1Jerobaal shuti runapaj churi Abimelec runaca, paipaj mamapaj turicunahuan mamapaj tucui ayllucunahuanmi parlangapa Siquem shuti puebloman rirca. Chaipimi, cashna nijurca:
2“Ñucami, Siquem shuti pueblopi tucui causajcuna uyajta cashna nichun mañapani: ‘¿Cangunapaj yuyaipica, cai Siquem shuti pueblopi causajcunataca, Jerobaal shuti runapaj, canchis chunga churicuna mandanachu ali canman imashi? na cashpaca, shujlla mandaj tiyanachu ali canman imashi? Ñucapash, Jerobaalpaj churillatami cani nijunmi’ nipaichiyari” nijurcami.
3Shina nijpimi, Siquem shuti pueblopi tucui causajcuna uyajta, Abimelec shuti runapaj randi, paipaj mamapaj turicuna chai shimicunata rimanajurca. Chaimandami paicunapaj shungupica, paitalla ashtahuan yarinajurca. Paicunaca: “Abimelec shuti runaca, ñucanchi huauquimari” ninajurcami.
4Shinallata Baal-berit shuti diospaj huasimanda, pusaj patsaj gramota pezaj culquita japishpami cunajurca. Abimelec runaca, imata rurangapapash na munaj, yanga purij runacunaman chai culquita cushpami pusharca.
5Abimelec runaca, paipaj taita Jerobaal causashca Ofra shuti puebloman rishpami, paipaj canchis chunga huauquicunataca, shuj rumi jahuapilla huañuchirca. Chai churicunamandaca, Jerobaal shuti runapaj Jotam shuti jipa churillami pacajushpa quishpirirca.
6Shinamandami, Siquem shuti pueblopi causajcunaca, Milo shuti huasipi causajcunandi, Abimelec shuti runataca, jatun mandaj cachun agllanajurca. Chaitaca, Siquem shuti pueblopi, shuj jatun rumi tiyajuj pambapimi, chashna ruranajurca.
7Chaita yachashpami, Jotam shuti runaca, Gerizim shuti urcu jahua umaman rirca. Chaipi shayarishpami, ninandapacha caparishpa cashna nirca:
“Siquem shuti pueblopi causaj runacuna, ñuca rimashcata uyajpica, Taita Diospash cangunata uyangami.
8Shuj punllami quirucunaca, jatun mandajta charishun nishpa, olivo quirutaca: ‘Ñucanchita jatun mandaj tucupai’ ninajurca.
9Ashtahuangarin olivo quiruca, cashna nishpami tigrachirca: ‘¿Quirucunata jatun mandaj tucungapallachu, ali aceiteta cunata saquisha? Chai aceitehuanmi Taita Diostapash, runacunatapash alicachinajun’ nircami.
10Chai jipami quirucunaca, higo yurataca: ‘Can, ñucanchi jatun mandaj tucupai’ ninajurca.
11Higo yurapash: ‘¿Quirucunata jatun mandaj tucungapallachu, ali mishquilla higocunata fucunata saquishpa risha?’ nircami.
12Chai jipaca quirucunaca, uva yuratami: ‘Ñucanchita jatun mandaj tucupai’ ninajurca.
13Uva yurapash: ‘¿Quirucunata jatun mandaj tucungapallachu Taita Diostapash, runacunatapash cushichij llullu vino llujshina uva fucunata saquisha?’ nircami.
14Chaimandami tucuilla quirucunaca, casha yurata: ‘Can, ñucanchita jatun mandaj tucupailla’ ninajurca.
15Chai quirucunataca, chai casha yurapashmi cashna nirca: ‘Cangunata jatun mandaj cachun, na llullashpa ñucata agllanajushpaca, ñuca ucupi llanduj shamuichi. Na cashpaca, ñucamanda nina llujshishpami, Líbano urcupi tiyaj cedro yuracunataca tucuchinga’ nircami.
16Cunanga, Abimelec shuti runataca, ¿ali yuyarishpachu jatun mandaj cachun churarcanguichi? ¿Jerobaaltapash, paipaj huasi ayllutapash, pai imashna cangunata juyashcashnachu, juyashcanguichi?
17(Ñuca taitaca, Madián shuti llacta runacunapaj maquimanda cangunata cacharichingapaca, huañunatapash na manllashpami macanajurca.
18Cangunaca, ñuca taitapaj huasi ucupuracunata fiñashpami, ñuca taitapaj canchis chunga churicunataca, shuj rumi jahuapilla huañuchircanguichi. Chai jipaca, ñuca taitapaj caishuj huarmipaj churi Abimelec shuti runataca, cangunapaj huauqui cajpillami, Siquem shuti pueblopi causajcunata jatun mandaj cachun churashcanguichi).
19Cunanga, Jerobaal shuti runatapash, paipaj huasi ucupuracunatapash, ima na alitapash na rurashca cashpaca, Abimelec shuti runahuan cushijuichilla. Shinallatami paipash, cangunahuan cushijunga.
