JOB 35 - Quichua Imbabura 2016

1Eliú shuti runaca, cashnatapashmi nijurca:

2“Canga: ‘Taita Diostapash yali, imatapash alitalla rurajmi cani’ nishpaca,

alitami nijuni ¿yanguichu?

3Canga cashnami nijurcangui:

‘Juchata na rurashpaca, ¿imatata japina cani?

Juchata na rurashpaca, ¿ima alitashi japisha?’ nijurcanguimi.

4Shinamandami canmambash, cambaj cumbacunamambash,

imata ruranata villangapa munani.

5Jahua pachata ricuyari.

Chaita ricushpaca, jahua jahuapi fuyucuna tiyajujtami ricungui.

6Juchata can rurashpaca, ¿Diosta llaquichinimi yanguichu?

Paita jariyashpa na cazushpapash, ¿paitaca imatashi rurai ushangui?

7Alitalla rurashpapash, ¿Diosmanga imatashi cungui?

Diosca, ¿imatashi cambaj maquimandaca japinga?

8Diosta can na cazushpaca, runatallatami llaquichingui.

Imata alita rurashcapash, shuj gentecunapajmi ali canga.

9Ninanda llaquichijpimi, caparinajun.

Ninan ushaita charijcuna llaquichijpimi, ninanda huacanajun.

10Shujllapash na cashna ninllu:

‘Ñucata Ruraj Taita Diosca, ¿maipitayari?

Paica llaquicunapipash, candashpa cushijuna yuyaitami cun.

11Paica, ñucanchitaca, cai pachapi tiyaj animalcunatapash yali yachajtami rurarca.

Alasyu animalcunatapash yali alipacha yachajcunatami rurarca’ nishpaca, na ninllu.

12Paicuna caparinajujpipash, na uyangachu.

Jatun tucushcacuna cajpimi na uyanga.

13Yangata rimashca shimicunataca, Taita Diosca na uyangachu.

Tucuita rurai ushaj Diosca, ricuitallapash na ricungachu.

14Paita na cazunichu nijpicarin, ¿maitata llaquingayari?

Can imatalla rurashcacunaca, paipaj ñaupajpimi.

Shina cashcamanda, Paita shuyailla.

15Diosca fiñarishca cashpapash nara llaquichinllu.

Shinallata, runacuna imata ruranajujtapash na ricuriajunllu, yajunmi.

16Shinamandami Job runaca, maitapash rimajun.

Shimimanda ima llujshishcatami yangata rimajun” nijurcami.