DEUTERONOMIO 18 - Quichua Imbabura 2016

Levitacuna imatalla japinamanda

1Leví ayllumanda tucui sacerdote levitacunaca, Israel llactapica na alpata paicunapaj japingachu. Paicunaca, Mandaj Diosman rupachina ofrendacunata apamushcatami micushpa causanga.

2Paicunapaj huauqui Israelcunahuanga alpataca na japingachu. Mandaj Dios imashna nishcashna, Mandaj Diosmi paicunapaj japina canga.

3Gentecuna Diosman carashpa huañuchishca huagramanda, jari llamamandaca: Rigra aichata, quijada aichata, puzungunatami sacerdotecunaca japinata charin.

4Punda fucushca granota, vinota, aceiteta, punda rutushca llama milmatapashmi paicunamanga cuna canguichi.

5Levitacunataca, canda Mandaj Diosllatami, paicunapaj churicunandi, Mandaj Diospajta, tucui causaipi rurashpa causachun, tucui ayllupuramanda agllarca.

6Israelpuramanda shuj levita runa, pai causajushca pueblomanda llujshishpa, Mandaj Dios agllashca pushtuman rishpaca, tucui shunguhuanmi rina canga.

7Chaipica, canda Mandaj Taita Diospaj shutipi, paipaj huauqui levitacuna Diospajta ruranajujshnallata, paipash Mandaj Diospajta rurangallami.

8Micunatapash, caishujcuna japinshnallatami tucuita japinga. Shinallata, tucui imata paipaj taita carashcata charishcapash, pai causangapami canga.

Diosta na rijsij gentecunata ama catichun shinllita rimashcamanda

9Canda Mandaj Taita Dios carashca llactaman yaicushpaca, chai llactapi causajcuna ima na alicunata rurashpa causashcataca, na yachajunachu cangui.

10Cangunapurapica, churita cashpa, ushita cashpapash, rurashcalla diosman carashpa rupachijcunaca napacha tiyanachu. Shinallata, imapipash ricushpa yachaj cangapa, bruju cangapa, jipa punlla ima tucunata yachaj cangapa, yumbu cangapa munajcunapash napacha tiyanachu.

11Shinallata, yumbucunata, imapipash ricushpa yachai ushaj canata, ayacunata mañaj canata, huañushcacunata tapuj canata munajpash napacha tiyanachu.

12Chashna na alicunata rurajcunataca, Mandaj Diosca millanayachishpami ricun. Canda Mandaj Taita Diosca, chashna millanayaicunata rurashcamandami, chai llactapi causajcunataca llujchishpa cachan.

13Canda Mandaj Taita Diospaj ñaupajpica, ima pandatapash na ruranachu cangui.

14Can japigrijuj chai llactapi causajcunaca, brujucunata, yachajcunatami uyashpa causanajun. Ashtahuangarin, canda Mandaj Taita Diosca napacha chaicunata rurachun munanllu.

Taita Diosca, Moisestashnalla shuj profetata cusha nishcamanda

15Canda Mandaj Taita Diosca cangunapuramandami, Pai ima nishcata ñucashnalla villachun, shuj profetata churanga. Paitami uyana canguichi.

16Horeb shuti urcupi tandanajushca punllapi, canda Mandaj Taita Diosta can mañashcashnami pactachinga. Chaipica cashna nishpami mañarcanguichi: ‘Ñuca ama huañungapaca, ñucata Mandaj Taita Dios rimajtaca, cutinga na uyangapa munapanichu, chashna jatun ninatapash, na ashtahuan ricungapa munapanichu’ nijurcanguimi.

17Shinamandami Mandaj Diosca cashna nihuarca: ‘Cangunaca chashna nishpaca alitami mañashcanguichi.

18Shinamandami, cangunapaj huauquipuramandaca, canshnalla villachun shuj profetata churasha. Paimi tucui Ñuca imata villachun mandashcata, Ñuca ushaita cujpi villajunga.

19Ashtahuangarin, Ñuca shutipi pai villajujpi, Ñuca shimicunata na cazujcunataca, imamanda na cazushcatami tapuchisha.

20Ashtahuangarin napash Ñuca villachun mandajpita, Ñuca shutipi yangata villaj profetapash, na cashpaca na rijsishca rurashcalla dioscunapaj shutipi villaj profetapash, huañuchi tucungami’ nihuarcami.

21Canga, cambaj shungupica: ‘¿Imashnata, Mandaj Dios villashca shimi cajta, na villashca shimi cajtapash yachashunyari?’ ninguimi.

22Mandaj Diospaj shutipi villaj profeta villashca na pactajpi, na imapash tucujpimi, Mandaj Dios na villachijpita villashcataca yachangui. Chai profetaca, paipaj yuyaimandalla llujchishpami villajunga. Shina cashcamanda paitaca, na manllanachu canguichi.