FILIPENSES 2 - Quichua Imbabura 2016

“Cristoshnallami cana canguichi” nishcami

1Shinallata, Cristo cangunata cushichijujpi, juyaita charishpa cushijunajushpa, Diospaj Espíritu cangunahuan cajpi, tucui shunguhuan juyarishpa, shujcunatapash llaquishpa causanajushpami,

2ñucataca cushichihuanguichi. Chashnallata, tucuilla shujllashnalla yarinajushpa, chai juyaitallata charishpa, shujllashnapacha imatapash pactachinajushpami, chashnaca cushichihuanguichi.

3Jariyaimandapash, fiñanajuita jatarichingapapash, imatapash na ruranachu canguichi. Ashtahuangarin, na jariyashpami, tucuilla shujllashnalla alicachirishpa, shujtara jatumbi churana canguichi.

4Cangunapajlla ali cachunga na ruranachu canguichi. Ashtahuangarin, shujcunapajpash ali cachunmi rurana canguichi.

5Cristo Jesús imashna causashcashnami, cangunapash causana canguichi.

6Paica Diospacha cashpami, Diosllata canataca na saquirca.

7Ashtahuangarin Cristoca, Diospacha cashpami, ñucanchishnalla aichayuj tucushpa, cai pachaman shamurca.

8Chashna aichayuj tucushpami, pinganayaita cruzpi chacatashpa huañuchijpipash, Diosta cazuj cashcamandaca, upalla huañurca.

9Shina cajpimi Taita Diosca, tucuita mandashpa tiyajuchun ninanda alicachishpa churarca. Shinallata, tucuicunata yali ushaita charij shutita charichunmi churarca.

10Jahua pachapi tiyajcunapash, cai pachapi tiyajcunapash, alpa ucupi tiyajcunapash Jesuspaj shutipi cungurichunmi chashna churarca.

11Taita Diostaca: “Ninan ushaita charijmari cangui” ninajuchun, Jesucristotapash: “Canmi ninan ushaihuan mandajungui” nishpa tucuicuna alicachinajuchunmi chashna churarca.

“Crijcunami, cai pachapaca micha canguichi” nishcami

12Ñuca juyashca crijcuna, cangunaca cazushpami causarcanguichi. Na ñuca chaipi cajpilla cazushpami, ñuca illajpipash, ashtahuan cazuna canguichi. Cangunaca ña quishpirishca cashpami, Taita Diostaca ninanda manllashpa, tucuita pactachishpa causana canguichi.

13Taita Dios munashpami, cangunamanga, Pai munashcata rurashpa pactachinajuchun ushaita caramujun.

14Pitapash na huasha rimashpa, pihuambash na fiñanajushpami causana canguichi.

15Cangunaca, cai pachapi causanajuj na ali gentecunapaj ñaupajpica, pipash na juchachijpi, na jariyashpami chashna causana canguichi. Taita Diospaj huahuacuna cashpami, cai pachapica punchayachij michacunashna canguichi.

16Causaita caraj Shimitaca, cangunapash pactachishpami, shujcunamambash villanapacha canguichi. Shina cajpimi, Cristo tigramui punllapica, na yanga villajushcata ricushpa ninandapacha cushijusha.

17Canguna alipacha crishpa, Diospajta rurashpa pactachinajujpimi, ñuca huañuna cashpapash, cangunahuan ninanda cushijuni.

18Shinallata cangunapash, ñucahuan ninandapacha cushijunguichi ninimi.

Timoteomandapash, Epafroditomandapash

19Apunchi Jesús munajpica, Timoteotaca cangunapajman ucha cachamusha yajunimi. Canguna imashna cajta yachashpami, ñucapash cushijusha.

20Timoteoshna, cangunamanda ñucashnallata tucui shunguhuan yarijujca, pipash na tiyanllu.

21Tucuicunami, paicunapajlla ali cachun mascanajun, Jesucristopaj ali canataca na mascanajunllu.

22Ashtahuangarin Timoteotaca, aliguta rurashpa causajtaca ñami yachanguichi. Paica, shuj churi, taitaman ruranshnami, quishpirinamandaca ñucahuan villashpa purijurca.

23Shina cajpipash, ñuca ima tucunatapash ña ali yachashpami, paitaca cangunapajman cachamusha.

24Ashtahuangarin, ñucapacha cangunata ricungapa ucha ringapa munashpami, Apunchi Jesustalla crishpa shuyajuni.

25Ashtahuangarin, ñucahuan cumba tucushpa, maipipash na manllashpa villaj Epafrodito shuti huauquitaca cachanapacha cajpimi cachamugrini. Paitaca, ñucata yanapashpa imagutapash rurashpa carachunmi cachamurcanguichi.

26Paica, tucuilla cangunata ricungapaca, ninandapachami munajurca. Shinallata, pai huañujushcata canguna yachashcamandapash, ninandapachami llaquirijurca.

27Paica, ninanda irquiyashpami, ña huañunallapacha carca. Ashtahuangarin, ama jahuan, jahuan llaquita ñuca apajuchunmi, Taita Diosca, paitapash, ñucatapash llaquishpa, paitaca alichirca.

28Shina cajpimi, cutin paita ricushpa cangunapash ninanda cushijunajuchun, ñucapash ama cashna llaquilla tiyajungapa, cangunatara ricuchun ucha cachamungapa munani.

29Paitaca, Apunchi Jesusta ali crij cajpimi, tucui shunguhuan cushijushpa chasquina canguichi. Shinallata, paishnalla ali crijcunataca, chashnallata chasquipanguichilla.

30Cristopajta rurajushpami paica, ashagumandalla na huañurca. Paipaj causaitapash na llaquishpami, canguna ñucaman na rurai ushashcata, paira rurajurca.