HEBREOS 12 - Quichua Imbabura 2016

Jesusta ricuriajshna catinamanda

1Shinamandami, Diosta ali crijcuna cashcata ricuchijcunataca ñucanchi muyundipi ashtacacunata charinchi. Ñucanchita pandachishpa, juchata rurachingapa munajujtaca anchuchinami canchi. Ñucanchi maiman chayagrinata ricushpami, na ñapash fiñarishpa ñaupajman calpajshna catina canchi.

2Crinata callarichij, tucuita pactachij Jesusta ricushpami catina canchi. Ashtahuan ninan cushijuita japinata yachashpami, llaquichi tucunataca yangapi churashpa, llaquita apashpa Paica cruzpi huañurca. Cunanga, Taita Dios mandashpa tiyajuj ali maquimanmi tiyajun.

3Juchayu runacuna ninanda llaquichijpi, ninan llaquita apaj Jesustami yarina canguichi. Cangunapaj yuyaipica, na shaijushpa, shinlli tucushpami catina canguichi.

4Cangunaca, juchata ama rurangapa jarcarinajushpapash, huañuchi tucungacaman llaquitaca nara apashcachu canguichi.

5Diosca, Paipaj huahuacuna cajpi, cangunata shinllita rimashcataca ñami cungashcanguichi. Paica cashnami nijurca:

“Ñuca huahualla,

Jatun Dios llaquichishpa yachachishcataca, ama yangapi churanguichu.

Shinllita Pai rimajpipash, na shaijunachu cangui.

6Jatun Diosca juyashpami, pita cashpapash llaquichishpa yachachin.

Shinallata, Paipaj huahua cajpimi,

Pai chasquishcacunataca tucuicunata astin” nijurcami.

7Dios llaquichishpa yachachishcata chasquishpaca Taita Diospaj huahuacunami canguichi. ¿Maijan taitata, churitaca na llaquichishpa yachachinga?

8Canguna na alita rurajpipash na llaquichishpa yachachijpica, napacha taitapaj huahuacunachu canguichi. Ashtahuangarin, shuj taitapaj huahuacunami canguichi.

9Ñucanchica cai pachapica, llaquichishpa yachachij taitatami charircanchi. Astijpica, cazushpami causarcanchi. Shina cashpaca, jahua pachamanda ñucanchi Taitatacarin, ¿nachu ashtahuan aliguta cazuna canchi? Shina rurashpami causaita causagrinata charishun.

10Ñucanchi taitacunaca, asha punllacunatallami paicunapi imashna ali canata ricushpa llaquichishpa yachachin carca. Ashtahuangarin Diosca, ñucanchipaj ali cachun, Paishnalla jucha illaj cachunmi, ñucanchitaca chashna yachachijun.

11Na llullashpami, cashna ninchi. Cunanbi imashna llaquichishpa yachachijujpipash na cushijui ushashpami llaquirinchi. Ashtahuangarin, chai yachachishcacunata ali chasquishpa cazushpaca, alitalla rurashpa causangapami juyailla causaiguta japinchi.

Taita Dios juyajujta na chasquijcunaca, llaquichi tucungami

12Shinamandami, cangunapaj shaijushca maquicunatapash, na cuyuri ushajuj chaquicunatapash shinlliyachijshna aliguta catina canguichi.

13Canguna purina chaqui ñangunataca, alichinami canguichi. Jangacuna ñanmanda llujshishpa ama ashtahuan llaquita apachunmi, chashna alichina canguichi.

14Tucuicunahuan aliguta causaichi. Shinallata, Diospajlla causaichi. Pipash na chashna causashpaca, Jatun Diostaca napacha ricungachu.

15Aliguta ricushpa catinguichi. Taita Dios ninanda juyajujtara, pactarallapash maijambash saquinman. Chashna rurashpara, shungupi fiñanajui ninanda sapiyashpa cangunata pandachinman. Shinallata, ashtahuan shujcunapash, chai llaquihuanllata pandarinman.

16Pactara cangunapurapi maijambash huainayaj, na cashpaca Esaú runashna Diosta yangapi churashpa causajra tiyanman. Esaú runaca, punda churi cashpa, ashtacata japinata charishpapash, shuj asha micunapajllami jaturca.

17Chaitaca yachanguichimi. Taitapaj bendicionda japingapa munajpipash, paimanga na cushcachu. Chaita japingapa ninanda llaquirishpa huacajujpipash, na cutin tigrachi usharcachu.

18Israelcuna chayashpa tacarinalla urcumambash, cangunaca na chayai ushashcachu canguichi. Chai urcuca, nina rupajuj, ninanda yanayajuj, ninan huairahuan tamiajuj yana urcumi carca.

19Chaipimi, trompeta huacajujpash, Dios rimajujpash, ninanda uyarijpi, chaita uyajcunaca, ama ashtahuan rimashpa catichun mañanajurca.

20“Ima animalpash, quimirishpa urcuta tacarishpaca, rumihuan cashpa, tucsishpa huañuchinahuan cashpapash huañuchinami” nishpami, Diosca mandajurca. Chaita na uyai ushashpami shina ninajurca.

21Ninan manllanayai ricurijujpimi, Moisesca: “Ninanda manllarishpami chujchujuni” nirca.

22Ashtahuangarin cangunaca, Sion urcumambash, causajuj Taita Diospaj jahua pachapi tiyajuj Jerusalenmambash, huaranga huaranga angelcuna tiyanajunpaj ñaupajmambash quimirishcami canguichi.

23Jahua pachapi tiyaj libropi shuticunata quilcashca, punda huacharishca tandanajushcacunaman quimirishcami canguichi. Tucuicuna imata rurashcata ricuchij Taita Diospaj ñaupajmambash, alitalla rurajcuna, ima pandapash illaj espiritupajmambash quimirishcami canguichi.

24Mushuj “ari nishcata” pactachij Jesuspaj ñaupajmambash, Pai ñucanchimanda jichashca yahuarmambash quimirishcami canguichi. Paipaj yahuarmi, Abel shuti runapaj yahuartapash yali ushaita charin.

25Dios rimashcataca na yangapi churanachu canguichi. Cai pachapi shinlli tacurinajujta yangapi churajcunapash, ninanda llaquichi tucunamandaca na quishpirircachu. Jahua pachamanda shinlli tacurijujta yangapi churashpacarin, napacha quishpiri usharingachu.

26Alpa mamapash cuyujta rimaj Diosmi cunanga cashnatapacha nijun: “Cutin cuyuchisharami. Na cai pachatalla cuyuchishachu, ashtahuangarin jahua pachandimi cuyuchisha” nijunmi.

27“Cutin cuyuchishami” nishpaca, cuyurinalla tiyajcunata anchuchishpa, na cuyurinalla tiyajcunataca saquinatami chashna nijun.

28Na cuyurinalla llactata chasquishca cashpami, Diosta pashi nishpa, tucui shunguhuan manllashpa, Taita Diospajta rurashpa catina canchi.

29Ñucanchi Taita Diosca, ninashna rupachishpa tucuchijmi.