1 CORINTIOS 15 - Quichua Imbabura 2016

Huañushcacuna cutin causarinamanda

1Juyashca crijcuna, quishpirimanda ñuca villajpimi, chaita chasquishpa aligutapacha cunangaman catinajunguichi. Chaitami cutin yarichijuni.

2Cangunaman ñuca villajushca shimicunata na saquishpa catishpaca quishpiringuichimi. Shinami, na yangamanda crishcata ricuchinguichi.

3Cangunaman yachachijushpaca, ñuca chasquishcatarami cashna yachachijurcani: Dios quilcachishca Shimipi nijushcashnami Cristoca, ñucanchipaj juchacunamanda huañurca.

4Shinallata, Dios quilcachishca Shimipi nijushcashnami, Cristoca pambai tucushpapash, quimsa punllahuanga causarirca.

5Chai jipaca, Cefasmambash, chunga ishcaimambashmi ricurirca.

6Chaipaj jipami, picha patsaj yali tandanajushca crijcunaman ricurirca. Paipuramandaca, taucacunami causanajunra, huaquingunaca ñami huañushca.

7Paicunaman ricurishca jipaca, Jacobomanmi ricurirca. Chai jipaca, tucui apostolcunamanmi ricurirca.

8Tucuicunaman ricurishca jipaca, nara huacharina punlla pactajpillata huacharishcashna ñucamanmi ricurihuarca.

9Apostolpurapica, ñucami ashtahuan jipa cani. Taita Diospajlla tandanajushca crijcunata catiriyashpa llaquichishcamandami, “apostolmi cani” ningapaca, pinganayai cani.

10Taita Dios ninanda juyashcamandallami cashna cani. Paipaj juyaica na yanga cashcamandami, caishujcunatapash ashtahuan yalishpa imatapash rurajuni. Chaitaca na ñucalla rurajunichu, Taita Diospaj juyai ñucahuan cajpimi chashna rurajuni.

11Caishujcunapash, ñucapash chaitallatami villanajunchi. Chai shimicunatami cangunaca crircanguichi.

12“Huañushcacunapaj chaupimandami, Cristoca causarirca” nishpami villanajunchi. Shina villajpipash, ¿imashpata cangunapuramanda huaquingunaca: “Huañushcacunaca na causaringachu” ninajunguichi?

13Huañushcacuna na causarina cajpica, Cristopash na causarinmanllu carca.

14Cristopash na causarishca cajpica, yanga yangami villashpa purinajunchiman carca. Cangunapash yangallatami cringuichiman carca.

15Shinallata, Taita Diosmanda llullashpa villajcunami ricurinchiman carca. Ñucanchica: “Taita Diosmi, Cristotaca causachirca” nishpami villanajunchi. Cristota na causachishca cajpica, huañushcacunapash napacha causarinmanllu.

16Huañushcacuna na causarina cajpica, Cristopash na causarinmanllu carca.

17Cristo na causarishca cajpica, cangunapash yangallata crishca cashpami, juchacunapillata causanajunguichiman carca.

18Shinallata, Cristota crij huañushcacunapash, chingaita chingagrishcami canman carca.

19Cai pachapi causaipajlla Cristota crishpa shuyanajushpaca, tucuicunatapash yali ashtahuan llaquinayaimi canchiman carca.

20Ashtahuangarin Cristoca, huañushcacunapaj chaupimandami causarirca. Paica punda causarishpami, Paita crij huañushcacunapash causarinata ricuchirca.

21Cai pachapica, shujlla runamandami huañuica callarirca. Shinallata, shujlla Runamandami, huañushcacuna causarinapash callarirca.

22Imashnami Adán runa juchata rurashcamandaca tucuicuna huañunajun, chashnallatami, Cristota crijcunaca tucuicuna causaringa.

23Causarina chayajpica, tucuicunami causaringa. Tucuicunapaj pundaca, Cristomi causarirca. Chai jipami, Cristo tigramujpica, Paipajlla tucushcacunapash causaringa.

24Cristoca, cai pachapi ninan ushaihuan mandajcunatapash, tucuchishpami, Pai mandajushcataca Taita Diosman cutin tigrachinga. Chai jipami tucurimui punllacunaca chayamunga.

25Ashtahuangarin, Cristoca, Paita na ricunayachijcunata, Paipaj chaqui sarunapi Taita Dios churangacamanmi, Paica mandajunatapacha charin.

26Tucuipaj jipaca, Cristoca huañuita mishashpami tucuchinga.

27Tucui ima tiyashcatapash, Cristota cazuchunmi, Paipaj chaqui sarunapi churashca. “Tucuita cazuchun churashca” nishpaca, tucuita cazuchij Taita Diospash, Cristopaj ñaupajpi cazuchi tucungami nishpaca na nijunllu.

28Ashtahuangarin, tucuita cazuchijuchun Cristopaj ñaupajpi churashca jipami, Cristopash tucuita cazuchijuj Taita Diostaca cazujunga. Taita Diosllami, tucui imatapash tucuipi cazuchijunga.

29Huañushcacuna na causarina cajpica, ¿imapata huañushcacunapaj shutipi bautizarinajun? Paicunapaj shutipi bautizarishpaca, ¿imatata paicunapaj randi ruragrin? Shina cajpica ¿imapata huañushcacunapaj shutipi bautizarin?

30Shinallata ¿imashpata tutapash, punllapash huañuchi tucunalla purinajunchi?

31Juyashca crijcuna, punllandi huañuchi tucunallami purijuni. Ashtahuangarin, ñucanchi Apunchi Jesucristota crijcuna cajpimi, ninandapacha cushijuni.

