HEBREOS 11 - Quichua Imbabura 2016

Crishpa causanamanda

1Crinaca, imata cashpapash japishapacha yashpa shuyanami. Shinallata, na ricushpapash, tiyambachami yashpa shuyanami.

2Crishcamandami, ñaupa taitacunaca alicachi tucushca.

3Crishpami, cai pachata Taita Dios rimashpa churashcatapash yachanchi. Tucui ima illajpipash, tucui imalla tiyachunmi churashca.

4Abel runaca crishpami, paipaj huauqui Caindaca yali ashtahuan ali caranata, Taita Diosman curca. Chaimandami, pai carashca ofrendatapash, paitapash, Taita Diosca ninanda alicachishpa chasquirca. Shinamandami paitaca, huañushca jipapash alicachishpa villanajun.

5Enoc runagutapash, crishcamandami Taita Diosca, causajtallata aparca. Shina cajpimi, paitaca mascanajushpapash na tarirca. Paitaca nara apajpillatami, “Taita Dios munashcashnami causajun” ninajurca.

6Na crishpaca, Taita Diosta cushichitaca napacha ushanachu canchi. Taita Diospajman chayangapaca, Pai tiyashcatapash, Paita tucui shunguhuan mascajcunaman imaguta caranatapash crinapachami canchi.

7Crishcamandami Noé runagupash, Dios imashna llaquichinata nara ricushpapash, Taita Dios ima nishcata cazushpa pactachirca. Huambuna huasitaca, paipaj huasi ayllucunandi quishpiringapami, Taita Dios mandashcashnallata manllaihuan pactachirca. Chashna crishcamandami, cai pachapi causajcunaca ninanda llaquichi tucunapacha cashcata ricuchirca. Crishcamandami, Pai carashcata japigrichun Taita Diosca chasquirca.

8Crishcamandami Abraham runagupash, Dios cayashcata cazushpa, paiman carashapacha nishca llactata japingapa rirca. Maipi canata na yachashpapash llujshishpa rircallami.

9Crishcamandami Abrahamga, Dios carashapacha nishca llactapica, caru llactamanda shamushca runashna shujcunapaj llactapi causajurca. Isaacpash, Jacobopash chai llactapimi, Abraham causashcashna, carpa huasicunapi causanajurca. Dios “carashapacha” nishca llactata japishun yashpami, chashnaca causanajurca.

10Shinallata, napacha tucurinallata llactapi, Diosllata alipacha ricushpa huasichishcata japigringapami chashnaca crishpa shuyajurca.

11Crishcamandami, Sara huarmigupash, huahuata na chari ushana cashpapash, vijsayu tucurca. Taita Diosca pactachijpacha cashcata crishpami, huahuata charina huatacunata yalishca payagu cashpapash, huahuagutaca charirca.

12Shinallata, ña huañunalla shuj rucugumandami, huahuacunaca, jahua pacha luzerocunashna, mama cucha manñapi t'iyucunashna, na yupai ushanallata mirarca.

13Crishcamandami, Taita Dios imata carasha nishcatapash nara japishpallata, carumandalla ricushpa tucuilla ñaupa taitacunaca huañurca. Paicunaca, alipacha crishpami, carumandalla ricushpa, “caru llactamanda shamushpa purijcunallami canchi” nishpa villanajurca.

14Shina villashpaca, shuj llactapi causangapa mascashpa purinajujtami ricuchinajurca.

15Paicuna llujshimushca llactaman cutin tigrangapa munashpaca, tigrai ushanallami carca.

16Ashtahuangarin paicunaca, ashtahuan juyailla jahua pacha llactatami munanajurca. Shuj pueblota alichishcalla charijushpami, Taita Diosca: “Paicunapaj Taita Diosmi cani” ningapaca na pinganayachin.

17Crishcamandami Abrahamga, alipacha crij cashcata ricungapa mañajpipash, paipaj churi Isaacta curca. Dios “carashami” nishcata chasquishca, paipaj shujlla churitami curca.

18Chaitaca cashnami nishca carca: “Isaacmandami huahuacunaca ninanda miranga” nishcami carca.

19“Huañuchijpipash, Taita Dios causachingapa ushaita charijta crishpami” Abrahamga chashna carajurca. Huañushcata causachijpishnami, paipaj churitaca cutin japijurca.

20Crishcamandami, Isaacca, shamui punllacunapica Jacobtapash, Esautapash,Taita Diosca ninanda bendiciachun nijurca.

21Crishcamandami, Jacobpash ña huañugrijushpaca, Josepaj tucuilla churicunata bendiciajurca. Paica, Josepaj taunapi marcarishpami, Taita Diostaca ninanda alicachijurca.

