EZEQUIEL 21 - Quichua Imbabura 2016

Mandaj Diospaj espadamanda

1Mandaj Diosca cashnami nirca:

2“Huañuna aichayuj runa, Jerusalenman ricushpa, rurashcalla dioscunapaj altarcunatapash, Israel llactatapash ninanda Ñuca llaquichina cashcata villangui” nircami.

3Israel llactataca, cashna ningui: “Mandaj Jatun Diosca, cashnami nin: ‘Candaca ninanda fiñashca cashpami, alita rurajcunatapash na alita rurajcunatapash, Ñuca espadahuan huañuchishpa tucuchigrini.

4Cai llactamanda anchuchingapami, alita rurajcunatapash, na alita rurajcunatapash, tucuchigrini. Ñuca espadahuanmi, uramanda callarishpa, janajcaman tucuicunata huañuchishpa tucuchigrini.

5Chaimandami chaipi causajcunaca, Mandaj Dios Ñucallata, espadahuan llaquichishcata yachanga. Chai espadataca, napacha cutinga alichishachu’ ninmi ningui.

6Huañuna aichayuj runa, cambaj tucui ushaihuanmi ninandapacha llaquirishpa huacana cangui. Tucuicunapaj ñaupajpimi, chashna ninanda huacana cangui.

7Chaita ricushpami: ‘¿Imashpata chashna llaquirishpa huacajungui?’ nishpa tapunga. Shina nijpica: ‘Llaquicuna chayamujpi, tucuicuna llaquirinata yachashpami huacajuni. Shinallata, chai llaquicuna chayamujpica, tucuicunami ushai illaj saquirigrin, shungumandami manllarinajunga, cunguricunapash ninandami chujchunajunga. Chaicunaca ñami pactamugrin’ nishpa villai” nihuarcami Mandaj Diosca.

8Mandaj Diosca cutinmi cashna nihuarca:

9“Huañuna aichayuj runa, cutinmi cashna villana cangui: Mandaj Diosca, cashnami nin:

‘Espadaca, alipacha afilashcami, ña punchapamba tiyajun.

10Cungata fitingapami alichishcalla tiyajun.

Cungata fitishpa punchalla ricuringapami, afilashcalla tiyajun.

¿Ñucapaj churi mandanata yangapi churashcamandaca cushijunachu cani?

11Chai espadataca, huañuchingapami ña maquipi charijun.

Chai espadaca, huañuchij runaman cungapami afilashcalla tiyajun’ ninmi ningui.

12Huañuna aichayuj runa, ninanda caparishpa huacayari.

Chai espadaca, Ñuca agllashca gentecunatapash,

Israel llactata mandajcunatapash llaquichingapami tiyajun.

Chai espadahuanmi, mandajcunatapash,

Ñuca agllashcacunatapash huañuchishpa tucuchinga.

Chashna cashcamanda, cambaj pechotapash huajtarishpa huacailla.

13Cai llaquicunaca, shinllipachamari shamujun.

Chai espada, mandajcunata huañuchishpaca ¿nachu imapash canga?

Na chashnachu, chai espadaca ashacamanllami canga” ninmi, Mandaj Diosca.

14Huañuna aichayuj runa, maquicunatapash huajtarishpa, chai llaquicunata cashna nishpa villangui:

“Chai espadaca, ishcaicaman, quimsacaman huañuchishpa catijungallami.

Cai espadaca, tucuicunata huañuchishpa tucuchijmi.

15Gentecunapash ninanda manllarichun,

huañuicunapash ashtahuan mirachunmi, chai espadataca, tucuicunapaj pungupi churarcani.

Cungapi fitingapami alipacha afilashca punchapamba tiyajun.

16¡Alimambash cuchungallami, lluquimambash chugrichingallami, maiman cashpapash llaquichingallami!

