1Taita Dioslla, quishpichihuayari.
Yacucunaca, ñamari quilpahuashca.
2Na shayari ushanalla, turu ucupimari pambarijuni.
Manllanayai ucu ucu yacumanmi huashajujuni.
Ninanda rijuj yacumi apagrijuhuan.
3Cungapash chaquijta caparijushpami ña shaijushca cani.
Taita Diosta shuyashpa chapariyajujpimi, ñavipash ña amsayajuhuan.
4Yangamanda ñucata fiñajcunaca, ñuca ajchatapash yalimari mirashca.
Ñucata llaquichingapa munajcunaca, ninandami shinlliyashca.
Yangamanda huañuchingapa munajcunamari, chashna mirashca.
¿Na shuhuashca cashpapashchu, tigrachina cani?
5Taita Dioslla,
ñuca na yachajushca cajtaca yachahuanguimi.
Juchata, rurashcataca na pacai ushanichu.
6Tucuita Jatun Mandaj Dioslla,
Can agllashca gentecuna, ñucamanda pingai tucuchunga, ama saquipanguichu.
Israelcunapaj Taita Dioslla,
Canda mascashpa shamushca gentecunaca,
ama ñucamandaca pandarinajuchun saquipanguichu.
7Canda juyaimandami, llaquicunata aparcani.
Ninanda pandarishca cashpami, ñavita maiman churaitapash na ushajuni.
8Ñuca huauquicunapaj ñaupajpipash,
caru llactamanda shamushca runashnamari carcani.
Ñuca mamapaj churicunapaj ñaupajpipash, maimandapash shamushca runashnami cani.
9Cambaj huasita ninandapacha juyaimandami huañungashna cani.
Canda na alicachishpa rimashca shimicunami, ñucatapash llaquichijuhuan.
10Na micushpa huacashpa, mañajushpami ninanda llaquirircani.
Chaita ricushpami, ninanda llaquichinajuhuan.
11Llaquihuan cashpa churajunatami, churajurcani.
Chaimandami ñucataca, na alicachishpa rimanajurca.
12Pueblo pungupi tandanajushca gentecunaca, ñucata fiñashpami rimanajurca.
Machajcunapash, ñucataca candashpami asinajurca.
13Mandaj Dioslla,
ima punllallapash uyahuangui yashpami mañajurcani.
Taita Dioslla,
Canmi ñucataca ninanda juyahuangui.
Tucuita pactachishpa quishpichij Dioslla,
ñuca mañashcata uyahuangui.
14Cai yacu turumandaca llujchishpa,
ama ashtahuan huashajuchun saquihuaichu.
Ñucata na ricunayachij gentemandapash, yacu ucumandapash llujchihuailla.
15Yacupi huañuchunga, ama saquihuaichu.
Yacu ucu ucuman huashajushpa huañuchunga, ama saquihuaichu.
Yacu pugyupi, huashajushpa huañuchumbash, ama saquihuaichu.
16Mandaj Dioslla,
ninanda juyaj cashcamanda, ñuca mañashcata uyahuailla.
Canga, ninanda llaquij cashcamanda ricuhuailla.
17Ñucamandaca, ama anchuripaichu.
Ñamari huañugrijuni, ucha yanapaj shamupailla.
18Ñucapajman shamushpa quishpichihuailla.
Ñucata fiñajcunapaj maquimanda, cacharichihuailla.
19Ñucata na alicachishpa, pingaichishpa, llaquichinajujtaca, Canllata yachapanguimi.
Ñucata llaquichijcunaca, Cambaj ñaupajpillatami.
20Ñucata na alicachishpa rimajpimi, ninanda llaquirijuni.
Maijanllapash ñucata llaquihuashcanman, yajujpipash, pipash na llaquihuarcachu.
Pipash cushichingami yashpa mascajpipash, shujllapash na tiyarcachu.
21Micunata carangapa randica, jayaj yacutami shimipi churahuarca.
Ñuca yacunayachijujpica, vinagretami ufiachihuarca.
22Paicuna jatun micuita rurashcapash, paicunapaj llaquipajllata cachun.
Ima alita rurashcapash, paicunapaj llaquipajllata cachun.
23Imatapash ama ricungapa, ñausa tigrashca cachun.
Paicunapaj huasha tullucunatapash, curparishpa catishca causachun.
24Paicunataca, ninanda fiñarishpa llaquichipanguilla.
Chashna ninanda fiñarishpami, tucuillata llaquichipangui.
25Paicuna causanajushca huasicunapash, jichushca saquirichun.
Paicunapaj huasipica, pipash ama causachun.
26Paicunaca, Can llaquichishca runatami catiriyashpa llaquichinajurca.
Canllata cachamushca, nanaihuan cajtami na alicachishpa parlanajun.
27Paicuna juchata rurashcamandaca, ashtahuan rurashpa catichun saquipailla.
Paicunaca amapacha quishpirishca cachun.
28Paicunapaj, shutica causaita causagrina libromandaca anchuchi tucushca cachun.
Alitalla rurajcunapaj shuticunahuanga, ama tandachishca cachun.
29Ñucaca ninan nanaihuanmi llaquirishca cani.
Ñuca Taita Dioslla,
Can quishpichishpa pushahuailla.
30Ñuca Taita Dioslla,
Cambaj Shutitaca*, candashpami alicachijusha.
Candaca ninanda alicachishpami candajusha.
31Shina alicachijpimi Mandaj Diosca,
huagrata carashpa huañuchishcatapash yalita chasquinga.
Cachuyu, silluyuj shicuta carashpa huañuchishcatapash yalitami chasquinga.
32Chaita ricushpaca, llaquichi tucushpa causajcunaca cushijungami.
Taita Diosta mascashpallami, cangunapaj shungupica, causaita charinguichi.
33Mandaj Diosmi, huajchacunapaj mañashcataca uyanga.
Pai agllashcacuna prezu tiyanajujpipash, na jichushpa saquingachu.
34Paitaca, jahua pachapash, cai pachapash alicachinami canguichi.
Mama cuchacunapash, chaipi imalla tiyajcunapash, ninandami alicachina canguichi.
35Diosmi, Sion lomapi causajcunataca quishpichinga.
Judá llactapi pueblocunataca, cutinmi shayachinga.
Chai pueblopimi cutin causagringa.
36Cambajta rurajcunapaj miraicunami, chai pueblotaca paicunapaj cachun japinajunga.
Canda juyajcunami, chaipica causanajunga.
Who We AreWhat We EelieveWhat We Do
2025 by iamachristian.org,Inc All rights reserved.
