EZEQUIEL 36 - Quichua Imbabura 2016

Israel llacta cutin ali tucunamanda

1Huañuna aichayuj runa. Israel llacta urcucuna imalla tucunata cashna nishpa villai: “Israel llactapi tiyaj urcucuna, Mandaj Dios ima nishcata uyaichi” nijurcami.

2Mandaj Jatun Diosca cashnami nirca: “Cangunata fiñajcunaca cashnami ninajurca: ‘Ja jai, causaita causaicaman tiyaj urcucunatapashmi, ñucanchipaj cachun carashca’ ninajurcami.

3Shina cashcamanda ima tucunatapash cashna nishpa villai: Mandaj Jatun Diosca cashnami nin: ‘Cangunataca, tucuilla shamushpami tucuillata tucuchinajurca. Chashna rurajpimi cangunataca shuj llactacuna japinajurca. Cangunataca, gentecuna ninanda na alicachishpa rimai tucuchunmi urmachirca.

4Shina cashcamanda Israel llacta urcucuna, Mandaj Jatun Dios imatalla nishcata uyaichi. Mandaj Jatun Diosca, urcucunata, lomacunata, jatun larca yacucunata, pugru pambacunata, rumi mundunlla saquirishca, tucuilla quichui tucushca, muyundi causajcuna na alicachishca pueblocunataca’, cashnami nin:

5‘Shuj llactapi causajcuna, Edom llactapi causajcunapash, ñuca llactataca ninanda cushijushpami, quichurishpa japinajurca. Chaipi causajcunataca, ninandapacha fiñashpami prezu apanajurca. Shina rurashcamandami, Ñucaca ninandapacha fiñarishpa rimarcani’. Mandaj Jatun Dios Ñucami chashna nini.

6Shina cashcamanda Israel llacta imalla tucunataca, chai llactapi tiyaj urcucunaman, lomacunaman, jatun larca yacucunaman, pugru pambacunamambash cashna nishpa villai: Mandaj Jatun Diosca cashnami nin: ‘Cangunata shuj llactacunapi causajcuna ninanda na alicachishpa rimashcamandami, ninandapacha fiñarishpa paicunataca rimarcani’ nircami.

7Chaimandami Mandaj Jatun Diosca cashna nijurca: ‘Ñuca ninan ushaihuanmi, cambaj muyundi llactacunapi causajcunataca ninanda llaquichisha’ nishpami, juramenturcani.

8‘Ashtahuangarin Israel llactapi tiyaj urcucunaca, Ñuca agllashca Israelcunaman, yuracunata viñachishpa, granocunata fucuchishpa shuyaichilla. Ñallami paicunaca tigramunga.

9Cangunataca Ñucami ricushpa charisha. Shina cajpimi, cutin yapushpa tarpushpa cangunapica causanga.

10Shinallata tucui Israel gentecunataca ashtacatami mirachisha. Shina cajpimi, urmashca pueblocunatapash cutin alichishpa, chaipi causanajunga.

11Cai alpacunapica, gentecuna ninanda mirashpami, punda huatacunatapash yali chaipi causanga. Shinallata, animalcunatapash ninanda bendiciajpimi ashtacapacha miranga. Shina rurajpimi Ñucataca, Mandaj Dios cajta yachanguichi.

12Ñuca agllashca Israelcunami cai alpacunapica purinajunga. Chashnami cai alpacunataca paicunapaj cachun japinajunga, shinallata paicunapaj huahuacunataca cutinga na huañuchishpa tucuchingachu’ nircami.

13Mandaj Jatun Dios Ñucami cashna nini: Cangunataca cashnami ninajun: ‘Runacunata langanshna tucuchij, llactapi causanajuj huahuacunata huañuchijmi canguichi’ ninajunmi.

14‘Shinamandami, runacunataca na ashtahuan tucuchingui. Cambaj llactapi causajcunapaj huahuacunatapash, na huañuchinguichu. Mandaj Jatun Dios Ñucami chashna nini.

15Shuj llactacunapi causajcuna na alicachishpa rimachunga na saquishachu. Shuj llactapi causajcunaca, cutinga na alicachishpa rimangachu. Cambi causaj huahuacunatapash, na huañuchinguichu’ ninmi Mandaj Jatun Diosca” nijurcami.

16Mandaj Diosca cashnatapashmi villahuarca:

17“Huañuna aichayuj runa. Israelcunaca, paicunapaj llactapi causanajushpaca, pandarishpa napacha alita rurashpami mapayachinajurca. Paicuna, Ñuca ñaupajpi na alita rurashpa causashcapash, quilla nanaihuan ungushca huarmi mapayachishcashnami carca.

18Huañuchishpa yahuarta alpapi jichashcamanda, paicunapaj rurashcalla dioscunata mañashpa mapayashcamandami, Ñucaca paicunahuan ninanda fiñarircani.

