1Amasías shuti runaca, ishcai chunga picha huatata charishpami, mandai callarirca. Paica, ishcai chunga iscun huatatami Jerusalenbi mandajurca. Paipaj mamaca, Jerusalenmanda Joadán shutimi carca.
2Amasías runaca, Mandaj Diospaj ñaupajpi alitalla rurajushpapash, na tucui shungu rurajurcachu.
3Amasías runaca, ña shinllitapacha mandajushpaca, paipaj taita jatun mandajta huañuchishca runacunatami huañuchirca.
4Ashtahuangarin paicunapaj churicunataca, Moisés quilcashcapi mandashcashna, na huañuchircachu. Chaitaca, Mandaj Diosmi: “Churicunapaj juchamandaca, taitacunaca na huañungachu. Taitacunapaj juchamandapash, churicunaca na huañungachu. Ashtahuangarin maijan cashpapash, paipaj juchamandami huañunga” nishpa mandashca carca.
5Amasías runaca, Judá ayllu gentecunata tandachishpami, Judapaj, Benjaminbaj ayllucunamanda, huarangapi, patsajpi tandanajushca runacunata mandachun churarca. Chai jipami, ishcai chunga huatata charijmanda vichaiman, jaricunapaj shuticunata quilcarca. Chaipica, tujsina jirrucunahuan, jarcarina jirrucunahuan macanajuiman llujshinallacunata agllashcacunaca, quimsa patsaj huaranga runacunami tiyarca.
6Shinallata sucta chunga pusaj quintal culquita cushpami, Israel llactamandapash patsaj huaranga ninan shinlli runacunata pushamurca.
7Ashtahuangarin Taita Diospajta ruraj runa paipajman shamushpami, cashna nijurca:
“Mandaj Diosca, Israelcunamandapash, tucuilla Efraín ayllumandapash anchurishcami. Shina cashcamandaca jatun mandajlla, chai Israel runacunahuanga ama ripaichu.
8Ashtahuangarin shinlli tucushpa macanajungapa can rijpica, Taita Diosca canda fiñajcunahuan mishai tucuchunmi saquinga. Taita Diosllami mishachingapapash, llaquichingapapash ushaita charin” nijurcami.
9Shina nijpimi Amasías runaca, Taita Diospajta ruraj runataca:
“Sucta chunga pusaj quintal culquita, Israel runacunaman cushcataca, ¿imatata rurasha?” nijpi, chai runaca:
“Mandaj Diosca, chaitapash yalitami carai ushan” nirca.
10Shina nijpimi Amasías runaca, Efraín ayllupuramanda paipajman shamushca runacunataca, paicunapaj huasicunaman tigrachun shicanyachirca. Shinamandami paicunaca, Judá llactapi causajcunahuan ninandapacha fiñarishpa, paicunapaj huasimambash ninandapacha fiñarishcacuna tigranajurca.
11Amasías runaca shinlli tucushpami, Cachi pugru Pambaman paipaj runacunahuan llujshishpa, Seir shuti llactapi causajcunataca chunga huaranga runacunata huañuchirca.
12Judá llacta runacunaca, Seir shuti llactamanda chunga huaranga caishuj runacunata causajta japishpami, rumi jaca vichaiman apanajurca. Chai jahuamanda ucuman shitajpimi ñuturishpa tucurirca.
13Ashtahuangarin macanajuiman paihuan ama richun, Amasías runa tigrachishca Israel runacunaca, Judá llacta pueblocunamanmi yaicugrishca carca. Paicunaca, Samaria pueblomanda, Bet-horón shuti pueblocamanmi, ninanda llaquichinajurca. Chaipi causajcunataca, quimsa huarangata huañuchishpami, ashtaca charishcacunata quichushpa apanajurca.
14Amasías runaca, chai Edom llactamanda runacunata huañuchishpa tigramushpaca, Seir shuti llactapi causajcunapaj dioscunata apashpami shamurca. Chaicunataca, paipaj dioscuna cachun churashpami, ninanda alicachishpa inciensotapash cushnichijurca.
15Chaimandami Mandaj Diosca, Amasiastaca ninandapacha fiñashpa, shuj profeta runata, Amasiaspajman cachajpi, paica cashna nirca:
“¿Imashpata canga, shuj llactapi causajcunapaj dioscunatara mascashcangui? Chai dioscunaca, chai llacta gentecunatapash, cambaj maquimandaca na quishpichi usharcachu” nirca.
