1¿Nachu ali yachanaca caparijun?
¿Nachu ali yuyaipash, shinllita caparijun?
2Pirca jahuacunamanda, ñan manñacunamanda,
caiman, chaiman rina ñanguna callaricunamandami caparijun.
3Puebloman yaicuna, pungu ñaupajpimi shayajun.
Pungu yaicunacunapimi, cashna nishpa caparijun:
4“Runacuna, cangunatami caparijuni.
Huañuna aichayuj runacunatami caparijuni.
5Na ali yachajcuna, aliguta yarishpa purinata yachajuichi.
Shinlli shungucuna, aliguta yarishpa causanata yachajuichi.
6Uyahuaichi, juyailla ali shimicunatami rimagrini.
Ñucaca, aligutallami yachachigrini.
7Ñuca shimihuanga, na llullashpami villagrini.
Diosta na manllashpa, llullashpa rimanataca napacha munanichu.
8Ñuca shimihuan yachachishca tucui yuyaicunaca, chashnapachami.
Cai shimicunapica, ima na alipash, ima pandapash na tiyanllu.
9Uyanata yachajcunapajca, ñuca yachachishca shimicunaca alipachami.
Ali yuyaita charijcunapajca, yachajunapachami.
10Culquipaj randica, ñuca yachachishcata chasquichi.
Ashtahuan ali curipaj randica, yachajushpa catichi.
11Ali yachanaca, ninan juyailla rumicunatapash yalimi.
Chaitaca, tucui imata munashcahuambash, na chimbapurai ushanallachu.
12Ali yachanaca, aliguta yarishpa purinahuanmi causan.
Shinallata, aliguta yachashpa, tucuita alita rurashpami causan.
13Mandaj Diosta manllashpa causanaca,
na alita ruranata millanayachinami.
Jariyashpa jatun tucunata, na alita ruranata, jatun na alita rimanapash millanayachinami.
14Aliguta yachachinapash, aliguta ricushpa pactachinapash ñucahuanmi.
Ñucami ali yachana cani.
Ninan ushaipash ñucapajmi.
15Ñuca yachachijpimi, jatun mandajcunapash, cati mandajcunapash,
alitalla rurashpa mandanajun.
16Ñuca yachachijpimi, cati mandajcunapash mandana ushaita charin.
Shinallata, tucui mandajcunapash, aliguta ricushpami mandanajun.
17Ñucata juyajcunataca, ñucapash juyanimi.
Tutamandata ñucata mascajcunaca tarihuangami.
18Charijyanapash, alicachi tucunapash, ñucahuanmi.
Na tucurinalla charinacunapash, alitalla ruranapash, ñucahuanmi.
19Ñuca yachachishcapash, ashtahuan ali curitapash yali alimi.
Ñuca caranacunaca, ashtahuan ali culquitapash yali alimi.
20Alitalla rurashpa causanatami yachachisha.
Aligutapacha ricushpa mandanatami yachachisha.
21Ñucata juyajcunataca, paicuna japina cashcata japinajuchunmi, chashna yachachisha.
Juyailla alicunatapashmi, ashtahuan carasha.
22Mandaj Diosmi, imatapash nara churashpallata,
ñucataca ña charihuashca.
Tucui imatapash nara churashpallatami, ñucataca ña charihuashca.
23Nara imapash tiyajpillata, cai pacha nara tiyajpillatami,
causaita cunata yarihuashca.
24Manllanayai ucu yacucunapash nara tiyajpillatami, ña churahuashca.
Pugyucunapash nara tiyajpillatami, ña churahuashca.
25Urcucunatapash, lomacunatapash nara churashpallatami,
ñucataca ña churahuashca.
26Cai pachapash, pambacunapash nara tiyarcachu.
Cai pachapi ñutu alpatapash nara churashcachu carca.
27Jahua pachata churajujpica, ñucapash chaipimi carcani.
Jahua pachahuan, cai pachapi tiyajuj yacuhuan shicanyachijujpipash, chaipimi carcani.
28Jahua pachata shinlli tiyajuchun churajujpipash,
manllanayai ucu pugyucunata shinllita churajujpipash, chaipimi carcani.
29Mama cucha maipi tiyajuchun mandajujpipash chaipimi carcani.
Yacucuna ama maimambash yalichun mandajujpipash, chaipimi carcani.
Cai pacha callari rumicunata churajujpipash, chaipimi carcani.
30Chaipimi, Dioshuan pacta ricujurcani.
Punllandimi Diospaj ñaupajpi cushichijuita charircani.
Paipaj ñaupajpimi, cushijushca causajurcani.
31Gentecuna causachun, cai pachata rurashcamandami cushijurcani.
Huañuna aichayuj runacunata ricushpami cushijuita charircani.
32Cunanga huahuacuna, uyahuaichi.
Ñuca yachachishcacunata catijcunaca, ninandami cushijunga.
33Ñuca yachachishcata uyashpami, ali yachajushcacuna tucunguichi.
Chaitaca, na yangapi churanachu canguichi.
34Ñuca yachachishcata uyaj runacunaca ninandami cushijunga.
Ñucata punllandi mascajcunami, ninanda cushijunga.
Ñuca huasi pungu ñaupajpi shuyajcunami chashna cushijunga.
35Ñucata tarijcunaca, causaitami charinga.
Mandaj Diospaj juyaitapashmi taringa.
36Ashtahuangarin, juchata rurashpa ñucata fiñachijcunaca, paicunapaj almatami llaquipi churanga.
Ñucata fiñajcunaca, huañuimanmi rinajunga” nishpami caparijun.
Who We AreWhat We EelieveWhat We Do
2025 by iamachristian.org,Inc All rights reserved.
