MARCOS 11 - Quichua Imbabura 2016

Jesusca, alicachi tucushpa Jerusalenman yaicushcamanda(Mat. 21:1-11; Luc. 19:28-40; Juan 12:12-19)

1Jerusalenman ña chayanajushpaca, Olivo loma chimbapurapi tiyaj, Betfagé, Betania pueblocunamanmi chayarca. Chaimandami, Jesusca ishcaipura Paipaj yachajujcunata cacharca.

2Paicunataca cashnami nirca:

“Chai chimba, uchilla puebloman ripaichi. Chaipimi, pipash nara tiyarishca shuj maltun burrugu huatashca shayajujta taringuichi. Chaitaca, cacharishpa apamupanguichilla.

3Maijambash: ‘¿Imapata cacharinajunguichi?’ nishpa tapujpica: ‘Apunchi Jesusmi apachun cachamun. Ñapash apamupashunllami’ ninguichi” nishpami cacharca.

4Paicuna rishpaca, shuj maltun burruguta canlla pungu, ñan tigrarishcapi huatashca shayajunda tarishpami cacharinajurca.

5Chaipimi huaquingunaca:

“¿Imapata chai maltun burrugutaca, cacharichinguichi?” ninajurcami.

6Paicunaca, Jesús imashna mandashcashnami villanajurca. Shina nijpica, saquircallami.

7Ña Jesuspajman chai maltun burruguta apamushpaca, paicunapaj jahualla churajunacunatami, lomopi churanajurca. Shina churajpimi Jesusca, maltun burrupi tiyarirca.

8Shinallata, ashtacacunami paicunapaj jahualla churajunacunata ñambi mandanajurca. Huaquingunaca, quiru malquicunata cuchushpami ñambi churanajurca.

9Ñaupashpa rinajuncunapash, huashata catijcunapash, cashna nishpami ninanda caparinajurca:

“¡Diosca ninanda alicachi tucushca cachun! ¡Jatun Diospaj shutipi shamujujca, aligumari cangui ni tucushca cachun!

10¡Ñucanchipaj taita David tiyarinapi tiyarishpa mandangapa shamujujca, aligumari cangui ni tucushca cachun! ¡Jahua pachapi tiyajuj Diosca, ninanda alicachi tucushca cachun!” ninajurcami.

11Jesusca, Jerusalenman chayashpami, Diospaj huasiman yaicurca. Chaipi tucuita muyundita ricushca jipami, ña tutayagrijujpica, Paipaj chunga ishcai yachajujcunandi Betania puebloman rirca.

Na fucuj higo yuratami na alicachishpa rimashca(Mat. 21:18-19)

12Cayandi punlla, Betania pueblomanda llujshishpa rinajushpami, Jesusca yarjachirca.

13Chashna cashpami, fangasapa shuj higo yurata carumandallata ricurca. “Imallapash tiyambashchari” yashpami ricugrirca. Ashtahuangarin chaiman chayashpaca, fangacunalla junda cajpimi, imatapash na tarirca. Chai punllacunaca, higo fucui punllacunaca nara chayarcachu.

14Chaimandami Jesusca, chai yurataca:

“Cunanmandaca, canbi fucushcataca pipash napacha micungachu” nirca.

Chashna nijujtami, Paipaj yachajujcunaca uyanajurca.

Diospaj huasita mapa illajta saquishcamanda(Mat. 21:12-17; Luc. 19:45-48; Juan 2:13-22)

15Jerusalenman shamunajushpaca, Jesusca Diospaj huasiman yaicushpami, jatushpa, randishpa tiyanajujcunatapash, llujchishpa calpachirca. Culquicunata randishpa, jatushpa tiyanajujcunapaj mezacunatapash, palomacunata jatungapa tiyarinacunatapash urmachishpami saquirca.

16Imatapash apashpa, Diospaj huasita yalichun na saquircachu.

17Paicunataca cashna nishpami yachachijurca:

“¿Nachu quilcashcapica: ‘Ñuca huasica, tucui llactacunapi, Ñucata mañana huasimi canga’ nijun? Ashtahuangarin cangunaca, shuhuacuna pacajuna utujutashnami rurashcanguichi” nircami.

18Jesús chashna nijujta, mandashca Shimita yachachijcunapash, mandaj sacerdotecunapash uyashpami, imashna huañuchinata yarinajurca. Paipaj yachachishcataca, tucuicuna cushijushpa chasquinajujpi manllashpami chashna yarinajurca.

19Ña tutayajujpimi Jesusca, chai pueblomanda llujshishpa rirca.

Na alicachishca higo yura chaquishcamanda(Mat. 21:19-22)

20Chai cayandi tutamandata yalinajushpami, higo yurataca sapimandapacha chaquishca shayajujta ricunajurca.

21Chashna cajpimi Pedroca, Jesús rimashcata yarishpa:

“Yachachij, Can na alicachishca yuraguca chaquishcamari” nirca.

22Shina nijpimi Jesusca, paicunataca cashna nirca:

“Taita Diostaca, tucui shunguhuanmi crina canguichi.

23Na llullashpami cangunataca cashna nini: Cai urcuta: ‘Caimanda anchurishpa, mama cuchaman huashajui’ nijpica, huashajungallami. Na ishcai shungu tucushpa, Pai imata nishcapash pactangami yashpa crijpica, Diosca pactachingami.

24Shinamandami cangunataca cashna nini: Diosta tucui shunguhuan crishpa, japishapachami yashpa mañajpica, chaica pactangallami.

25Shinallata, Diosta mañajushpa, maijandapash fiñashca cashpaca, uchami ali tucuna canguichi. Shina ali tucujpimi, jahua pachapi cangunapaj Taitaca, cangunapaj juchacunataca perdonanga.

26Ashtahuangarin canguna ali tucungapa na munajpica, jahua pachapi cangunapaj Taitapash, cangunapaj juchacunataca na perdonangachu” nijurcami.

Mandana ushaita Jesús charishcamanda(Mat. 21:23-27; Luc. 20:1-8)

27Chai jipami, Jerusalenman cutin tigramunajurca. Diospaj huasipi Jesús purijujpimi, sacerdotecunata mandajcunapash, mandashca Shimita yachachijcunapash, mandaj ancianocunapash, Jesuspajman shamurca.

28Paicunaca cashnami ninajurca:

“¿Pipaj ushaihuanda caicunataca, cashna rurajungui? ¿Pita chashna rurachun, candaca mandarca?” ninajurcami.

29Shina nijpimi Jesusca, paicunata cashna nirca:

“Ñucapashmi, shuj tapuita charini, chaita tigrachihuaichi. Chaita tigrachijpica, pipaj ushaihuan Ñuca chashna rurajushcatapash villashallami.

30Juan bautizachunga, ¿jahua pachamandachu cachamushcanga, na cashpaca runacunachu cachamushcanga? chaita tigrachihuaichi” nircami.

31Shina nijpimi, paicunapura cashna nirinajurca:

“¿Ima nishunchita? ‘Juanga, jahua pachamanda cachamujpimi shamurca’ nijpica: ‘¿Imashpata na crircanguichi?’ ningami.

32‘Runacuna cachamujpillami shamurca’ nitapash na ushanchica” ninajurca.

Juandaca, profetapachami nishpami, tucuilla gentecunaca rijsishca carca. Chaimandami gentecunata manllarca.

33Chashna cashpami:

“Na yachapanchica” ninajurca.

Paicuna chashna nijpimi Jesusca:

“Ñucapash, maijambaj ushaihuan Ñuca chashna rurajushcataca, cangunaman na villanichu” nirca.