MIQUEAS 7 - Quichua Imbabura 2016

Israelcuna, na alitapacha ruranajushcamanda

1¡Aij ñucalla!

Fucushca granocunata tandachishca jipa, pallajushpa purijunshnami cani.

Uvacunata pallashca jipa, pallajujshnami cani.

Chashna mascajushpaca, imatallapash na tarircanichu.

Ñucaca, punda fucushca granota micungapami munarcani.

2Cai alpapica, pitapash llaquishpa causajca na tiyanllu.

Ali shunguta charijcunaca pipash na tiyanllu.

Tucuicunami, huañuchingapa pacalla chapanajun.

Linllita churashpa urmachijshnami, paicunapaj huauquitallata llaquichinajun.

3Mandajcunaca, culquita japishpami shujcunapajlla alita ruranajun.

Juezcunapash culquita japishpami, chashnallata shujcunapajlla alita rurajun.

Ushaita charij runacunapash, paicuna munashcatalla rimashpami, tucuita japinajun.

4Paicunamanda, alita ruraj runapash cashashnami.

Alitalla ruraj runapash, zarza casha yurashnami.

Paicunata llaquichina punllapash, profetacuna villashcashnami pactamujun.

Chai punllapica, imata ruraitapash na ushangachu.

5Cangunapaj cumba imata nijpipash, na crinallachu canguichi.

Mandajtapash, alitami ruranga yashpaca na causanachu canguichi.

Cambaj huarmimambash, imatapash na yangata villanallachu canguichi.

6Churipash, taitata na cazunllu.

Ushipash, mamata na cazunllu.

Jachumbash, suegrata na ricunayachinllu.

Fiñajcunaca, huasi ucupurapillatami tiyan.

7Ashtahuangarin ñucaca, Mandaj Diospillami shuyasha.

Ñucata quishpichij Taita Diostallami shuyasha.

Ñuca Taita Diosmi, ñuca mañajujtaca uyahuanga.

Mandaj Diosmi, Pai agllashca gentecunataca quishpichinga

8Ñucata fiñaj llactalla,

ñucamandaca ama cushijuichu.

Ñucaca urmashca cashpapash, jatarishallami.

Yana yana tutapishna causajujpipash, Mandaj Diosmi ñucata punchayachinga.

9Manda Dios llaquichishcataca, chasquishallami.

Mandaj Diostaca, juchata rurashpami fiñachishcani.

Ñuca na alita rurashcamanda, Pai llaquichishcataca chasquinallami cani.

Paimi, ñucataca quishpichishpa cushichihuanga.

10Ñucata fiñajcuna chaita ricushpaca, ninanda fiñarishpami pingai tucunga.

Chai llacta gentecunaca: “¿Canda Mandaj Taita Diosca maipitayari?” ninmi carca.

Ashtahuangarin cunanga, paita ñambi turuta sarujshna llaquichijujtaca, ñuca ñavihuambachami ricusha.

11Jerusalenbi, muyundi jatun pircacuna urmashcata alichina punllacunami chayamujun.

Chai punllapimi, cambaj mujundapash ashtahuan canllaman suchuchijpi mirangui.

12Shuj pueblocunamanda gentecuna, canda ricungapa shamuna punllacunami ña chayamujun.

Asiria llactamanda, Egipto llactamandami shamunajunga.

Nilo jatun yacumanda, Éufrates jatun yacumandapashmi shamunajunga.

Mama cuchamanda, caishuj mama cuchacaman,

caishuj urcumanda, chaishuj urcucaman causaj gentecunami shamunajunga.

13Chai gentecuna, jatun na alitalla rurashcamandami, chai llactacunaca llaquichi tucunga.

Mandaj Dios, Israelcunata ninanda llaquinamanda

14Can agllashca Israelcunataca, Cambaj tauna caspihuan michipailla.

Cambajlla cachun agllashca llamacunataca ricushpa pushapailla.

Paicunaca, urcupimi pipash na ricujpi causanajun.

Yuracunalla jundashca pushtucunapimi chingashcashna purinajun.

Punda huatacunashna, Basán shuti, Galaad shuti urcu jihuacunaman pushapayari.

15Pipash na rurai ushanallacunata rurashpa ricuchipailla.

Egiptomanda llujchimui punllacunapi, imashna rurashcata rurapailla.

16Can tucui ushaita charishcataca, shuj llactacunapi causajcuna ricushpami manllarinajunga.

Chashna manllarishpami, imatapash na uyai ushashpa, rimaitapash na ushanajunga.

17Chai llactacunaca, culebracunashnami ñutu alpata lambinajunga.

Culebracunashnami manllarishpa utujupi chujchunajunga.

Paicunaca, ñucanchita Mandaj Taita Diospajmanmi, manllaihuan chujchushpa tigrarinajunga.

Can llaquichinata manllashpami, chashna ruranajunga.

18Taita Dioslla, Canshnalla shuj Diosca, ¿pita tiyangayari?

Can agllashcacunamanda puchushca gentecuna na alita rurashcata perdonaj Diosmi capangui.

Paicunapaj juchacunata perdonashpami, na causaita causaicamanga fiñaringui.

Canga, ninan llaquij cashpami chashna perdonangui.

19Ñucanchitaca cutinllata llaquihuayari.

Ñucanchi ima na alita rurashcataca pambashpa saquipayari.

Ñucanchi juchacunatapash, mama cucha ucu ucuman shitapayari.

20Ñucanchi ñaupa taita Jacobman, taita Abrahamman,

llaquishapachami nishpa juramentushcataca pactachipayari.