ZACARÍAS 2 - Quichua Imbabura 2016

Prezu apai tucushcacunata cayashcamanda

1Jipaman vichai ricushpaca, tupuna cordelta charijuj shuj runatami ricurcani.

2Chai runataca: “¿Maimanda rijungui?” nishpami tapurcani. Shina tapujpimi paica: “Ñucaca, mashna ancho cajta, mashna jatun cajta, Jerusalenda tupushpa ricungapami rijuni” nihuarca.

3Ñucahuan parlajuj ángel llujshimujpimi, shuj angelpash paita tuparingapa llujshirca.

4Tuparingapa llujshijuj angeltami, cashna nirca: “Calpashpa rishpa, chairalla viñai chai runata cashna nigri:

‘Ashtaca gentecuna, ashtaca animalcuna tiyashcamandami,

Jerusalenbica muyundi jatun pircata na rurashpa causanajunga.

5Jerusalendaca, Ñucami rupajuj ninahuan muyundi jatun pircashna jarcasha.

Ñuca ushaita ricuchingapami, paicunahuan causajusha’ nigri” nircami.

6Mandaj Diosca cashnatapashmi nin:

“Uyaichi, janajman tiyajuj llactamandaca llujshishpa calpaichilla.

Ñucami, tucui cai pachaman, caita chaita cacharcani” ninmi Mandaj Diosca.

7Shinallata: “Babilonia llactapi causanajuj Sión pueblomanda gentecunalla,

pacalla llujshishpa richilla” ninmi.

8Tucuita Mandaj Diosca, cashnatapashmi nin:

“Ñucata ninanda alicachishca jipami,

canguna ima charishcacunata quichujcunapaj llactacunaman cachahuanga.

Maijambash cangunata llaquichishpaca, Ñuca ricujuj ñavita tujsijshnami llaquichinga.

9Chaimandami Ñuca maquihuan paicunataca llaquichigrini.

Paicuna imatalla charishcacunataca, paicunapajta rurajcunallatami quichushpa apanajunga.

Shina rurajpimi, tucuita Mandaj Diosllata, canda cachamushcata yachanguichi” ninmi.

10Mandaj Diosca cashnatapashmi nin:

“Sionbi pueblopi causajcunalla, cushijushpa candaichiyari.

Ricuichi Ñucaca, cangunapajman shamushpami, cangunahuan causasha.

11Chai punllapica, ashtaca llactacunamandami Mandaj Dios Ñucapajman tandanajumunga.

Paicunaca, Ñuca agllashcacunami canga,

Ñucapash paicunahuanmi causasha” ninmi.

Chaita ricushpami, tucuita Mandaj Dios Ñucallata,

canda cachamushcata yachangui.

12Mandaj Diosca, jucha illaj llactapimi,

Judá llactapi causajcunataca paipajlla causachun cutin chasquinga.

Jerusalendapashmi cutin agllashpa chasquinga.

13Cai pachapi tucui causajcuna,

Mandaj Diospaj ñaupajpica, upalla caichi.

Paica, Pai causana jucha illaj pushtumandami ña shamujun.