19Shuj llactacunaman caita chaita cachajpimi, cai pachapica maitapash cachai tucurca. Paicuna imashna causashcashna, paicuna imashna rurashcashnallatami llaquichircani.

20Shuj llactacunaman paicuna chayajpica, Ñuca jucha illaj shutita yangapi churashpami, Israelcunataca cashna ninajurca: ‘Caicunaca, Mandaj Diospaj gentecunami. Diospaj llactamandami llujshimushca’ nishpami rimanajurca.

21Ashtahuangarin paicuna calpachi tucushca llactacunapica, Israelcunata rimashpa, jucha illaj Ñuca shutita yangapi churashpa rimanajujpimi ninanda llaquirircani.

22Shina cashcamanda Israelcunataca cashna ningui: Mandaj Jatun Diosca cashnami nin: ‘Israel gentecunamandaca na imatapash ruranichu. Ashtahuangarin jucha illaj Ñuca shutita canguna chayamushca cai llactacunapi yangapi churashpa rimashcamandami ruragrini.

23Ñuca shutita, shuj llactacunapi cangunamanda yangapi churashcamandami, ashtahuan jatun cajta ricuchigrini. Chai llactacunapi chashna Ñuca shutita ashtahuan jatumbi churashpa ricuchijpimi Mandaj Dios cajta yachanajunga. Mandaj Jatun Dios Ñucami chashna nini.

24Cangunataca Ñucami, shuj llactacunamanda pushamusha. Tucui llactacunamanda tandachishpami, cangunapaj llactamanllata pushamusha.

25Chaipimi cangunapaj jahuapica, mapa illaj yacuta tsirapachisha. Chashna rurajpimi mapata rurashcamandapash, mapa illaj saquiringuichi. Shinallata cangunapaj rurashcalla dioscunata mañashpa mapayashcamandami mapa illajta saquisha.

26Cangunapica, mushuj shunguta, mushuj espiritutami churasha. Cangunamanda rumi shunguta anchuchishpami, aicha shunguta cusha.

27Cangunapica, Ñuca Espiritutami churasha. Chashna cashpami cangunaca, tucui Ñuca mandashca shimicunata pactachishpa causanguichi.

28Shinallata, cangunapaj ñaupa taitacunaman carashca llactapimi causanguichi. Cangunaca, Ñuca agllashcacuna cajpimi, Ñucapash cangunapaj Taita Dios casha.

29Cangunataca, tucui na alicunata ruranamandami jarcashpa charisha. Shinallata, ashtaca trigota carashpami, yarjai punllacunataca cutinga na cachamusha.

30Shuj llactacunapi causajcuna, canguna yarjaihuan cajta ricushpa ama cutin na alicachishpa rimanajuchunmi, quirucunapipash, alpacunapipash ashtacatapacha fucuchisha.

31Shina cajpimi, canguna na cazushpa ima na alicunata rurashcatapash yaringuichi. Shinallata, napacha alicunata cangunallata rurashcamandami ninanda pingai tucunguichi.

32Caitaca, alimi yachana canguichi. Caicunataca, na cangunata llaquichinamanda rurashachu. Canguna na alita rurashcamanda ninanda llaquirichunmi, chashna rurasha’ ninmi” Mandaj Jatun Diosca.

33Mandaj Jatun Diosca cashnami nijurca: “Cangunapaj tucui juchacunata anchuchijui punllallatami, pueblocunapi causachumbash churasha. Shinallata chai urmashca huasicunatapash, cutinmi huasichinguichi.

34Cai llactataca, tucui yalijcunami tucuilla tucuchishcata ricunajurca. Chashna jichushca sirina randica, chai alpacunaca yapushcami canga.

35Chaita ricushpami, cashna ninajunga: ‘Tucuilla tucuchi tucushca alpacunaca, Edén shuti huertashnami tucushca. Jichushca, urmachishpa tucuilla tucuchishca pueblocunatapash huasichishpami, muyundi pircashpa causanajun’ ninajungami.

36Cangunapaj muyundipi tiyaj llactacunapi causajcunaca, tucui urmachishcacunata Ñuca cutin shayachishcatami yachanajunga. Tucuilla tucuchishca alpatapash, Ñuca tarpushcatami yachanajunga. Mandaj Dios Ñucami chashna nini. Chaitaca pactachishami” nijurcami.

37Mandaj Jatun Diosca cashnatapashmi nijurca: “Israelcunaca, Ñucata cutin mañanajungarami. Paicuna mañashcata uyashpami gentecunataca, llamacunata mirachijshnami mirachisha.

38Jatun cushijuita rurana punllacunapi, Jerusalenman apamushca Ñucapajlla llamacunashnami, Israel gentecunaca jichushca pueblocunapica jundanga. Chaita ricushpami Ñucataca, Mandaj Dios cajta yachanajunga” nijurcami.