1Canga, Leviatán animaltaca, ¿anzuelohuanlla llujchi ushanguimanllu?
Na cashpaca, ¿paipaj jallupi huascahuan huatai ushanguimanllu?
2¿Paipaj singapipash, cabiata yalichi ushanguimanllu?
¿Garfio jirruhuan, quijadata utujui ushanguimanllu?
3¿Paica, can ama llaquichijuchun, cutin cutin mañanmanllu?
¿Candaca, llaquihuai nishpa mañanmanllu?
4¿Paica, tucui causaipi cambajta rurashpa causangapa, ari ninmanllu?
5¿Paihuanga, alasyu animalhuanshna pujllai ushanguimanllu?
Na cashpaca, ¿cambaj ushicuna pujllachun, huatashpa saquinguimanllu?
6¿Paitaca, cumbapuracuna jatun micuita rurashpa micungachu?
¿Paitaca, jatushpa randijpura chaupiri ushangachu?
7¿Paipaj carataca, cuchillohuan cuchunguimanllachu?
¿Na cashpaca, paipaj umataca, pijita tujsishpa japina jirruhuan tujsinguimanllu?
8Paitaca, can ushashpaca, cambaj maquihuan japigriyari.
Canga, paihuan macanajushcataca, napacha cungashpami causangui.
9Paitaca napacha maijambash japi ushangachu.
Paitaca, ricushpallatami manllarishpa urmanga.
10Paita rijchachij runaca, napacha tiyanllu.
Ñuca ñaupapicarin, ¿pita shayari ushangayari?
11¿Pita tigrachihuachun yashpa, imata cashpapash carahuashcanga?
Cai pachapi ima tiyashcapash, Ñucapajllami.
12Na upalla saquirishpami, pai imashna cajtaca villagrini.
Paipaj ninan ushaitapash, pai jatun cashcatapashmi villagrini.
13¿Pita paipaj vijsa carataca, cuchui ushanga?
¿Pita paiman quimirishpa shinllita huatai ushanga?
14¿Pita paipaj shimitaca pascanga?
Paipaj quirucunaca, manllanayaipachami.
15Paipaj jahualla carapash, jarcarina shinlli jirrushnami.
Imapash na yaicui ushanalla shinllipachami.
16Alitapacha tacashpa ahuashcashnami,
chaitaca huairapash na yaicungachu.
17Shinllitapacha paipura llutashcashnami.
Na pascai ushanallata, alipacha llutashcashnami.
18Pai ujushpaca, punchapamba ninatami llujchin.
Paipaj ñavica, pacarijpi indi llujshijujshnami.
19Paipaj shimimandaca, rupajuj ninami llujshijun.
Nina rupashpa zimbrajujshnami llujshijun.
20Paipaj singamandapash, cushnimi llujshijun.
Timbujun mangamandashna, na cashpaca, calderamandashnami cushni llujshijun.
21Paipaj samaimi, carbongunata japichin.
Paipaj shimimandaca, rupajuj ninami llujshijun.
22Paipaj ushaica, cunga tullupimi tiyan.
Paita ricushpaca, huañunshna manllaimi shamun.
23Paipaj ñutu aichacunapash, ninan shinllipachami.
Chai aichacunaca, rumishna shinllipachami tiyanajun.
24Paipaj shungupash, shinlli rumishnami.
Juchu quirushna shinllipachami.
25Na manllaita charij runacunapashmi, paitaca ninanda manllanajun.
Ninanda manllarishpami, huañungashna tucunajun.
26Paita maijan japishpapash,
espadahuan, lanzahuan, flechahuan, jirru churajunahuan cashpapash, napacha huañuchi ushangachu.
27Paipajca, jirrupash jupashnami,
broncepash ismushca caspishnami.
28Flechapash, paitaca na calpachinllu.
Huaracahuan rumicunata shitajpipash, jupashnami paipica chayan.
29Tucui imalla macanajunacunapash, paipajca jupashnami.
Paica, lanzata tsilin nichijta uyashpapash, imatallapash na manllanllu.
30Paipaj vijsa carapash, filo filo jirrucunashnami.
Rijushpaca, alpataca huachunshnami saquin.
31Mama cucha yacuman yaicushpapash, mangata timbuchijshnami timbuchin.
Jambi yuracunata tandachishpa timbuchijshnami timbuchin.
32Pai yacuta rijushpaca, punchapamba shitashpami rijun.
Manllanayai ucu ucu yacutapash, yurajlla putsujutami ruran.
33Cai pachapica paiman rijchajca, imapash na tiyanllu.
Paitaca, imatapash na manllaj animal cachunmi rurarcani.
34Paica, paita yali ima jatun tiyajpipash, yangapimi churan.
Paica, manllanai jatun animalcunatapash, jatun mandajmi” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
