2 REYES 17 - Quichua Imbabura 2016

Samaria pueblopi causajcunata mishashpami, Israelcunata prezu apashca

1Judá llactata jatun mandaj Acaz shuti runaca, chunga ishcai huatata ña mandajujpimi, Ela shuti runapaj churi Oseas runaca, Israel llactata mandai callarirca. Paica, iscun huatatami Samaria pueblopi mandajurca.

2Paica, Mandaj Diospaj ñaupajpica, na alitami rurashpa causajurca. Chashna cashpapash, Israel llactata paipaj punda jatun mandajcuna rurashcashnaca, na rurajurcachu.

3Asiria llactata jatun mandaj Salmanasar shuti runaca, macanajungapa vichai rishpami, Oseas runataca paipajta ruraj cachun japirca. Shinamandami Oseas runaca, impuestota cushpa causajurca.

4Ashtahuangarin, Asiria llactata jatun mandajca, shujcunahuan pacalla Oseas runa parlarijundami yacharca. Oseas runaca, Egipto llactata jatun mandaj So shuti runapajmanmi, paipaj randi parlajcunata cachashca carca. Shinallata, Asiria llactata jatun mandajman, huatapi huatapi impuestota cujushcatapash, na ashtahuan cujurcachu. Chaimandami jatun mandajca, paitaca prezuna huasipi churarca.

5Asiria llactata jatun mandajca, tucui llactaman yaicushpami, Samaria pueblota chaupipi churashpa, quimsa huatacaman chaipi causajurca.

6Iscun huatata Oseas runa ña mandajujpimi, Asiria llactata jatun mandajca, Samaria pueblota quichushpa Israelcunatapash, Asiria llactaman prezu aparca. Chashna apashpami, Gozán shuti yacu manñapi tiyaj Halah shuti, Habor shuti pueblocunapi, Media shuti llactapi tiyaj pueblocunapi causanajuchun churarca.

7Israelcunaca juchata rurashpami, Egipto llactamanda llujchimuj paicunata Mandaj Taita Diostaca fiñachirca. Egipto llactata jatun mandaj Faraonbaj maquimanda llujchimuj Diosta cungashpami, rurashcalla dioscunatara catinajurca.

8Israelcunapaj ñaupajmanda, Mandaj Dios llujchishpa cachashca gentecuna ruranajushcatami, rurashpa catinajurca. Shinallata, Israel llactata paicunapaj punda jatun mandajcuna mandashcatami ruranajurca.

9Israelcunaca, ima na alicunatapash pacalla rurashpami, paicunata Mandaj Taita Diostaca fiñachirca. Paicunapaj tucui pueblocunapi tiyaj lomacunapimi, altarcunata ruranajurca. Chapashpa shayana torrecunamandaca, pircahuan muyundi jarcashca pueblocunacamanmi altarcunata ruranajurca.

10Shinallata, tucui loma jahuacunapi fanga junda tucui quiru ucucunapimi, rurashcalla dioscunatapash, Asera shuti huarmi diosman rijchajcunatapash shayachinajurca.

11Tucuilla chai altarcunapimi, paicunapaj ñaupajmanda Mandaj Dios llujchishpa cachashca gentecunashnallata, inciensota cushnichinajurca. Chashna ninan na alitapacha rurashpami, Mandaj Diostaca ninanda fiñachirca.

12Mandaj Diosca Israelcunataca: “Cangunaca, na chashna ruranachu canguichi” nishpami mandashca carca. Paicunaca, rurashcalla dioscunatami catinajurca.

13Chaimandami, Mandaj Diosca Israelcunatapash, Judá llactapi causajcunatapash, tucui profetacunahuan, paimanda villajcunahuambash cashna nishpa tacurirca: “Canguna na alita rurashpa causanajushcata saquishpa, ñuca mandashcacunata, ñuca yachachishcacunata cazushpa causaichi. Chaicunataca, cangunapaj ñaupa taitacunaman ñuca imashna mandashcashnallata, tucuita cazushpa causaichi. Chaicunataca, ñucapajta ruraj profetacunahuanmi villachun cachamurcani” nircami.

