Psalms 55 - Quichua Imbabura 2016

Llaquichi tucujushpa Diosta mañashcamandaCandajcunata mandaj candachijuchun, yachachingapa, Neginot taquipi, David rurashca Salmomi.

1Taita Dioslla,

ñuca mañajujtaca uyahuayari.

Ñuca ninanda mañajujtaca, ricuhuayari.

2Ñuca mañajujtaca, uyashpa tigrachihuayari.

Llaquita apajushpa, caparishpa mañashcata uyahuayari.

3Ñucata fiñaj runa ninanda rimajujpi, mañajupani.

Canda na manllaj runa ninanda llaquichijujpimi mañajupani.

Ñucatami llaquipi churanajun.

Ninanda fiñashpami catiriyanajun.

4Ñuca shungupi llaquihuan cashpami, huañujuni.

Huañuchi tucunata manllaimi, japimuhuashca.

5Manllaihuan chujchunami, japimuhuashca.

Ninan manllaihuanmi chujchurijuni.

6Ñucaca: “¡Palomapaj alasta cuhuashcaman!

Shina cashpaca, maipipash samagrimanllami.

7Carumambacha rishpami pacajugriman.

Jichushca pambapimi causagriman. Selah

8Pacajungapaca uchallami riman.

Shinlli huairahuan tamiamandapash pacajugrimanllami” yajunimi.

9Jatun Dioslla,

paicunataca tucuchipayari.

Paicunapaj rimaitaca pandachipayari.

Pueblopica, ninandapacha llaquichinajujta, fiñanajushpa rimarinajujtami ricurcani.

10Punllapash, tutapashmi, pueblo jatun pirca jahuacunata muyunajun.

Chai pueblopica, jatun na alita ruraj gentecunallami causanajun.

11Jatun na alita ruraj gentecunallami chaipica causanajun.

Plazacunapica, umachishpa quichushpami purinajun.

12Ñucata fiñaj runaca, na pingaichihuarcachu.

Shina cajpica, pingai tucuimanllami carcani.

Ñucata fiñaj runaca, na llaquichihuarcachu.

Shina cajpica, llaquita apaimanllami carcani.

13Ashtahuangarin, ñucapaj ali cumba,

ñucahuan purij, ñuca ayllupurashna cashpapash, canmi chashna rurahuashcangui.

14Ishcandimi, tucuita na pacashpa parlarin carcanchi.

Taita Diospaj huasipipash, pajtami purij carcanchi.

15Paicunataca, cungashcapi huañui japichun.

Seolmambash, causaj urai rinajuchun.

Paicunapaj huasicunapi, jatun na alicunalla tiyashcamanda, chashna tucuchun.

16Ñucaca, Taita Diostami caparishpa mañasha.

Mandaj Diosmi quishpichihuanga.

17Chishipash, tutamandapash, chaupi punllapashmi, caparishpa mañajusha.

Ñuca mañajujtaca, Paimi uyahuanga.

18Huañuchingapa ashtacacuna shamunajujpipash, Paimi huacaichihuanga.

Ashtaca gentecuna llaquichingapa shamunajujpipash, Paimi quishpichihuanga.

19Taita Diosca, ñuca mañashcata uyashpami, paicunataca llaquichinga.

Causaita Causajuj Taita Diosmi, paicunallata ali tucungapa na munajpi llaquichinga.

Taita Diostapash na manllajpimi, chashna llaquichinga. Selah

20Na alita ruraj runaca, paihuan ali causajujcunatapash fiñashpami llaquichirca.

Paihuan ali causangapa ari nishcatapash, na pactachircachu.

21Paipaj shimihuanga, juyailla aligutami rimajun.

Shina cashpapash, paipaj shungupica, macanajunatallami yarijun.

Juyailla ali shimicunata rimajushpapash,

macanajungapa espadata ña llujchishcashnami purijun.

22Llashaj quipishna cambaj llaquita, Mandaj Diospaj maquipi saquijpimi, Paica yanapanga.

Paita catijtaca, urmajpipash jatarichingami.

23Taita Dioslla,

na cazujcunataca chingaita chingaimanmi urai cachangui.

Huañuchijcunapash, umachijcunapash, ashatallami causanga.

Ashtahuangarin ñucaca, canda yariashpami causasha.