EZEQUIEL 39 - Quichua Imbabura 2016

1Huañuna aichayuj runa, Gog shuti runata llaquichinataca cashna nishpa villangui: “Mandaj Jatun Diosca cashnami nirca: ‘Mesec shuti, Tubal shuti llactacunata jatun mandaj, Gog shuti runa canhuanga fiñarishcami cani.

2Candaca, munai na munaimi janajman tiyaj llactacunamanda, Israel llacta urcu alpacunaman pushamusha.

3Cambaj lluqui maquipi charijuj arcotapash quichushpami, cambaj ali maquipi charijuj flechacunatapash cacharichisha.

4Cambash, cambaj macanajuj runacunapash, canhuan rishca gentecunapash, Israel llacta urcu alpacunapimi, huañushpa urmanguichi. Cangunataca millai angacuna, sachapi causaj millai animalcuna micuchunmi cararcani.

5Cangunaca, pambacunapimi huañushca siringuichi. Mandaj Jatun Dios Ñucami’ chashna nini.

6Shinallata: ‘Magog shuti llactamambash, mama cucha manñacunapi imatapash na manllashpa causajcunamambash, ninatami cachamusha. Shina rurajpimi Ñucataca, Mandaj Dios cajta yachanga.

7Ñuca agllashca Israelcunamanmi, Jucha illaj Ñuca shutitaca rijsichisha. Shina rurajpimi, jucha illaj Ñuca shutitaca na yangapi churanga. Shinallata, shuj llactacunapi causajcunapashmi Ñucataca, Israelcunapaj jucha illaj Mandaj Dios cajta yachanga.

8Ñuca llaquichina punllami chayamujun, chaica pactangapachami. Chai punlla chayamunatami villajurcani. Mandaj Jatun Dios Ñucami’ chashna nini.

9Shinallata: ‘Israel llactapi tiyaj pueblocunapi causajcunami, macanajunacunata, jarcarinacunata, uchilla jarcarinacunata, arcocunata, flechacunata, maquihuan shitana flechacunata, tucsina jirrucunatapash ninata japichishpa, canchis huatacaman rupachinajunga.

10Chaicunata rupachingapaca, sachamanda yamdatapash, quiru junda pambacunamanda yamdatapash na apamugringachu. Ashtahuangarin, chai macanajunahuanmi rupachinajunga. Paicuna ima charishcata quichujcunatami quichunajunga. Shuhuacunatami shuhuanajunga. Mandaj Jatun Dios Ñucami’ chashna nini.

11Shinamandami: ‘Chai huatacunaca Israel llactapi, Gog shuti runata maipipacha pambanata villasha. Chaica, cachi cuchamanda, indi llujshimujman yalina pugru pambacunapimi canga. Gog shuti runata, paipaj ashtaca runacunatapash chaicunapi pambajpimi, chaita yalijcunaca, na ashtahuan chaita yali ushanga. Shinallata, chai pugru pambataca, Hamón-gog shutitami shutichinga.

12Israel llactata mapa illajta saquingapami, chai huañushcacunataca canchis quillacaman pambashpa tucuchinga.

13Chai llactapica tucuicunami, huañushcacunata pambanajunga. Ñucata jatunyachinajui punllapimi, paicunapash cushijuna punllata charinga. Mandaj Jatun Dios Ñucami’ chashna nini.

14Shinallata: ‘Tucui Israel llactata rishpa huañushcacunata pambanajuchunmi, culquita cushpa runacunata cachanajunga. Israel llactata mapa illajta saquingapami chashna ruranajunga. Ña canchis quilla jipami, chai llactataca ricungapa rinajunga.

15Chai llactata ricushpa rij runacuna, gentecunapaj tullucunata tarishpaca, shuj yarichinatami chaipi churanajunga. Huañushcacunata pambaj runacuna, Hamón-gog shuti pugru pambapi tullucunata pambangacamanmi chashna churanajunga.

16Chaipi tiyaj pueblotaca, Hamona shutitami shutichinga. Shinami Israel llactataca mapa illajta ruranga’ nishpa villai” nihuarcami.

17Mandaj Jatun Diosca cashnatapashmi nirca: “Huañuna aichayuj runa, alasyu animalcunatapash, sacha animalcunatapash cashna ningui: ‘Tucuicuna tandanajushpa Israel llacta urcu alpacunaman shamuichi. Chaipimi ashtaca gentecunata huañuchishpa cangunaman carasha. Chaipimi aichata micushpa, yahuartapash ufianguichi.

18Ninan shinlli runacunapaj aichata micushpami, llactata mandajcunapaj yahuartapash ufianguichi. Paicunaca, Basán shuti urcupi virayashca jari llamacuna, maltun llamacuna, jari chivocuna, racu huagracuna, jari huagracunashnami canga.

19Cangunaman carangapa Ñuca huañuchishca animalcunapaj virataca, na munangacaman micushpami, yahuartapash na ushangacaman ufianguichi.

20Caballocunatapash, caballopi tiyarij ninan shinlli runacunatapash, macanajuj runacunatapash huañuchishpami micuchun carasha. Chaicunataca, na munangacamanmi micunguichi. Mandaj Jatun Dios Ñucami chashna nini.

21Ñuca ninan ushaita charishcataca tucui llactacunaman ricuchijpimi, chaipi causajcunaca Ñuca maquihuan tucuita ricushpa llaquichishcatapash yachanga.

22Chai punllamandapachami Ñucataca, paicunata Mandaj Taita Dios cajta Israelcunaca yachanga.

23Shuj llactacunapi causajcunaca, Israelcuna Ñucata jariyashpa juchata rurashcamanda prezu apai tucushcatami yachanga. Paicunataca, fiñaj runacunapaj maquipi Ñuca churajpi, tucuilla huañuchi tucushcatapashmi yachanga.

24Paicuna na alicunata rurashpa, Ñucata na cazushpa jariyashcashnallatami llaquichircani. Paicunataca ama ricungapami, Ñuca ñavita shujman churarcani’ ningui” nijurcami.

25Shinamandami Mandaj Jatun Diosca cashna nirca: “Cunanga, Jacobpaj mirai Israelcunataca ninanda llaquishpami, prezu causanajushcamanda llujchimusha. Jucha illaj cashcamandami, Ñucapajlla cachun juyashcata ricuchisha.

26Paicunaca, paicunapaj llactapica, pipash na llaquichijpi imatapash na manllashpa causanajushpami, Ñucata na cazushcata yarishpa ninanda llaquirinajunga.

27Shuj gentecunapaj chaupimanda llujchimushpa, paicunata fiñajcunapaj llactacunamanda tandachimujpi, shuj llactacunapi causajcunapaj ñaupajpi jucha illaj cajta Ñuca ricuchijpimi, chashna llaquirinajunga.

28Shuj llactacunaman prezu apashca cashpapash, paicunapuramandaca shujllatapash na saquishpa tandachishpami, paicunapaj llactapi causachun churasha. Shina rurajpimi Ñucataca, paicunata Mandaj Taita Dios cajta yachanajunga.

29Cunanga, paicunataca napacha saquishachu. Ashtahuangarin Israelcunamanga, Ñuca Espiritutami caramusha” nijunmi Mandaj Jatun Diosca.