14Ashtahuangarin, paicunapaj ñaupa taitacuna, ninan shinlli shungu tucushpa, Mandaj Taita Diostaca na crishpa, na cazushcashnami, paicunapash na cazunajurca.

15Chaimandami pactachinajuchun cushca shimicunatapash, paicunapaj ñaupa taitacunahuan ari nishcatapash, imashna causanata yachachishcatapash, yangapi churanajurca. Paicunaca, imapash yangacunatara catishpa, paicunapaj llacta muyundipi causajcuna rurashcata catishpami, paicunapash yangapi churai tucunajurca. Mandaj Diosca: “Chai gentecuna rurashcashnaca, na ruranachu canguichi” nishpami mandashca carca.

16Paicunata Mandaj Taita Dios mandashcacunataca tucuita saquishpami, curita yacuyachishpa, ishcai shicu dioscunata rurarca. Shinallata, Asera shuti huarmi diosman rijchajta rurashpami, jahua pachapi tiyaj tucui luzerocunatapash, Baal shuti rurashcalla diostapash catinajurca.

17Chai dioscunaman carashpami, paicunapaj churicunatapash, ushicunatapash ninapi rupachinajurca. Shinallata, yachajcunapash, brujucunapashmi tucunajurca. Mandaj Diospaj ñaupajpica, na alitalla rurashpa causanajushpami, Diostaca ninandapacha fiñachinajurca.

18Chaimandami Mandaj Diosca, Israelcunahuanga ninandapacha fiñarishpa, paipaj ñaupajmanda llujchishpa cacharca. Chashna cachajpimi, Judá ayllucunalla chaipi saquirirca.

19Ashtahuangarin Judá ayllupash, paicunata Mandaj Taita Dios mandashcacunataca na cazurcachu. Pactachinajuchun Israelcuna cushca shimicunapi nishcatallami rurashpa catinajurca.

20Chaimandami Mandaj Diosca, Israelcunapaj tucui miraicunataca jichushpa saquirca. Shinallata, imatapash quichujcunapaj maquipi churashpami, Paipaj ñaupajmanda llujchishpa cachangacaman llaquichijurca.

21Israelcunataca, Davidpaj huasi ucupuramanda shicanyachishpami anchuchirca. Chaimandami paicunaca, Nabat shuti runapaj churi Jeroboam runata, jatun mandaj cachun churarca. Jeroboam runami, Israelcunataca, Mandaj Diosta catinamanda shicanyachishpa ninandapacha juchata rurachirca.

22Chaimandami Israelcunaca, Jeroboam tucui juchacunata rurashcata na saquishpa, chaitallata rurashpa catinajurca.

23Chashna na alita rurashcamandami Mandaj Diosca, Israelcunataca paipaj ñaupajmanda llujchishpa cacharca. Paipajta ruraj tucui profetacunahuan villashcashnami, chaitaca pactachirca. Israelcunaca, paicunapaj llactamanda Asiria llactaman prezu apajpimi, cunangaman chaipi causanajun.

Samaria pueblopi, Asiria llactamanda gentecuna causanajushcamanda

24Asiria llactata jatun mandajca, Babilonia, Cuta, Ava, Hamat, Sefarvaim shuti pueblocunamanda gentecunata apamushpami, Samaria llactapi, Israelcunapaj randi causachun churarca. Samaria llactata quichushpami, chaipi tiyaj pueblocunapi causanajurca.

25Paicuna chaipi causai callarishpa, Mandaj Diosta na manllajpimi, Mandaj Diosca, paicunata huañuchinajuchun leongunata cachamurca.

26Chaitami, Asiria llactata jatun mandajman cashna villanajurca: “Samaria llactapi causachun can apashca gentecunaca, chai llactapaj Taita Dios mandashcataca na yachashpa, na cazujpi, leongunata cachamujpimi, paicunataca huañuchinajun. Chai llactapaj Taita Dios mandashcacunata na yachashcamandami, chashna rurajun” nishpami villanajurca.

