1Jotam runaca, ishcai chunga picha huatata charishpa mandai callarishpami, Jerusalenbica chunga sucta huatata mandajurca. Paipaj mamaca, Sadoc shuti runapaj ushi, Jerusa shutimi carca.
2Jotam shuti runaca, Mandaj Diospaj ñaupajpica, paipaj taita Uzías alicunata rurashpa causashcashnami alitalla rurajurca. Shina cashpapash, Mandaj Diospaj shicanyachishca ucumanga na yaicurcachu. Ashtahuangarin gentecunaca, na alitallami rurashpa catinajurca.
3Mandaj Diospaj huasipi ashtahuan jatun pungutaca, paimi rurachirca. Jatun pircahuan jarcashca jahuapipash, ashtaca uchilla huasicunatami rurachirca.
4Judá llacta urcucunapipash, pueblocunatami shayachirca. Shinallata, quirucuna shayanajuj pambapipash, jarcana jatun pircacunata, torrecunatapashmi rurachirca.
5Amón llactata jatun mandajhuan macanajushpapash, paimi misharca. Amón llacta gentecunaca, chai huatapica, sucta chunga pusaj quintal culquita, chuscu huaranga chuscu patsaj quintal trigota, chuscu huaranga chuscu patsaj quintal cebadatami cunajurca. Shinallata, cati huatapipash, ishcaipaj cati huatapipash, chashnallatami cunajurca.
6Jotam shuti runaca, paita Mandaj Taita Diosta cazushpa causajushpami, ninan shinlli tucurca.
7Jotam runa imatalla ashtahuan rurashcacunapash, tucui macanajuicunata rurashcapash, pai imashna causashcapash, Israel llactata, Judá llactata jatun mandajcuna imatalla rurashcacunata quilcashca libropimi tiyajun.
8Jotam shuti runaca, ishcai chunga picha huatata charishpa mandai callarishpami, chunga sucta huatata Jerusalenbi mandajurca.
9Pai huañushpa, paipaj ñaupa taitacunahuan tandanajujpica, Davidpaj pueblopimi pambarca. Paipaj randica, Acaz shuti paipaj churimi mandajurca.
Who We AreWhat We EelieveWhat We Do
2025 by iamachristian.org,Inc All rights reserved.
