1Cashnami nircani:
Cunanga, Jacobpaj mirai Israelcunata mandajcunapash,
cati mandajcunapash, caita ali uyanguichi.
Cangunaca, ¿nachu alitalla rurashpa causanataca ali yachana canguichi?
2Cangunaca, alitalla rurashpa causanata na ricunayachishpami, na alitalla rurashpa causangapa munanguichi.
Tullumanda caratapash, aichatapash anchuchinshnami, ñuca llactataca llaquichinguichi.
3Ñuca llacta gentecunataca causata micunshnami, paicunapaj caratapash tucuita lluchujshna llaquichinguichi.
Paicunapaj tullucunatapash faquinshnami, mangapi churashpa yanuna tullucunatashna churanguichi.
Paicunaca, yanuna mangapi tiyajuj aichashnami causanajun.
4Shinamandami, Mandaj Diosta caparishpa mañanajujpipash, Paica napacha tigrachinga.
Ashtahuangarin chai llaqui punllacunapica, Paipaj ñavitaca shujman churashpami na ricunga.
Canguna jatun na alita rurashpa causanajushcamandami, chashna ruranga.
5Ñuca llactapuracunata pandachingapa villaj profetacunataca, Mandaj Diosca cashnami nin:
“Paicunaman, micunata carajpica, ali causaimi tiyanga ninajunmi.
Ashtahuangarin, pipash micunata na carajpica, macanajuimi tiyanga ninajunmi.
6Chaimandami, Diosmanda imata villanatapash na yachashpa tutacunaca na ricui ushanga.
Yachaj tucushpalla villashcapash, yanami tucunga.
Chai profetacunapajca, indipash huashajungami, punllapash yanami tigranga.
7Shinamandami, profetacunapash, yachajcunapash llullapi ricurinajunga.
Paicunaca, Taita Dios nimata na tigrachijpimi, imata nitapash na ushanajunga” ninmi.
8Ashtahuangarin ñucaca, Mandaj Diospaj Espíritu ushaita cujpi, ushaihuan jundami cani.
Paimi, alitalla rurashpa causanatapash, ushaitapash carahuarca.
Chaimandami Jacobpaj mirai Israelcuna na cazushpa juchata rurashcataca, na manllashpa villasha.
9Cunanga, Jacobpaj mirai Israelcunata mandajcunapash,
tucuita ricushpa mandajcunapash, ali uyahuaichi.
Cangunaca, alita ricushpa mandanataca napacha pactachishpami causanguichi,
imata cashpapash na ali yuyaihuanmi mandanguichi.
10Siondaca, gentecunapaj yahuarta jichashca jahuapimi shayachinguichi.
Jerusalendaca, na alitalla rurashpa causajcunapaj chaupipimi shayachinguichi.
11Paicunapaj juezcunaca, imatapash pacalla cujpi japishpami, ima llaquitapash alichinajun.
Paicunapaj sacerdotecunapash, culquimandallami yachachinajun.
Profetacunapash, culquimandallami imatapash villanajun.
Chashna rurashpapash, paicunaca Mandaj Diostaca yariashpami causanajunchi nishpami, cashna ninajun:
“Mandaj Diosca ñucanchihuanmi.
Ima llaquipash, ñucanchitaca na japingachu” ninajunmi.
12Canguna chashna rurashcamandami, Sion lomataca tarpuna alpatashna yapunga.
Jerusalenga, tucuilla tucurishcami saquiringa.
Diospaj huasi tiyajuj lomaca, jichushca lomashna sachamanmi tigranga.
Who We AreWhat We EelieveWhat We Do
2025 by iamachristian.org,Inc All rights reserved.