20Ashtahuangarin na chashna cajpica, Siquem shuti Milo shuti pueblocunapi causajcunaca, Abimelec shuti runataca ninahuan rupachijshna tucuchinajuchun. Shinallata, Siquem shuti, Milo shuti pueblocunapi causajcunataca, Abimelec shuti runamanda nina llujshijshna rupachishpa tucuchishpami ali canman” nijurcami.
21Jotam shuti runaca, paipaj huauqui Abimelec shuti runata manllashpami, Beer shuti puebloman pacajungapa rishpa, chaipi causajurca.
22Abimelec runaca, Israelcunataca quimsa huatatami mandashpa causajurca.
23Chai jipami Taita Diosca, Abimelec shuti runahuan, Siquem shuti pueblopi causajcunahuan fiñanajui callarichun, shuj ayata cachamurca. Chaimandami, Siquem shuti pueblopi causajcunaca, Abimelec runata na cazui callarinajurca.
24Jerobaal shuti runapaj canchis chunga churicunata, Abimelec runa huañuchishcamandami, chashna tucurca. Shinallata, paipaj huauquicunata huañuchijuchun, chai Siquem shuti pueblopi causanajuj runacuna paihuan rishcamandami, llaquicunaca shamuna carca.
25Siquem shuti pueblopi causajcunaca, loma jahua umacunapimi, pacalla chapashpa shuhuajcunata churarca. Paicunaca, ñanda yalijcunataca, imatalla charishcata shuhuashpami llaquichinajurca. Shina ruranajujtami, Abimelec runaman villanajurca.
26Shinallata, Ebed shuti runapaj churi Gaal shuti runami, paipaj huauquicunandi, Siquem shuti puebloman shamushpa chaipi saquirirca. Chaimandami chaipi causajcunaca, chai runatalla alicachinajurca.
27Paicunaca, uva chagracunaman rishpami, uvacunata pallashpa, vinota rurashpa, ninan cushijuita ruranajurca. Chaipica, paicunapaj dioscunapaj huasiman yaicushpa, micushpa, ufiashpami, Abimelec runataca, ima llaquipash japishpachari ali canman ninajurca.
28Ebed shuti runapaj churi Gaal shuti runaca, cashnami nijurca: “Ñucanchi paita cazungapaca, ¿Abimelec runaca pita cangayari? ¿Siquem shuti pueblopash, imatayari? Abimelec runaca, ¿nachu Jerobaal shuti runapaj churi? Paita yanapaj runapash, ¿nachu Zebul shuti runa? Abimelec runata cazungapa randica, Siquem shuti runapaj taita Hamor shuti runapaj miraicunatami cazushpa causana canchi.
29Cai pueblotaca, ñuca mandajushcaiman, Abimelectaca llujchishpa cachaimanllami. Abimelec runataca: ‘Tauca macanajuj runacunata tandachishpa, ñucahuan macanajungapa llujshimui’ nimanmi” nijurcami.
30Ebed shuti runapaj churi Gaal shuti runa chashna rimashcata uyashpami, chai pueblota mandaj Zebul shuti runaca, ninandapacha fiñarirca.
31Chaimandami pipash na yachajta, Abimelec runaman cashna nishpa villachun cacharca: “Ricui, Ebed shuti runapaj churi Gaal shuti runami, paipaj huauquicunandi, Siquem shuti puebloman shamushca. Paicunami cai pueblopi causajcunataca, canda na cazushpa canhuan macanajuchun yarichinajun.
32Chaimandami cambash, canhuan tandanajushca macanajunata ali yachaj runacunapash tuta jatarishpa, pambapi pacalla chapajcunata churana canguichi.
33Caya tutamanda indi ña llujshijujhuanmi, macanajungapa cai puebloman shamuna cangui. Gaal shuti runa canhuan macanajungapa, paipaj macanajuj runacunandi llujshimujpica, can munashcata llaquichishpami tucuchingui” nishpa villachunmi cacharca.
34Shina nijpimi Abimelec runaca, paihuan tandanajushca ali macanajuj runacunandi, tuta llujshimushpa, chuscupi shicanyarishpa, Siquem shuti pueblopi pacalla chapanajurca.
35Chaipimi, Ebed shuti runapaj churi Gaal shuti runaca, chai puebloman yaicuna punguman llujshishpa shayarirca. Chaita Abimelec runa ricushpami, pacalla chapajushcamandaca, tucui paipaj runacunandi llujshimurca.
36Chai gentecunata Gaal shuti runa ricushpami, Zebul shuti runataca:
“Ricui, urcu jahuamandaca tauca runacunami urai shamunajun” nirca.
Shina nijpimi, Zebul shuti runaca:
“Canga, urcucunapaj llandutami runacunatashna ricujungui” nirca.
37Shina nijpimi Gaal shuti runaca, cutin cashna nishpa rimarca:
“Ricui, cai pacha chaupi alpamandami ashtaca gentecuna urai shamunajun. Shinallata, yachajcuna tiyarina jatun quiru ñandapashmi, macanajunata ali yachaj runacuna tandanajushca uriajumunajun” nircami.
