MIQUEAS 4 - Quichua Imbabura 2016

Mandaj Dios tucuita mandanamanda(Isa. 2:1-4)

1Tucurimui punllacunapica, Mandaj Diospaj huasi tiyajuj lomaca, tucui lomacunapaj umashnami canga.

Tucuicunata yali ashtahuan jatunbi churai tucushcami canga.

Chaimandami, tucui pueblocunamanda chaiman shamunajunga.

2Ashtaca llactacunamanda shamushpami, cashna ninajunga:

“Mandaj Dios causajuj urcuman rishunchi, Jacobpaj Taita Diospaj huasiman jacuchi.

Chaipica, ali ñanda purinatami yachachinga.

Shina yachachijpimi, ali ñambi purishun” ninajungami.

Sión pueblomandami, mandashca shimicunaca llujshinga.

Jerusalenmandaca, Mandaj Dios rimashca shimicunami llujshinga.

3Paimi, pueblocunapi causaj gentecunataca imashna cashcata ricushpa llaquichijunga.

Ninan ushaita charij llactacunatapash, carucunapi causajcunatapashmi, chashnallata llaquichinajunga.

Chaimandami espadacunata, azadonda ruranajunga.

Lanzacunataca, hocescunata ruranajunga.

Shuj llactahuan, caishuj llactahuan fiñanajushpa, espadahuan macanajunapash na tiyangachu.

Macanajunaman llujshinapash na tiyangachu.

4Tucuicunami paicunapaj uva yura, higo yura ucupi tiyarishpa samanajunga.

Chaipica, pipash na manllachingachu.

Caitaca, tucuita Mandaj Diosllatami villarca.

5Tucui gentecuna, paicunapaj diospaj shutipi mañashpa purinajujpipash,

ñucanchica, ñucanchita Mandaj Taita Diostami, causaita causaicaman cazushpa purinajushun.

Israelcunata, prezu causanajujpi cacharichishcamanda

6Mandaj Diosca, cashnami nin:

“Chai punllapimi suchutapash, chingashca purijujtapash,

Ñucallata llaquichishcatapash tandachisha.

7Shina tandachishpami, suchucunaca Ñucapajlla saquirichun churasha.

Chingashcacunatapash, jatun shinlli llactata rurasha.

Mandaj Diosca, chai punllamandapachami Sión lomapica, causaita causaicaman paicunataca mandajunga.

8Llamacuna shayana jatun torrella, canga Sión pueblopi causajcunapaj shinlli torreshnami cangui.

Jerusalenbi causajcunata mandanataca, canllatami punda mandashcashnallata japingui” ninmi.

9¿Imashpata cunanga, ninanda caparijungui?

¿Nachu jatun mandajta charingui?

¿Yuyaita cujchu huañurca?

Unguna nanaihuan ninanda caparijuj huarmishnami caparijungui.

10Sión pueblopi causajcunalla, huahuata unguna nanaihuan caparijuj huarmishna, ninanda caparishpa huacailla.

Cai pueblomanda llujshishpami, pambapi causagringui.

Chai jipaca, Babilonia llactamanmi chayangui, chaipimi quishpiringui.

Chaipimi Mandaj Diosca, cangunata fiñajcunamandapash quishpichinga.

11Cunanga, ashtaca llactacunapi causajcunami, canda llaquichingapa tandanajushca.

Paicunaca: “Sión pueblo yangapi churai tucushcataca, ñucanchi ñavihuambacha ricungapami munanchi” ninajunmi.

12Ashtahuangarin paicunaca, Mandaj Dios imata yarijushcataca na yachashpami,

Pai ali yuyaita cushcatapash na yachai ushanajurca.

Chaimandami, gavillacunata trillana pambapi tandachijshna tandachirca.

13Taita Diosca: “Sión pueblopi causajcunalla, jatarishpa trillajshnami tucuchina canguichi.

Cangunamanga, jirru cachutashna, bronce sillucunatashnami cusha.

Shina cajpimi, ashtaca pueblocunata ñutushpa tucuchinguichi.

Paicunata macanajushpa quichushcacunataca, Mandaj Diosmanmi cuna canguichi.

Imata charishcacunatapash, tucui cai pachata Mandaj Jatun Diospajlla cachun, Paimanmi cuna canguichi.