MATEO 7 - Quichua Imbabura 2016

Pitapash na juchachishpa rimanalla cashcamanda(Luc. 6:37-38,41-42)

1Pitapash, ama chashnapachami ninguillachu, chaimi candapash na chashnallata ninga.

2Chashnapachami nishpa can imashnami llaquichingui, chashnallatami candapash llaquichinga. Shujcunata imata rurajpipash chashnallatami cangunamambash Diosca tigrachinga.

3Cambaj huauquipaj ñavipi uchilla jupa tiyajujtara ricungapa randica, ¿imashpata cambaj ñavipi caspi tiyajujtara, na tigrashpa ricungui?

4Cambaj ñavipi shuj jatun caspi tiyajujtara nara anchuchishpaca, ¿imashnata cambaj huauquipaj ñavipi uchilla jupa tiyajujtara anchuchi ushanguiyari?

5Mishqui shimi, jayaj shungumi cangui. Cambaj ñavipi jatun caspi tiyajujtara anchuchiyari. Chai jipami, cambaj huauquipaj ñavipi uchilla jupa tiyajujtaca, ali ricushpa anchuchi ushangui.

6Imapash Diospajlla cajtaca, na alcucunaman caranachu canguichi. Cangunapaj juyailla perlacunatapash, na cuchicunaman shitanachu canguichi. Pactarallapash sarushpa ñutushpa tucuchinman.

Diosta mañanata yachachishcamanda(Luc. 11:9-13; 6:31)

7Diosta mañaichi, Paica carangallami. Mascaichi, taringuichimi. Punguta huajtachinguichi, Paica pascangallami.

8Diosta tucui mañajcunaca japingami, mascajpash taringami, punguta huajtachishpapash pascajpi yaicungami.

9¿Maijanshi, tandaguta huahua mañajpica, rumita caranguichiman?

10Na cashpaca, pijita mañajpica, ¿culebrata caranguichiman?

11Cangunaca, na alicuna cashpapash, huahuacuna mañajpica imatapash aligutami caranata yachanguichi. Jahua pachapi cangunapaj Taitacarin, Paita mañajcunamanga, ¿nachu ashtaca alicunata caranman?

12Shuj gentecuna imatapash aliguta cangunaman rurachun munashpaca, chashnallatami cangunapash shujcunaman aliguta rurana canguichi. Mandashca shimipipash, profetacuna villashca shimipipash chashnallatami mandajun.

Quichiji punguta yaicunatami, Jesusca yachachishca(Luc. 13:24)

13Quichiji pungutami, yaicuna canguichi. Chingaita chingaiman pushajuj punguca anchomi, ñambash anchomi. Chaitaca, ashtaca gentecunami yaicushpa rinajun.

14Ashtahuangarin causaita causangapa yaicuna punguca quichijimi, ñambash quichijimi. Shina cajpimi, huaquingunalla tarinajun.

“Ali fucuj yuratapash, na ali fucuj yuratapash rijsinallami” nishcami(Luc. 6:43-44)

15Llullashpa villaj profetacunamandaca, anchurinami canguichi. Paicunaca, llamashna ali ricurishpapash, shungu ucupica shuhuanata yachaj millai atujcunashnami.

16Ima cajpipash grano fucushcata ricushpami rijsi ushanguichi. ¿Uvacunataca, casha yuramandachu pallan? Na cashpaca, ¿higocunatapash cashapi fucushcatachu pallan?

17Tucui ali yurapica, juyaillami fucun. Ashtahuangarin na ali yurapica, ima alipash na fucunllu.

18Ali yurapica, imapash na alica na fucunllu. Shinallata, na ali yurapipash ima alipash na fucunllu.

19Na ali fucuj yuracunataca tucuillami cuchushpa ninapi shitan.

20Shina cashcamanda, paicuna imata rurajta ricushpami rijsi ushanguichi.

Cangunataca na rijsinichu ninamanda(Luc. 13:25-27)

21Ñucata: ‘Apunchi Jesús, Apunchi Jesús’ ninajushpapash, jahua pachapi Dios mandajuj llactamanga, na tucuicuna yaicui ushangachu. Ashtahuangarin, jahua pachapi Ñuca Taita munashcata pactachijcunallami, yaicui ushanga.

22Chai punllapica, ashtacacunami: ‘Apunchi Jesús, Apunchi Jesús, ¿nachu Cambaj shutipi villanajurcanchi? ¿nachu Cambaj shutipi, ayacunatapash llujchishpa cacharcanchi? ¿nachu Cambaj shutipi, imagutapash rurashpa ricuchircanchi?’ ninajuhuangami.

23Shina ninajujpimi: ‘Cangunataca napacha rijsinichu. Caimanda anchurichi na alita rurajcuna’ nisha.

Shinlli alpapi, amujlla alpapi huasichishcamanda(Luc. 6:47-49; Mar. 1:22)

24Ñuca yachachishca cai shimicunata uyashpa, cazuj runataca, aligutapacha yarishpa paipaj huasitaca, rumi jahuapi huasichij runahuanmi chimbapurasha.

25Ninanda tamiashpa, yacu jatarishpa, ninan huaira jatarishpa chai huasita huajtamujpipash, rumi jahuapi huasichishca cashcamandaca, na urmarcachu.

26Ashtahuangarin, maijan cashpapash, Ñuca yachachishca cai shimicunata uyashpapash na cazuj runataca, t'iyu alpapi huasichij, juizu illaj runahuanmi chimbapurasha.

27Ninanda tamiashpa, yacu jatarishpa, ninan huaira jatarishpa chai huasita huajtamujpica, urmashpa tucuilla tucurircallami” nircami.

28Jesús chashna rimajta uyashca jipami, gentecunaca, Pai yachachishcata uyashpa ninanda manllarinajurca.

29Ninan ushaihuan yachachijujpi, mandashca Shimita yachachijcunashnaca na yachachijujpimi, chashna manllarishpa uyanajurca.