pai agllashca gentecuna na cazujpipash, Taita Dios llaquishcamanda

1“Israelcunataca, chairalla viñaicuna cajpica ninandami juyarcani.

Ñuca churitaca, Egiptomandami cayarcani.

2Paicunata ashtahuan juyajujpipash,

Ñucamandaca ashtahuanmi caruyanajurca.

Baal shuti dioscunamanrami, animalcunata cushpa huañuchinajurca.

Rurashcalla dioscunamanmi, imatapash cushpa cushnichinajurca.

3Efraín ayllutaca ninanda juyashpami,

maquimanda japishpa, ali ñambi purichun yachachircani.

Ashtahuangarin, Ñuca paicunata huacaichijushcataca na yacharcachu.

4Ñucaca, paicunataca huascahuan aisajshnami,

ninandapacha juyashpa Ñucapajman pushamurcani.

Paicunapaca, cungamanda yuguta anchuchin runacunashnami anchuchircani.

Micunatapash, paicunapaj ñaupajpimi churarcani.

5Paicunaca, Ñucata catingapaca na munarcachu.

Chaimandami, Egipto llactaman na cutin tigranga,

ashtahuangarin, Asiria llactapi causajcunami, paicunapaca jatun mandaj tucunga.

6Paicunapaj pueblocunapi causajcunatapash,

paicunapaj muyundi uchilla pueblocunapi causajcunatapashmi, espadahuan tucuchinajunga.

Paicunallata, na alita yarishpa imatapash rurashcamandami, chashna tucuchinajunga.

7Ñuca agllashcacunaca, napacha cazungapa munashpami purinajun.

Jahua pachapi causajuj Dios ninajushpapash,

maijanllapash Ñucataca na jatunyachingapa munanllu.

8Efraín ayllu gentecunalla,

¿cangunataca imashnata jichushpa saqui ushashayari?

Israelcunalla, ¿cangunataca shujcunapaj maquipi saquishallachu?

Cangunataca, ¿imashnata Adma shuti pueblotashna, Zeboim shuti pueblotashna llaquichishayari?

Ashtahuangarin cangunataca, tucui shungumi, ninandapacha llaquishpa juyani.

9Ñuca fiñashpa llaquichinataca, na cachamushachu.

Efraín aylluta cutin llaquichingapapash, na tigrarishachu.

Ñucaca na runachu cani, ashtahuangarin Taita Diosmi cani.

Cangunapaj chaupipica, jucha illajmi causajuni.

Shina cashcamanda, cai pueblomanga na yaicushachu.

10Paicunaca, Mandaj Diosta catishpami causanajunga.

Ñucaca, león huacanshnami rimasha.

Chaita uyashpami, Ñuca huahuacunaca, indi huashajunmandaca, chujchushpa shamunajunga.

11Egiptomandaca alasyu animalshnami, ñapash Ñucapajman shamunajunga.

Asiria llactamandaca, palomashnami shamunajunga.

Paicunataca, paicunapaj huasicunapillatami causachun saquisha” ninmi Mandaj Diosca.

12Efraín aylluca, ninandami llullahuashca.

Israelcunapash, ninandami umachihuashca.

Judá llactapi causajcunaca, Taita Dioshuan na pacta purinajunllu.

Tucuita pactachij, Taita Diospajlla tucushpa causanatapash, saquishpami purinajun.