27Chashna villajpimi, Asiria llactata jatun mandajca, cashna mandarca: “Chai llactapaj Dios mandashcata yachachinajuchunga, chai llactamandallata apamushca huaquin sacerdotecunata, chaipi causachun cachaichi” nircami.

28Chaimandami, Samaria llactamanda prezu apai tucushca shuj sacerdote shamushpa, Bet-el shuti pueblopi causajurca. Paimi, Mandaj Diosta imashna manllashpa causanata yachachijurca.

29Chashna yachachijujpipash, tucui llactacunamanda shamuj gentecunaca, paicunapaj rurashcalla dioscunatarami, Samaria llacta lomacunapi alicachinajurca. Maijan llactamanda shamushca cashpapash, pai causajuj pueblopimi chashna ruranajurca.

30Babilonia pueblomanda shamushcacunaca, Sucot-benot shuti diosta, Cuta shuti pueblomanda shamushcacunaca, Nergal shuti diosta, Hamat shuti pueblomanda shamushcacunaca, Asima shuti diostami ruranajurca.

31Shinallata, Ava pueblomanda shamushcacunaca, Nibhaz shuti, Tartac shuti dioscunatami ruranajurca. Sefarvaim shuti pueblomanda shamushcacunaca, Adramelec shuti, Anamelec shuti dioscunata ninanda alicachingapami, paicunapaj churicunata carashpa, ninapi rupachinajurca. Chai dioscunaca, Sefarvaim shuti gentecunapaj dioscunami carca.

32Paicunaca, Mandaj Diosta manllashpapash, paicuna yuyailla agllashpami, lomacunapi tiyanajuj altarcunapi animalcunata carashpa huañuchinajuchun sacerdotecunata churarca.

33Chai gentecunaca, Mandaj Diosta manllashpapash, paicunapaj dioscunatarami alicachishpa causanajurca. Paicunata apamushca llactapi imashna rurashpa causashcashnami ruranajurca.

34Paicunaca cunangamanmi, pundashnallata rurashpa causanajun. Mandaj Diostapash na manllashpami, Jacobpaj miraicunaman, Mandaj Dios tucui mandashca shimicunatapash na pactachinajun. Jacobtaca, Israel shutitami shutichirca.

35Mandaj Diosca, chai miraicunahuan ari ninajushpami, cashna mandashca carca: “Shuj dioscunataca, na manllanachu canguichi. Paicunataca, na alicachishpa catinachu canguichi. Animalcunatapash, na cushpa huañuchinachu canguichi.

36Ashtahuangarin, ninan ushaihuan Egipto llactamanda llujchimuj, Mandaj Dios Ñucatami manllaihuan alicachina canguichi. Ñucamanmi, animalcunata cushpa huañuchina canguichi.

37Pactachinajuchun ñuca cushca shimicunata, ali causachun yachachishcacunata, mandashca shimicunata quilcachishpa mandashcacunataca, aliguta yariashpami pactachina canguichi. Shuj dioscunataca, na manllanachu canguichi.

38Cangunahuan Ñuca ari nishcataca, na cunganachu canguichi. Shuj dioscunataca, na manllanachu canguichi.

39Ashtahuangarin, cangunata Mandaj Taita Dios Ñucatami, manllana canguichi. Ñucami, cangunata tucui fiñajcunapaj maquimandaca quishpichisha” nishcami carca.

40Shina cajpipash, paicunaca na uyanayachishpami, punda imata rurashpa causashcashnallata causanajurca.

41Chashnami chai gentecunaca, Mandaj Diosta manllashpapash, rurashcalla dioscunata alicachishpa causanajurca. Paicunapaj churicunapash, cati miraicunapash, paicunapaj taitacuna rurashpa causashcashnallata, cunangaman chashna causanajun.