1Eliú runaca, cashnatapashmi nijurca:
2“Ashaguta shuyahuai, imashna canatapash ñami villagrini.
Taita Diosmanda imata rimanatapash charinirami.
3Ashtahuan mirachishpami tucuimanda villagrijuni.
Ñuca Diosca, alitalla ruraj cajtami ricuchigrini.
4Ñuca villashca shimicunaca, napacha llullachu.
Alipacha yachajushca runaca, cambaj ñaupajpimi shayajuni.
5Taita Diosca, ninan ushaita charishpapash, pitapash na yangapi churanchu.
Paica, tucui ushaitapash charij, tucuita yachaj Diosmi.
6Paita na cazuj runamanga, causaita na cungachu.
Llaquichi tucushpa causajcunamanmi, japina cashcata cunga.
7Paita cazushpa causajcunataca ricuriajunmi.
Jatun mandajcunahuan pacta tiyachishpa jatumbi churangapami chashna ricuriajun.
8Cadenacunahuan huatashca cajpipash,
huascahuan huatashpa llaquichinajujpipash,
9Diosmi, paicuna imatalla rurashcataca ricuchinga.
Shinallata paicuna na cazushpa causashcatapashmi ricuchinga.
10Paicuna ali tucuchunmi, Diosca rimajun.
Juchata ruranata saquichunmi rimajun.
11Shina nishcata uyashpa cazushpaca, ali causaitami charinga.
Huañuicamanmi chashna ali causanga.
12Na cazushpaca, espadahuanmi huañuchi tucunajunga.
Ima yachajushcapash illajmi huañuna.
13Mishqui shimi, jayaj shungucunaca, paicunallatami millaimanda tucurinajun.
Paicunata Dios llaquichijpipash, na capari ushanajungachu.
14Paicunaca, chairalla viñai cashpallatami huañunajunga.
Paicunaca, sodomita gentecunashnami huañushpa tucurinajunga.
15Imagutapash na charij runataca, chashna llaqui causaimanda llujchingami.
Llaquipi cashpa caparijujtaca uyangami.
16Shinallatami candapash llaquicunamanda quishpichinga.
Ima llaquipash na japina pushtupimi churanga.
Chaipimi, tucuita micushpa causangui.
17Ashtahuangarin canga, Diosta na cazuj runacunashnami llaquita apajungui.
Llaquichina cashcamanda llaquichijpimi, chashna llaquita apajungui.
18Shinamandami, charijyana yuyaicunahuanga na pandarina cangui.
Maqui ucuchishca culquitaca na japinachu cangui.
19Diospaj ñaupajpica, ashtaca curita charishcapash ¿alichu canga?
Na cashpaca, ninan ushaita charijpilla, ¿llaquingallami yanguichu?
20Tutayachunga na shuyanachu cangui.
Tutayajpica, canga na pacajui ushanguichu.
21Na alita rurangapaca ama tigranguichu.
Dios llaquichijpi causanatarami agllarcangui.
22Taita Diosca, tucuita yali ninan ushaita charij Diosmi.
Paishnalla aliguta yachachij Diosca, ¿pipash tiyangachu?
23Pai imatalla ruranataca, ¿pita yachachirca?
¿Pita paitaca: ‘Canga, na alitami rurashcangui’ ninga?
24Pai imatalla rurashcamandaca, jatunyachinami cangui.
Chai rurashcacunatami, runacunaca ricunajun.
25Tucui cai pachapi causajcunami ricunajun.
Carumandallatami ricunajun.
26Taita Dios jatun cajpipash, na rijsishpami causanajunchi.
Pai mashna huatata causashcatapash, na yachashpami causanchi.
27Paimi, tamia yacutaca cachamun.
Fuyuta yacuman tigrachishpami tamiachimun.
28Chai fuyumandami tamiaca urmamujun.
Chashnami tucuicunapaj jahuapi tamiaca urmamujun.
29Fuyu maipi callarindapash, tucurindapash, ¿pita yachai ushangayari?
Maimanda culun nishpa uyarindapash, ¿pita yachangayari?
30Diosmi, cai pachataca punchayachin.
Chashnami, mama cucha ucutapash punchayachin.
31Chai ushaihuanmi runacunatapash llaquichin.
Chai ushaihuanmi, ashtaca gentecunamambash micunata caran.
32Punchapamba shitajuj rayutapash, maquihuan quilpashpami.
Ama punchayachichun cai pachataca chashna quilpajun.
33Pai fiñarishcataca, culun nishpami ricuchijun.
Shinlli huairahuanmi, Pai fiñashcataca ricuchijun.
Who We AreWhat We EelieveWhat We Do
2025 by iamachristian.org,Inc All rights reserved.