17Maquita huajtarishpa cushijushpami. Ñuca fiñarishcataca yalichisha,

Mandaj Dios Ñucami, chashna nijun nishpa villangui” nihuarcami.

18Mandaj Diosca cashnatapashmi nihuarca:

19“Huañuna aichayuj runa, Babilonia llactata mandaj llaquichij shamuchunga, ishcai ñandami rurana cangui. Chai llactamandallata, ishcandi ñanda llujshimuchunmi chashna rurana cangui. Maijan puebloman chayana cajpipash, ñan callaripillatami shuj villanata churana cangui.

20Llaquichingapa shamujuj espadamanga, shuj ñanga, amonita gentecunapaj, Rabá shuti puebloman ringapa, caishuj ñanga, Judá llactapi muyundi pircacuna tiyajuj Jerusalén puebloman, ringapami canga.

21Babilonia llactata mandajca, ishcai ñan callaripimi, maita rinata yachangapa shuyajun. Paica, flechacunatapash uriajuchishpami, rurashcalla dioscunatapash tapushpa, animalcunapaj yana shungupi ricushpa, maita rinata yachajun.

22Ali maquiman ñanda rinata yachashpami, paica Jerusalenbi huañuchi callaringapa rirca. Chaipica, macanajuita callarishpa caparingapa, pungucunata faquingapa, muyundi jarcarinacunata churangapa, torrecunata shayachingapami, chaiman rirca.

23Jerusalenbi causajcunapajca, llullashpa villajunshnami uyaringa. Paicunataca, na llaquichishunllu nishpami juramentushca carca. Ashtahuangarin, paicuna na alita rurashcamandami, prezu apanga” nihuarcami.

24Chaimandami Mandaj Diosca, cashna nirca: “Canguna na alita rurashcataca napacha cungashachu. Canguna juchata rurashpa causashcacunaca, ricunallami tiyajun. Chaimandami cangunataca prezu apachun, cangunata fiñajcunapaj maquipi churarcani.

25Israel llactata mandaj runalla, canga, Ñucata na cazuj runami cangui. Chaimandami canda llaquichina punllacunaca ña pactamurca. Na alita rurajushcamanda tucuchina punllami ña pactamushca” ninmi.

26Mandaj Diosca, cashnami nin: “Mandangapa Umapi churajuna tiara nishcatapash, coronatapash anchuchilla. Cunamandaca na ashtahuan churajunguichu. Yangalla runacuna jatunyachi tucujpimi, jatun mandajcunaca, pingai tucunga.

27Caipi ima tiyashcacunata tucuilla tucuchijpimi, imapash illaj saquiringa. Shuj mandaj, mandangapa shamushpa tiyarijpimi, pai tucuita ricushpa mandajuchun cusha” ninmi.

Amonita gentecunata llaquichinata villashcamanda

28Huañuna aichayuj runa, cashna nishpa villai: Mandaj Diosca, amonita gentecuna na alita rurashpa causashcamandami cashna nin: “Cangunata cungata fitingapa, espadata alichishcamanda, ña llujchishcallami tiyajun. Tucuillata huañuchingapami espadaca, punchapamba afilashca tiyajun.

29Cangunapaj profetacunapash, llullashpa villajcunapash, yangami ñucanchimi yachanchi nishpa villanajun. Na alita rurashpa causashcamanda, llaquichina punllacunami ña pactamushca.

30Chai espadataca, ¿cutin alichingachu? Canguna viñashca pushtupi, maipi causashca llactapillatami llaquichishpa tucuchisha.

31Ñuca ninanda fiñarishpami, cangunataca llaquichishpa tucuchisha. Cangunata tucuchingapami, alipacha macanajuj runacunata cachamushpa tucuchisha.

32Cangunaca, rupanalla jupashnami canguichi. Cai llactapica, cangunapaj yahuar jicharishpami quilpanga. Canguna causashcataca, pipash na yaringachu. Chaitaca Mandaj Dios Ñucami nini” nircami.