32Éfeso pueblopica, millai animalcunashna gentecunahuanmi shinllipacha shayarircani. Shina cajpica ¿imapashi ali cahuanga? Huañushcacuna na causarina cajpica: “Micushunchi, ufiashunchi, cayaca huañuipajpash canchi” ninchimanmi.

33Na pandarinachu canguichi. Na alita rurashpa causaj gentecunahuan tandanajushpaca, alita rurashpa causanatapash cunganmi.

34Rijchariajshna aliguta yariajlla causashpami, juchataca na rurana canguichi. Cangunapuramanda huaquingunaca, Taita Diosta nara ali rijsishcami canguichi. Canguna pingai tucuchunmi, chashna nijuni.

35Ashtahuangarin huaquingunaca, cashnami ninga: “¿Imashnata huañushcacunaca causaringa? ¿Imashna cuerpohuanda causarishpa ricuringa?” ningami.

36Juizu illaj runa, ima muyuta can tarpujpipash, na ñapashca viñanllachu. Ashtahuangarin ismushparami viñamun.

37Imata tarpushpapash, ña viñashcataca na tarpunguichu. Ashtahuangarin, trigota cajpipash, shuj yuracuna viñana cajpipash, muyutallami tarpungui.

38Ashtahuangarin tarpushca muyutaca, Taita Dios munashcashnami viñachin. Ima muyu cashpapash, viñachijpimi yuracunaca shayarin.

39Cuerpocunaca, na tucuilla chashnallatachu. Shina cashpami gentecunapash, animalcunapash, jahuata rij alasyu animalcunapash, pijicunapash, shuj shuj cuerpocunata charin.

40Jahua pachapi causanajujcunahuan, cai pachapi causanajujcunahuanga na chashnallatachu. Shina cashpami jahua pachapipash, cai pachapipash juyailla cashcata ricuchinajun.

41Indipash, lunapash, lucerocunapash na tucuilla chashnallata punchayachinajunllu, shuj shujtami punchayachinajun. Lucerocunaca, paicunapurapash na chashnallata punchayachinajunllu.

42Huañushcacuna causarinapash chashnallatami. Huañushcataca, ismuchun pambajpimi, na ismuna cuerpohuan causaringa.

43Na alicachishca cuerpohuan pambarishpami, juyailla cuerpohuan causaringa. Yangalla cuerpohuan pambarishpami, ninan ushaita charij cuerpohuan causaringa.

44Aichayuj cuerpohuan pambarishpami, Diospaj Espirituta charij cuerpohuan causaringa. Ismunalla aichayuj cuerpopashmi tiyan. Shinallata Diospaj Espirituta charij cuerpopashmi tiyan.

45Shina cajpimi quilcachishcapica: “Punda Adandaca, almayuj causachunmi rurarca. Jipa Adandaca, na huañushpa causana Espirituta charishpa, shujcunamambash carachunmi rurarca” nijun.

46Ashtahuangarin, aichayuj runami pundaca tiyashca, chai jipami espirituta charij runapash shamushca.

47Punda runaca, alpamanda rurashca cashpami, cai pachamanda carca. Jipa runaca, jahua pachamanda Apunchi Jesusmi carca.

48Cai pachapi causajcunaca, Adan runashna, alpa tucungapallami causanajun. Jahua pachaman rinacunaca, jahua pachaman ringapami causanajun.

49Imashnami alpata rurashca runaman rijchaj canchi, shinallatami, jahua pachamanda shamushca Runamambash rijchaj cashun.

50Juyashca crijcuna: “Cai aichahuan, yahuarhuanga, Taita Dios mandajuj llactaman pipash na ringachu. Shinallata, ismushpa tucurinapash, ismushpa na tucurinataca na japi ushangachu” ninimi.

51Ricuichi, pipash na yachai ushashcatami villajuni: Na tucuilla huañunachu canchi. Ashtahuangarin, tucuillami mushujman tigrachi tucuna canchi.

52Ñavita ñapash vichashpa pascai canallapimi, trompetata huacachij uyaringa. Trompetata huacachij uyarijhuanmi, huañushcacunaca, na ismuna cuerpohuan causachi tucunga. Shinallata, ñucanchipashmi mushujman tigrachi tucushun.

53Cai ismuna cuerpoca, na ismuna cuerpoman tigranapachami. Cai huañuna cuerpoca, causaita causana cuerpoman tigranapachami.

54Cai ismuna cuerpoca, na ismuna cuerpotami churajunga. Shinallata, cai huañuna cuerpoca, na huañuna cuerpota churajujpimi, quilcashcapi cashna nijushca pactanga:

“Tucuita mishajmi, huañuitaca tucuchishca.

55Huañui, ¿can tujsishpa huañuchinaca maipita?

Huañushcata pambana utuju, ¿can mishajuica maipita?” nijushcami pactanga.

56Juchami, huañuchingapa tujsijshna huañuchijun. Mandashca shimicunami, juchapi causachun ushaita cujun.

57Ashtahuangarin, Taita Diosta pashi ninami canchi. Paimi, tucui na alita mishachunga, ñucanchi Apunchi Jesucristomanda ushaita caramujun.

58Ñuca juyashca huauquicuna panicuna, shina cashcamanda: Apunchi Jesustaca alipacha crishpami, pai imata rurachun mingashcatapash, ashtahuan rurashpa catina canguichi. Apunchi Jesús mandashcata ruranaca, na yanga cajta yachashpami, chashna rurana canguichi.