16Chai profeta runa chashna nijujpimi, jatun mandajca cashna nirca:
“¿Candaca, jatun mandajman ali yuyaita cuj cachunllu churarca? ¿Imashpata canda huañuchinajuchun munashpa chashna nijungui?” nirca.
Shina nishpa rimaita tucuchijpimi, profeta runaca cashna nirca:
“Ali yuyaita ñuca cushcata na cazushpa, cashna na alita rurashcamandami, Taita Diosca candaca llaquichigrijun” nircami.
17Ashtahuangarin Judá llactata jatun mandaj Amasías runaca, yuyaita cujpi chasquishca jipami, Israel llactata jatun Mandaj Joás runapajman: “Shamui, ñavi ñavi ricushun” nichun cacharca. Joás runaca, Joacaz runapaj churimi carca. Joacaz runaca, Jehú shuti runapaj churimi carca.
18Shina cachajpimi, Israel llactata jatun mandaj Joás runaca, Judá llactata jatun mandaj Amasías runaman cashna nichun cacharca: “Líbano lomamanda cardo shuti cashami, Líbano lomapillata cedro shuti yurataca: ‘Cambaj ushita, ñuca churihuan cazarachun cuhuailla’ nichun cacharca. Ashtahuangarin, cardo shuti cashataca, Líbano urcumanda millai animalcuna sarushpami tucuchirca.
19Ari, Edom llactapi causajcunataca misharcanguimi. Chashna cashpami jariyarijungui. Cambaj munai, jatun tucushpa cushijushpa, cambaj huasipillata tiyajuilla. ¿Imapata cambash, Judá llactapash llaquita apangapa mascajunguiyari” nichunmi cacharca.
20Taita Diospaj munaica, paicunata fiñajcunapaj maquipi churana cajpimi, Amasías runaca, na uyangapa munarca. Paicunataca, Edom llactapi causajcunapaj dioscunata mañashcamandami, chashna rurarca.
21Chaimandami, Israel llactata jatun mandaj Joás runaca vichai shamurca. Shina shamushpami paipash, Judá llactata jatun mandaj Amasías runapash, Judá llactapi tiyajuj Bet-semes shuti pushtupi tuparishpa macanajui callarirca.
22Ashtahuangarin, Judá llactamanda runacunaca, Israelcuna mishajpimi, paicunapaj carpacunaman pacajushpa calpanajurca.
23Israel llactata jatun mandaj Joás runaca, Judá llactata jatun mandaj Amasiastaca, chai Bet-semes shuti pushtupimi prezu japirca. Amasías runaca, Joacaz runapaj churimi carca. Joás runaca, Ocozías runapaj churimi carca. Judá llactata jatun mandajca, Jerusalenman shamushpami, Jerusalén pircataca, Efraín shuti pungumandaca, pirca tigranapi tiyaj pungucaman, patsaj pusaj chunga metrota urmachirca.
24Chai jipami, Obed-edom runa ricushpa causajushca, Mandaj Diospaj huasipi tucui imalla tiyashcatapash, curitapash, culquitapash aparca. Shinallata, mandashpa tiyana huasimandapashmi, tucui imatalla charishcatapash, paipaj churicunatapash prezu japishpa, Samaria puebloman apashpa tigrarca.
25Judá llactata jatun mandaj Joás runapaj churi Amasías runaca, Israel llactata jatun mandaj Joacaz runapaj churi Joás runa huañushca jipaca, chunga picha huatatami causajurca.
26Amasías runa imatalla rurashcapash, ¿nachu Judá llactata, Israel llactaca jatun mandajcuna imatalla rurashcata quilcashcapi tiyajun?
27Mandaj Diosmanda Amasías runa anchurishca punllamandapachami, paita fiñashpa huañuchingapa, Jerusalenbi pacalla rimarinajurca. Chaimandami Amasías runa, Laquis puebloman pacajungapa rijpipash, chaiman catishpa huañuchinajurca.
28Paitaca, Davidpaj pueblo Jerusalenman caballopi apamushpami, paipaj ñaupa taitacunata pambashcapi pambarca.
Who We AreWhat We EelieveWhat We Do
2025 by iamachristian.org,Inc All rights reserved.
