1Efraín urcupimi, Micaía shuti shuj runa causarca.
2Chai runami, paipaj mamata cashna nirca:
“Cambaj huaranga shuj patsaj culquita shuhuashcamandaca, imapash tucushpachari ali canman nishpami, ñucaman villahuarcangui. Ricui, chai culquitaca ñucami charijuni, ñucami japircani” nijpimi,
paipaj mamaca: “Ñuca huahualla, candaca Mandaj Dios bendiciachun” nirca.
3Shina nijpimi, huaranga shuj patsaj culquitaca, paipaj mamaman tigrachirca.
Chaimandami paipaj mamaca, cashna nirca: “Ñuca huahualla, napacha llullashpami cashna nini: Cai culquitaca, canmandami Mandaj Diosman shicanyachircani. Chaitaca, tacashpa juyaillata rurashca imamambash rijchaj diosta, yacuyachishpa rurashca diosta rurachunmi shicanyachircani. Chaitaca, cunanga canmanllatami tigrachini” nircami.
4Ashtahuangarin chai culquitaca, cutinmi paipaj mamaman tigrachirca. Paipaj mamaca, ishcai patsaj culquita japishpami, imatapash yacuyachishpa ruraj runaman curca. Chai runami, tacashpa juyaillata rurashca imamambash rijchaj diostapash, culquita yacuyachishca diostapash rurarca. Chaicunataca, Micaía shuti runapaj huasipimi churarca.
5Micaía runaca, rurashcalla dioscunata alicachingapa shuj ucutami charirca. Shinallata, efodtapash, terafín dioscunatapashmi rurachirca. Chashna rurashpaca, paipaj churicunamanda shuj churitami, chai dioscunapaj sacerdote cachun shicanyachirca.
6Chai huatacunapica, Israel llactapi jatun mandaj na tiyajpimi, paicuna munashcata rurashpa causanajurca.
7Judá llacta Belén pueblomanda shamushca, Judá ayllupuramanda, shuj levitapura huambrami chaipi causajurca.
8Chai runaca, maipi causanata mascashpami, Judá llacta Belén pueblomanda llujshishpa shamushca carca. Shina shamushpami, Efraín urcu alpacunaman chayashpa, Micaía runapaj huasiman chayashca carca.
9Chaiman chayajpimi Micaía runaca: “¿Maimandata shamungui?” nishpa tapurca.
Shina tapujpimi, chai levita runaca cashna nirca: “Ñucaca, Judá llacta Belén pueblomandami cani. Maipi causanata tarishcapi causangapami purijuni” nirca.
10Shina nijpimi Micaía runaca, cashna nirca: “Ñuca huasipi saquirilla. Canga, ñuca taitashna cashpami, ñuca sacerdote tucungui. Ñucaca, huatan huatami chunga culquita cusha. Churajunatapash, micunatapash cushami” nirca.
Shina nijpimi, chai levita runaca, chaipi causangapa saquirirca.
11Chai levita runaca, Micaía runahuanga cushijushpami causajurca. Micaía runapaca, churishnami carca.
12Micaía runaca, chai levita runataca, sacerdote cachun churajpimi, chai huambraca, sacerdotecuna ruranata rurashpa, Micaía runapaj huasipi causajurca.
13Micaía runaca, cashnami nirca: “Cunanga, levitapura shuj sacerdoteta charishcamandami, Mandaj Dios bendiciajpi causajusha” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