38Shina nijpimi Zebul shuti runaca cashna nirca:
“¿Imashpata cunanga, punda rimashcashnalla na rimajungui? Canga: ‘Abimelec runa mandajpi causangapaca, paica pitayari?’ nijurcanguimi. ¿Nachu cai gentecunata yangapi churashpa, chashna rimajurcangui? Cunanga llujshishpa, paicunahuan macanajungapa rilla” nircami.
39Shina nijpimi Gaal shuti runaca, Siquem shuti pueblopi causajcunata pushashpa, Abimelec runahuan macanajungapa rirca.
40Ashtahuangarin Abimelec runa catijpimi, Gaal shuti runaca pacajushpa calparca. Shina catishpa huañuchijpimi, puebloman yaicuna pungucaman, ashtacacuna huañushca sirinajurca.
41Abimelec runaca, Aruma shuti pueblopillami saquirirca. Shinallata Zebul shuti runaca, Gaal shuti runatapash, paipaj huauquicunatapashmi, Siquem shuti pueblomanda llujchishpa cacharca.
42Chai cayandi punlla, Siquem shuti pueblopi causajcuna, pambaman llujshinajujta ricushpami, Abimelec runaman villanajurca.
43Chaimandami macanajuj runacunataca, quimsapi shicanyachishpa, pacalla chapachun pambapi churarca. Siquem shuti pueblomanda gentecuna llujshinajujta ricushpami, Abimelec runaca macanajungapa llujshirca.
44Abimelec runaca, tandanajushca macanajuj runacunandi ninanda calpashpami, chai pueblo pungupi shayarigrirca. Shinallata, ishcaipi tandanajushca caishuj runacunaca, pambata rinajuncunata catishpami tucuillata huañuchinajurca.
45Abimelec runaca, chai pueblopi causajcunahuan tucui chai punlla macanajushpa, chai pueblota quichushpami, chaipi causajcunatapash huañuchirca. Shinallata, chai pueblotaca tucuchishpami, chaipica cachita shitajurca.
46Siquem shuti pueblo, jatun torrepi causanajuj tucui gentecuna chaita yachashpami, Berit shuti diospaj jatun huasipi pacajungapa yaicunajurca.
47Siquem shuti pueblo torremanda tucuilla runacuna, chai huasipi tandanajushcatami Abimelec runaman villanajurca.
48Chaimandami Abimelec runaca, paihuan tandanajushca tucui macanajuj runacunandi, Salmón shuti urcuman vichai rirca. Chaiman chayashpami Abimelec runaca, quirucunamanda shuj malquita hachahuan cuchushpa, rigrapi churarca. Shina rurashpami, paihuan rishca runacunataca: “Ñuca rurashcata canguna ricushcashna, cangunapash chashnallata ucha ruraichi” nirca.
49Shina nijpimi, tucuicuna quiru malquicunata cuchushpa, Abimelec runata catishpa rinajurca. Chai malquicunataca, jatun huasi muyundipi churashpami, chai jatun huasitaca rupachinajurca. Chashnami, Siquem shuti pueblo torrepi causajcunaca, jaricunapash, huarmicunapash shuj huaranga canashna huañurca.
50Chai jipami Abimelec runaca, Tebes shuti puebloman rishpa, chai pueblota chaupipi churashpa, macanajushpa quichurca.
51Chai pueblo chaupipica, ashtahuan shinllita jarcashca, shinlli torremi tiyarca. Chaimanmi tucui jaricunapash, huarmicunapash, chai pueblota tucui mandajcunapash yaicushpa, pungucunataca ali vichashpa, chai torre jahuapi pacajunajurca.
52Abimelec runaca, macanajushpa chai torre punguman chayashpami, ninata japichingapa rijurca.
53Ashtahuangarin, cutana jatun rumi faquirishcata, Abimelec runapaj umapi, shuj huarmi jahuamanda cacharijpimi, paipaj uma tullu faquirirca.
54Chaimandami Abimelec runaca, jarcarinata apashpa purij runataca, ucha cayashpa cashna nirca: “Ñucataca, ama shuj huarmimi huañuchishca ninajuchun, cambaj espadahuan uchashpa huañuchihuai” nirca. Shina nijpimi, jarcarinata apashpa purij runa, espadata huashaman yalijta satijpi, paica huañurca.
55Israelcunaca, Abimelec runa huañushcata ricushpami, tucuicuna paicunapaj huasicunaman tigranajurca.
56Chashnami Taita Diosca, canchis chunga paipaj huauquicunata Abimelec runa huañuchishpa, paipaj taitata na alita rurashcamandaca, paitapash llaquichirca.
57Siquem shuti pueblopi causajcuna imashna na alita rurashcashnami, Taita Diosca paicunatapash llaquichirca. Shinami Jerobaal shuti runapaj churi Jotam shuti runa, paicuna llaquita apachun nishpa, na alicachishpa villashca shimica pactarca.
Who We AreWhat We EelieveWhat We Do
2025 by iamachristian.org,Inc All rights reserved.
