JUECES 21 - Quichua Imbabura 2016

Benjamín ayllumanmi huarmicunata cushca

1Israel runacunaca, Mizpa shuti pueblopimi cashna nishpa juramentushca carca: “Ñucanchimandaca, maijanllapash ñucanchi ushicunataca, Benjamín ayllu runacunapaj huarmi cachunga na cushunllu” nishcami carca.

2Israelcuna, Taita Diospaj huasiman shamushpami, Taita Diospaj ñaupajpi ninanda caparishpa tutayangacaman huacashpa, cashna ninajurca:

3“Israelcunata Mandaj Taita Dioslla, ¿Imashpata Israelpurapica, cashna tucushcayari? ¿Imamandata, Israelpurapica shuj ayllu illaj saquirinchiyari?” ninajurcami.

4Chai cayandi punllapimi, tutamandata jatarishpa, chaipillata shuj altarta ruranajurca. Chai jipami, Diosman animalcunata cushpa tucuillata rupachinajurca. Shinallata Dioshuan ali cangapa shuj ofrendatapashmi cunajurca.

5Chai jipami Israelcunaca, cashna ninajurca: “Tucui Israel ayllupuramandaca, ¿maijan aylluta Mandaj Diospaj ñaupajpi tandanajungapa, na vichai shamushca? Mizpa shuti puebloman, Mandaj Diospajman maijambash na vichai shamujpica: ‘Huañuchishunmi’ nishpami juramenturcanchi” ninajurcami.

6Shinallata tucuilla Israelcunami, paicunapaj huauqui Benjamín ayllumandaca, ninanda llaquirishpa cashna ninajurca: “Cunanga, Israelpuramandaca, shuj ayllumari anchuchi tucushca.

7Ñucanchica, Mandaj Diospaj shutipimi, cashna nishpa juramenturcanchi: ‘Benjamín ayllu runacunapaj huarmi cachunga, ñucanchi ushicunataca na cushunllu’ nircanchimi. Chai huaquin puchushca runacunataca, ¿maijan huarmicunahuanshi cazarachishun?” ninajurcami.

8Cashnatapashmi ninajurca: “Ñucanchi Israel ayllupuramandaca, ¿Mizpa pushtupi, maijan ayllupash Diospajman na shamushpa saquirishcachu?” nishpami tapunajurca. Shina tapushpami, Jabes-Galaad pueblopi causajcunamandaca, shujllapash na shamushcata ricurca.

9Tucuicunata yupajpica, Jabes-Galaad pueblopi causajcunaca, shujllapash na ricurircachu.

10Chaimandami chai tandanajushca gentecunaca, chunga ishcai huaranga ashtahuan shinlli runacunata cashna nishpa cacharca: “Jabes-Galaad pueblopi causajcunataca, huarmicunandi, huahuacunandi, espadahuan huañuchigrichi.

11Ashtahuangarin cashnami rurana canguichi: Tucuilla jaricunatapash, jarihuan ña pacta puñushca tucuilla huarmicunatapash huañuchinallami canguichi” ninajurcami.

12Jabes-Galaad pueblopi causajcunamandaca, chairalla viñai chuscu patsaj cuitsacunatami tandachinajurca. Paicunataca, Canaán llactapi carpacunata shayachishca tiyanajuj Silo shuti pueblomanmi pushamunajurca.

13Chai jipami, tandanajushca tucui Israelcunaca, Rimón shuti jaca rumi ucupi tiyanajuj Benjamín ayllupaj miraicunata, “ama ashtahuan macanajushunchi” nigrichunmi cacharca.

14Shina cachajpimi, Benjamín ayllu runacunaca, Israelcunapajman tigramurca. Paicunataca, Jabes-Galaad pueblopi causajcunata huañuchinajushpa saquishca huarmicunahuanmi cazarachirca. Ashtahuangarin huarmicunaca, tucuicunahuan cazarachingapaca na pactarcachu.

15Israel ayllupuramandaca, Mandaj Diosllata chashna anchuchishcamandami, Israelcunaca, Benjamín ayllutaca ninanda llaquinajurca.

16Shinamandami, tandanajushca Israelcunata mandaj rucucunaca, cashna ninajurca: “Cunanga, chai ayllupuramanda puchushca runacunataca, ¿maijan huarmicunahuanshi cazarachishun? Benjamín ayllu huarmicunaca, huañuchi tucushcamari” ninajurcami.

17Cashnatapashmi ninajurca: “Israel ayllupuramanda shuj ayllullapash ama chingachunga, Benjamín ayllupuramanda puchushca cai runacunallapash, alpata tigrashpa japigrinami.

18Shina cashpapash ñucanchi ushicunataca, napacha paicunahuan cazarachi ushashunllu. Israelcunaca: ‘Benjamín ayllu runacunahuan maijambash cazarachishpaca, jatun llaquitami apanga’ nishpami juramenturcanchi.

19Cunanga, Silo shuti pueblopimi, Mandaj Diosman jatun cushijui punllata huatandi ruranajunchi. Chai puebloca, Bet-el shuti pueblo janajmanmi tiyajun. Bet-el shuti pueblomanda, Siquem shuti puebloman rina ñanmandaca, indi huashajunmanmi tiyajun. Shinallata, Lebona shuti pueblomandaca, uraimanmi” ninajurca.

20Benjamín ayllupaj miraicunataca, cashna nishpami mandanajurca: “Uva chagracunapi pacalla chapagrichi.

21Chaipica, Silo shuti pueblopi causajcunapaj ushicuna tandanajushca tushungapa llujshinajujta, ali ricurianguichi. Ña llujshijpica, pacajushpa tiyanajushca uva tarpushcacunamanda llujshishpa, tucuicuna chai cuitsacunata, cangunapaj cachun shuj shuj shuhuashpa, canguna causanajuj Benjamín llactaman tigranguichilla.

22Canguna shuhuashcamanda, chai cuitsacunapaj taitacuna, na cashpaca turicuna ñucanchita imatapash nij shamujpica, cashnami nishun: ‘Paicunahuan cazarachun saquipaichilla. Ñucanchimi, jatun macanajuiman rishpapash, huarmicunataca na tucuillaman apamushcanchi. Ashtahuangarin, paicunapaj huarmi cachun, na cangunallata cushca cashpami, na juchachi tucunguichi’ nishunllami” ninajurcami.

23Shina nijpimi, Benjamín ayllupaj miraicunaca, paicuna mashna cashcashna, chai pueblopi tushungapa llujshishca cuitsacunataca, shuj shuj shuhuashpa, paicunapaj llactaman tigranajurca. Chai jipami, paicunapaj pueblocunata alichishpa, chaipillata causai callarirca.

24Shinallata, Israelcunaca, tucuicunami chaimandaca paicunapaj ayllupurapajman, paicunapaj huasi ucupura ayllucunapajman, paicunapaj alpacunaman tigranajurca.

25Chai punllacunapica, Israel llactapica jatun mandaj na tiyarcachu. Chaimandami, tucuicuna paicuna munashcata rurashpa causanajurca.