22Crishcamandami, Josepash ña huañugrijushpaca, Israelcuna Egiptomanda imashna llujshinatapash villajurca. Paipaj tullucunatapash apashpa richunmi mandashpa saquirca.

23Crishcamandami, Moisespaj taita mamapash huahuataca, quimsa quillacaman pacashpa charirca. Chai huahuaguca juyaillagu cajta ricushpami, jatun mandaj mandashcataca na manllashpa chashna charinajurca.

24Crishcamandami, Moisespash ña viñashpaca: “Faraonbaj ushipaj churimi cani” ningapaca na munarca.

25Paica, Taita Diospajlla causanajuj gentecunahuan ninanda llaquichi tucungapami munarca. Ashtahuangarin, juchata rurashpa ashacamanlla ninanda cushijushpa causangapaca na munarcachu.

26Moisesca, Egiptopi ninanda charijyangapaca na munashpami, Cristoshnalla ninanda llaquichi tucushpa, jahua pachapi charijyangapa munarca. Paica, Taita Dios carajpi japigrinata yariyajllami causajurca.

27Crishcamandami Moisesca, Egipto llactata jatun mandaj fiñanatapash na manllashpa, chai llactataca saquishpa rirca. Pipaj ñavipipash na ricurij Taita Diostaca, ñaupajpi ricujujshna yarijushpami aligutapacha catijurca.

28Crishcamandami Moisesca, pascua punllacunapi imatalla ruranacunata callarichirca. Paica, pungu muyundi caspicunapimi yahuarta javichun mandarca. Chaitaca, paicunapaj punda huacharishca jari huahuacunata huañuchij ángel ama tacarichunmi, chashna mandarca.

29Crishcamandami Israelcunaca, puca cuchataca, chaquishca pambatashna yalinajurca. Paicuna ña yalijpimi, Egiptomanda macanajuj runacunapash, paicunashnallata yalingapa catinajujpi, yacu quilpashpa huañuchirca.

30Crishcamandami, canchis punllata muyunajushpallata, Jericó pueblota muyushca pircataca urmachirca.

31Crishcamandami, culquimandalla huainayashpa causaj Rahab huarmipash, Taita Diosta na cazujcunahuanga na huañurca. Paimi, chai llactata ricuchun cachajpi rishca Israelcunataca aliguta mingachishpa pacarca.

32¿Imatata ashtahuanga villachun munanguichi? Gedeón, Barac, Sansón, Jefté, David, Samuel runacunamanda villangapapash, shuj profetacunamanda villangapapash punllacunaca napacha pactangachu.

33Crishcamandami paicunaca, llactacunata jatun mandajcunahuan macanajushpapash misharca. Alitalla rurashpami, Taita Dios carashapacha nishcataca japinajurca. Shinallata, leongunapaj shimicunatapash huatanajurcami.

34Paicunaca, ninanda rupajuj ninatapash huañuchircallami. Filo espadahuan huañuchi tucunamandapash quishpirircallami. Ushaita na charishpapash, macanajuicunapica ninandami shinlli tucurca. Shuj llactamanda macanajuj runacunatapash, mishashpami calpachirca.

35Huarmicunapash, paicunapaj ayllucuna huañushcata causachijpimi chasquinajushca. Ashtahuangarin shujcunaca, ninan llaquitami apanajurca. Chai llaquimanda llujchingapa munajpipash, Dios causachijpi causaringapa munashpami llaquicunataca apanajurcalla.

36Shujcunaca, ninanda na alicachishpa rimai tucushpami asti tucunajurca. Chai jahuapash, huatai tucushpami, prezuna huasicunapi churai tucunajurca.

37Paicunaca crishcamandami, rumicunahuan huañuchi tucunajurca. Shinallata, sierracunahuambash cuchui tucushpami, espadacunahuambash huañuchi tucunajurca. Llama caracunata, chivo caracunata churajushpami, caiman chaiman purinajurca. Imagupash illaj cashpami, ninanda llaquichi tucushpa, ninan manllaihuan causanajurca.

38Cai pachaca, chai ali gentecuna causangapaca na alichu carca. Paicunaca, jichushca pambacunapi, urcucunapi, huaicucunapi, utujucunapimi pacajushpa causanajurca.

39Paicunaca, alipacha crijcuna cashpa, Dios alicachijpi causanajushpapash, chai juyailla llactaguta, “carashapacha” nishcataca na ricushpallatami huañunajurca.

40Paicunaca, ama ñucanchita ashtahuan yali ali cachunmi, Taita Diosca, ñucanchimanga ashtahuan juyaillaguta caramusha nishca.