1Na uyangapa munaj runaca:
“Taita Diosca na tiyanllu” yajunmi.
Tucuicunami, na alicuna cashpa, juchatalla rurashpa causanajun.
Shujllapash alita rurangapa munajca na tiyanllu.
2Taita Diosca, jahua pachamandami huañunalla aichayuj gentecunataca ricujurca.
Ali yuyaita charij runa tiyambashchari yashpami ricujurca.
Taita Diosta mascaj runa tiyambashchari yashpami ricujurca.
3Tucuicunami pandarishpa, na alitalla rurana munaihuan causanajurca.
Alita rurashpa causangapa munaj runaca, shujllapash na tiyanllu.
4Na alita rurajcunaca, ima na ali cajtapash, ¿yachai ushanllu?
Ñuca agllashca gentecunata, tandata micunshna tucuchinajushcataca ¿yachai ushanllu?
Taita Diosta na manllashpa chashna ruranajushcataca ¿yachai ushanllu?
5Paicunaca, imata manllana illajpipash, ninanda manllashpami purinajurca.
Taita Diosca, canda fiñajcuna llaquichigrinajujpi, tucuillatami calpachirca.
Taita Dios calpachijpimi, paicunaca pingai tucushpa rinajurca.
6¡Israelcunata quishpichingapaca,
Sion pueblomanda shamushpami ali canman!
Pai agllashca gentecunataca, prezu causanajushcamanda cacharichishpami tigrachimunga.
Chashna rurajpimi, Jacobpaj mirai Israelcunaca, ninanda cushijunajunga.
Who We AreWhat We EelieveWhat We Do
2025 by iamachristian.org,Inc All rights reserved.
