ROMANOS 9 - Quichua Imbabura 2016

Israelcunatami Taita Diosca agllashca

1Cristota crij cashpami, na llullashpa villajuni. Ñuca shungupica, jucha illaj Diospaj Espiritumi yarichijuhuan.

2Ninanda llaquirishca cashpami, ñuca shungupica punllandi nanachishpa causajuni.

3Aichamanda ñuca ayllucunata juyaimandami, paicuna quishpirichunga ñucara Cristomanda anchuchi tucushpa, llaquichi tucungapa munani.

4Paicunataca, Israelcuna cajpimi Diosca, Paipaj huahuacuna cachun chasquishca. Paicunamanmi Diosca, ninan ushaitapash, ari nishcatapash, mandashca shimitapash cushca. Diosta alicachinata yachachishpami, imatapash carashapachami nijushca.

5Paicunami, ñaupa taitacunamanda miraicuna. Paipuramandami, Cristoca runa aichayuj tucushpa shamurca. Paica, tucui imatapash mandajuj Diosmi. Paitaca, causaita causaicaman ninanda alicachishunchi. Chashna cachun.

6Israelcunaman Taita Dios carashapachami nishcataca, Paillata pactachircami. Ashtahuangarin, ñaupa taita Israelpaj miraicunaca, na tucuilla Israelcunachu.

7Abrahambaj miraicuna cashpalla, na tucuilla paipaj huahuacunachu. Ashtahuangarin: “Cambaj churi Isaacpaj miraicunallami, cambaj huahuacuna ni tucunga” nircami.

8Shina nishpaca, chai miraipurallata cashpapash, na tucuilla Taita Diospaj huahuacuna cashcatami yachachijun. Ashtahuangarin, Dios carashapachami nishcashna miranajuj huahuacunallami, ña paipaj miraicunapacha tucun.

9Diosca carashapachami nishpaca, cashnami nirca: “Ñuca shamusha nishca huatami, Sara shuti cambaj huarmica, shuj jari huahuaguta charinga” nircami.

10Na chaillachu, ashtahuangarin, Rebeca huarmipash ñucanchi ñaupa taita Isaacpaj huahuatami charirca.

11(Chai ishcandi huahuacunaca nara huacharircachu. Ima alita, na alitapash nara rurarcachu. Shina cashpami, Taita Diosca imatapash rurajta ricushpaca na agllajun, ashtahuangarin, Pai munashcatallami agllajun).

12Chaimandami Diosca cashna nirca: “Punda churimi, jipa churipajta rurajunga” nircami.

13Quilcashcapica cashnami nijun: “Jacobtami juyarcani, Esautaca na juyarcanichu” nijunmi.

14Shina cajpica, ¿imatata nishun? ¿Taita Diosca na alitamari rurajun ninachu canchi? Napacha shinachu.

15Diosca, Moisesmanmi cashna nirca: “Maijanda Ñuca llaquingapa munashcatami llaquisha. Shinallata, maijanda Ñuca juyangapa munashcatami juyasha” nircami.

16Shinamandami, gente munashcamanda, imatapash rurashcamandaca na agllajun. Ashtahuangarin, Taita Dios llaquishpallami agllajun.

17Shina cajpimi Dios quilcachishca Shimipica, Faraondaca cashna nirca: “Ninan ushaita charijta cambi ricuchingapami, candaca jatun mandaj cachun churarcani. Ñuca shutita tucui cai pachapi rijsinajuchunmi, chashna churarcani” nircami.

18Shina cashpami, maijanda cashpapash, Pai munashcatalla llaquin. Ashtahuangarin, maijanda cashpapash, shunguta shinlliyachingapa munashpaca shinlliyachishpami saquin.

19Shina cajpica: “¿Imamandata llaquichigrin? Dios imata rurangapa munashcataca, ¿pita jarcai ushashcayari?” nihuanguichichari.

20Ashtahuangarin canga, gentellami cangui. ¿Canga, Taita Diosta imata ningapapash pita canguiyari? Alpa mangaca, paita rurajtaca: “Ñucataca, ¿imashpata cashnata rurahuarcangui?” ningachu.

21Mangata ruraj runaca, ¿nachu turutaca, paipaj munashcata rurai ushanga? ¿Nachu chai turumandallata shuj mangataca alipaj, shujtaca na alipaj rurai ushangalla?

22Shina nishcashnami Taita Diosca, Pai ninanda fiñarishpa llaquichingapa ushaita charishcatapash ricuchijun. Ninanda fiñarishpa tucuchina cashpapash, Pai llaquishpami na tucuchishpa shuyajurcalla.

23Paipaj ninan ushaita ricuchingapami, chashna shuyajurca. Chaitaca, Pai llaquishpa agllashcacunata, punchapamba llactaguman pushangapami pundamandapacha alichirca.

24Diosca, na ñucanchi judiopuracunatalla agllashcachu, ashtahuangarin, na judiocunatapashmi agllashca.

25Oseas quilcashcapipash cashnami nijun:

“Na Ñuca agllashca gentecunatami:

‘Ñuca agllashcacunami canguichi’ nisha.

Ñuca na juyashcatami: ‘Ñuca juyashcami canguichi’ nisha.

26Maipimi: ‘Na Ñuca agllashcacunachu canguichi’ nishca pushtupillatami:

‘Causajuj Taita Diospaj huahuacunami canguichi’ ni tucunajunga” nijurcami.

27Shinallatami Isaiaspash, Israelcunamandaca cashna nishpa caparijun: “Israelcunaca, mama cucha manñapi tiyajuj t'iyu alpashna ashtaca ashtaca cashpapash, huaquin puchushcacunallami quishpiringa.

28Mandaj Dios, Pai imashna llaquichisha nishcataca, alitapacha rurashpami, cai pachapica ñapash llaquichinga” nijunmi.

29Isaiasca, punda huatacunallatami cashna nijurca:

“Huaquin miraitallapash na saquishpa,

tucuita Mandaj Jatun Dios tucuchishca cajpica,

Sodoma shuti puebloshnami tucurinchiman carca,

Shinallata, Gomorra shuti puebloshnami canchiman carca” nijurcami.

Crishpallami ima alitapash rurai ushanchi

30Shina cajpica, ¿imata nina canchi? Na judiocunaca, alitalla ruranata na mascashpapash, alitalla rurashcashnami chasqui tucushca. Shinamandami crishcamandaca, alitalla rurashcacunashna chasqui tucushca.

31Ashtahuangarin Israelcunaca, alitalla rurangapa munashpa, mandashca shimicunata catinajushpapash, na pactachi ushanajurcachu.

32¿Imamandata shina canga? Paicunaca na crishpami, mandashca shimicunapi nijujtalla catinajushpa rumipi nitijajshna pandanajurca.

33Quilcashcapica cashnami nijun:

“Ricuichi, Sion pueblotami nitijachij rumishna cachun, shuj jatun rumita churani.

Pipash paita crishpaca, na pingai tucungachu”

nijunmi.