PROVERBIOS 24 - Quichua Imbabura 2016

1Na alita rurashpa causajcunataca, amapacha catinguichu.

Paicunahuanga purinatapash na munanachu cangui.

2Paicunaca, shuhuanatallami yarinajun.

Shimihuambash, na alitallami rimanajun.

3Alipacha yachajushca cashpami,

huasi ucupurataca aliguta pushai ushanga.

Aligutapacha yarishpa causashpami, aliguta pushai ushanga.

4Ali yachajushca cashpami, huasi ucupipash tucuita charinga.

Tucui ima charishcacunapash juyaillagumi canga.

5Ninan shinlli canapaj randica, ali yachajushca canami ashtahuan ali.

Shinlli runa canapaj randica, tucuita yachajushca canami ashtahuan ali.

6Macanajuiman ringapapash, alipacha yachajushpami rina cangui.

Ali yachajushcacuna yuyaita cushpami, jatun macanajuitaca mishachinga.

7Juizu illaj runapaca, ali yachaica na pactai ushanallami ricurin.

Pueblo pungupi tandanajuipica, paica na imatapash rimai ushangachu.

8Llaquichina munaihuanlla purijuj runataca,

caica na ali runami ninajungami.

9Juizu illaj runaca, juchatallami rurangapa munan.

Na cazushpa asij runataca, tucuicunami na ricuyanachin.

10Llaquicuna shamujpi, na mishai ushaj runaca,

imapapash na ushaita charishcatami ricuchin.

11Huañuiman rinajujcunataca, cacharichinami cangui.

Huañuchi tucunalla causanajujcunatapash, quishpichinami cangui.

12Chaitaca: Napacha yachashpami causashcanchi ninajunguichimi.

Shina cajpipash, tucuicunapaj shunguta ricujuj Diosca, ¿nachu yachanga?

Cambaj causaita ricujuj Diosmi tucuita yachan.

Shina cashpami, imata rurashpa causashcamandaca, cuna cashcata cunga.

13Ñuca huahualla, balun mishquita japishpa micuilla, chaica aligumari.

Balun mishquica, cambaj shimipica mishquillagumi canga.

14Ali yachajunaca, cambaj causaipajca, chashna alimi canga.

Ali yachajunata chasquishpaca, ali causaitami charingui.

Can imata shuyajushcapash, na yanga cangachu.

15Na ali runacuna,

alitalla ruraj runapaj huasitaca na llaquichinachu canguichi.

Paipaj huasipi ima tiyashcatapash, na shuhuanachu canguichi.

16Alitalla ruraj runaca, canchiscaman urmashpapash, cutin jataringallami.

Ashtahuangarin, Diosta na cazuj runaca, napacha jatari ushangachu.

17Canda fiñaj runa llaquipi urmajpica, ama cushijunguichu.

Ninandapacha pandarijpipash, ama cushijunguichu.

18Mandaj Dios, chaita ricushpara canda na alicachinman.

Na ali runata fiñarishpa llaquichijushcatapash, saquinman.

19Na alita rurajcunahuanga, ama tandanajunguichu.

Diosta na cazuj runacunashna cangapaca amapacha munanguichu.

20Na ali runacunaca, jipamanga llaquichi tucungapachami.

Diosta na cazujcunaca, michata huañuchishcashnami tucunga.

21Ñuca huahualla,

Mandaj Diostapash, jatun mandajtapash cazushpa causangui.

Na cazujcunahuanga, ama tandanajunguichu.

22Paicunataca, cungashcapimi llaquicuna japinga.

Diospash, jatun mandajpash llaquichinataca, ¿pita yachangayari?

23Caicunapash, ali yachajushcacuna rimashca shimicunami:

Imata alichina cajpipash,

ñavita ricushpalla, shujmanlla alita ruranaca napacha alichu.

24Na alita ruraj runatara: “Alimi cangui” nij runataca,

tucui gentecunami napacha ricunayachinga.

Shuj llactacunapi causajcunapashmi na ricunayachinga.

25Ashtahuangarin, na alita ruraj runata shinllita rimajcunaca, cushijuitami charinga.

Paicunaca, ninanda bendiciai tucushcami canga.

26Na llullashpa tigrachijcunataca,

ninandami alicachina canga.

27Pundaca, alpatarami alichina cangui.

Chai jipaca, tarpungapami shayarina cangui.

Chashna rurashca jipami, cambaj huasitaca shayachina cangui.

28Ama pitapash yangamanda juchachinguichu.

Cambaj shimihuambash, ama yangata rimanguichu.

29Canga: “Paitapash shinallatami rurasha.

Pai imashna llaquichishcashnami paitapash llaquichisha” nishpaca ama ninguichu.

30Imatapash na rurangapa munaj runapaj alpatami yalijurcani.

Shinallata, na ali yachajushca runapaj uva chagratapashmi yalijurcani.

31Tucui chai pambapica, cashacunalla jundami carca.

Shinallata, tucui chai pambapica, tsinicunalla jundashcami carca.

Chai pamba muyundita jarcashca pircacunapash,

urmashpa tucurishcami carca.

32Chaita ricushpami, ñuca shungupi yarijurcani.

Chaita ricushpami, caita yachajurcani:

33“Ashata puñushca jipa, tigrarishpa cutin puñujujpi,

maquitapash saunashpa cutin puñujujpillatami,

34imapash llaquicuna japij shamunga.

Imapash illaj saquirinapash, shinlli runa shamujshnami chayamunga” yajurcanimi.