LEVÍTICO 24 - Quichua Imbabura 2016

Lamparacunapi churana aceitemanda(Éx. 27:20-21)

1Mandaj Diosca, cashnami Moisesman nijurca:

2“Israelcunataca, olivota tacashpa llujchishca, ashtahuan ali aceiteta apamuchun mandangui. Chaitaca lamparacunapi churajpi, rupashpa punchayachishpa catijuchunmi, apamuchun mandana cangui.

3Chaicunataca Aaronmi, Ñucahuan tuparina jatun carpa ucupi, mandashca shimicunata alichishca arca tiyajuj, facha huashaman churanga. Mandaj Dios Ñuca ñaupajpi, chishimanda cayandi punllacaman rupajuchunmi chashna churanga. Caicunaca, cangunapaj miraicunapash, tucui causaipi pactachinajuchun Ñuca mandashca shimicunami.

4Lamparacunataca punllandimi, mapa illaj candelero jahuapi, Mandaj Dios Ñuca ñaupajpi japichishpa, catipi catipi churanga.

Diosman shicanyachishca tandamanda

5Ashtahuan ali jacuta japishpami, chunga ishcai tandata rurana cangui. Tandacunaca chuscu kilo chaupita pezajmi canga.

6Chai tandacunataca, ima mapapash illaj mezapimi, Mandaj Dios Ñucapaj ñaupajpi, ishcai filata rurashpa sucta sucta churana cangui.

7Shinallata, ishcandi filapica ashtahuan ali inciensotami churana cangui. Shina rurajpimi, tandacunaca, Mandaj Dios Ñuca ñaupajpi, ofrendata rupachijpishna mishquilla ashnajunga.

8Samana tucui punllacunapica, Mandaj Dios Ñuca ñaupajpimi, chashna churajunga. Israelcunapaj shutipimi, tucui causaipaj ari nishcata pactachishpa chashna ruranajunga.

9Chai tandacunaca, Aaronbajpash, paipaj churicunapajpashmi canga. Paicunami chai tandacunataca, Diospajlla ucupi micunajunga. Mandaj Diosman ofrendata carashpa rupachishcacunaca, Diospajlla shicanyachishca cashcamandami, tucui causaipi paicunapaj canga” nijurcami.

Taita Diosta na alicachij runata llaquichinamanda

10Chai punllacunapica, Israelpuramanda shuj huarmimi, Egipto llactamanda shuj runahuan, shuj churita charishca carca. Israel huarmipaj chai churimi, carpacunata shayachishca pushtupi, shuj Israel runahuan ninanda fiñanajurca.

11Chai Israel huarmipaj churitami, Taita Diospaj Shutita na ali shimicunahuan rimajujpi, Moisespajman pushamunajurca. Paipaj mamaca Dan shuti ayllupuramanda, Dibri shuti runapaj ushi Selomit shutimi carca.

12Chai runata imata ruranatapash, Mandaj Dios mandangacamanmi, ucupi vichashpa saquirca.

13Chai jipami Mandaj Diosca, Moisestaca cashna nirca:

14“Na ali shimicunata rimaj runataca, carpacunamanda canllamanmi llujchina canguichi. Chashna rimajta uyajcunaca, tucuillacunami chai runapaj umapi maquita churana canguichi. Chai jipami, tandanajushca tucuilla Israelcunaca rumicunahuan huañuchinga.

15Shinallata, Israelcunaman cashna ningui: Taita Diosta maijambash na alicachishpa rimaj runaca, llaquichi tucungapachami.

16Maijan cashpapash, Mandaj Diospaj shutita na ali shimicunahuan rimaj runaca, huañuchi tucungapachami. Paitaca, tandanajushca tucui Israelcunami, rumicunahuan huañuchinga. Shuj llactamanda runa cashpapash, llactapillata huacharishca cashpapash, Diospaj shutita na ali shimicunata rimaj runaca huañungapachami.

17Shinallata, maijan runapash, pitapash chugrichishpa huañuchishpaca, paipash huañuchi tucungapachami.

18Maijambash, shuj animalta huañuchishpaca, chaipura animaltallatami cunga.

19Pitapash chugrichishpaca, paipash chashnallatami chugrichi tucunga.

20Shina cashpaca: Macashpa imatapash faquijpica, paitapash chashnallatami faquinga. Ñavita llujchijpica, paitapash ñavitallatami surcunga. Quiruta llujchijpica, paitapash quirutallatami llujchinga. Macashpa imashna llaquichijpipash, paitapash shinallatami llaquichinga.

21Maijan animalta huañuchishpapash, chaimandaca tigrachinami canga. Ashtahuangarin, shuj genteta huañuchishpaca, paipashmi huañuchi tucunga.

22Shuj llactamanda shamushca runapajpash, cai llactapillata huacharishca runapajpash, cai mandashca shimicunallatami canga. Ñucami, cangunata Mandaj Taita Dios cani” nijurcami.

23Israelcunaman Moisés villajpimi, paicunaca, Diosta na ali shimicunata rimaj runataca, carpacunamanda llujchishpa, rumicunahuan huañuchinajurca. Mandaj Dios imashna Moisesta mandashcashnami ruranajurca.