APOCALIPSIS 7 - Quichua Imbabura 2016

144.000 sellashcacunamanda

1Chai jipami cashnatapash ricurcani: Cai pacha chuscundi suyupimi, angelcunataca shuj shujlla shayanajujta ricurcani. Paicunaca, alpamambash, mama cuchamambash, quirucunamambash, huaira ama chayachunmi, chuscundi suyupi jarcashpa shayanajurca.

2Shinallata, indi llujshimujmanda, shuj ángel vichai shamujujtapashmi ricurcani. Chai angelca, causajujlla Taita Diospaj sellotami charijurca. Paica alpatapash, mama cuchatapash huaglichingapa ushaita charij chuscu angelcunatami,

3cashna nijurca: “Alpatapash, mama cuchatapash, quirucunatapash na tacarinachu canguichi. Ñucanchi Taita Diospajta rurajcunata, frentecunapi sellangacamanmi nara huaglichina canguichi” nijurcami.

4Chai jipaca, sellashcacunata yupashcata villajtami uyarcani: “Tucuilla Israel ayllupuramandaca, patsaj chuscu chunga chuscu huarangatami ña sellashca” nijurcami.

5Judá ayllumandaca, chunga ishcai huarangata, Rubén ayllumandaca, chunga ishcai huarangata, Gad ayllumandaca, chunga ishcai huarangata,

6Aser ayllumandaca, chunga ishcai huarangata, Neftalí ayllumandaca, chunga ishcai huarangata, Manasés ayllumandaca, chunga ishcai huarangata,

7Simeón ayllumandaca, chunga ishcai huarangata, Leví ayllumandaca, chunga ishcai huarangata, Isacar ayllumandaca, chunga ishcai huarangata.

8Zabulón ayllumandapash, chunga ishcai huarangata, Josepaj ayllumandaca, chunga ishcai huarangata, Benjamín ayllumandaca, chunga ishcai huarangatami, sellashcata uyarcani.

Yuraj churajunata churajushca ashtaca gentecunamanda

9Chai jipami, pipash na yupai ushanalla, ashtaca gentecunata ñapash ricurcani. Paicunaca, cai pachapi tiyaj tucui llactacunamanda, ayllucunamanda, pueblocunamanda, shuj shuj rimaita rimajcunamandami shamushca carca. Paicunaca, mandangapa tiyarina ñaupajpi, Llamagupaj ñaupajpimi yurajta churajushca, palma quiru malquicunatapash chaririyaj shayanajurca.

10Paicunaca, cashna nishpami ninanda caparinajurca:

“Mandangapa tiyarinapi tiyajuj, ñucanchi Taita Diospash,

Llamagupashmi ñucanchitaca quishpichi ushan” ninajurcami.

11Mandangapa tiyarinatapash, rucucunatapash,

causaita charij chai chuscupuratapash, chaupipi churashpami,

tucuilla angelcuna muyundi shayanajurca.

Paicunaca, mandangapa tiyarina ñaupajpi, alpaman chayajta urai cumurishpami,

Taita Diostaca ninanda alicachishpa,

12cashna ninajurca: “Chashna cachun.

Ñucanchi Taita Diostaca,

‘causaita causaicaman, aligumi cangui,

ninan ushaita charijmi cangui,

tucuita yachajmi cangui’ nishpa, pashi nishunchi.

Shinallata, ninanda alicachi tucushcami cangui,

ninan ushaitami charingui, ninan shinllimi cangui.

Chashna cachun” ninajurcami.

13Shina ninajujpimi, chai rucucunamanda shujca, cashna nihuarca: “Yuraj churajunata churajushcacunaca, ¿picunata canga? ¿maimandata shamushcanga?” nihuarcami.

14Shina nijpimi cashna nircani: “Canmari yachapangui Taitalla” nircani. Shina nijpimi Paica cashna nihuarca:

“Paicunaca jatun llaquimanda llujshimushcacunami. Paicunapaj churajunatapash, Llamagupaj yahuarhuan tajshashpami yurajyachishca.

15Shina cashpami, mandangapa tiyarinapi tiyajuj Taita Diospaj ñaupajpi,

tutapash, punllapash, Paita yarina huasipi tucuita ruranajun.

Paicunataca, mandangapa tiyarinapi tiyajuj Taita Diosmi,

Paita yarina huasipi huacaichijunga.

16Paicunaca, na ashtahuan yarjachingachu, na ashtahuan yacunayachingachu.

Indipash, na ashtahuan rupachingachu. Ima rupaipash na rupachingachu.

17Mandangapa tiyarina ñaupajpi shayajuj Llamagumi, paicunataca michijunga.

Shinallata, Paillatami, causaita caraj yacu pujyucunapi ufiachumbash pushajunga.

Paicunapaj ñavi viquitapash, Taita Diosmi tucuilla fichanga” nihuarcami.