1Siria llactamanda macanajuj runacunata mandaj Naamán runaca, jatun mandajpaj ñaupajpica, ninanda alicachi tucushcami carca. Mandaj Diosca, Siria llactataca, Naamán runamandallami mishachishca carca. Paica ali shinllipacha cashpa, tucuipi ali cashcamandami ninanda alicachi tucujurca. Shina cashpapash paica, lepra ungüitami charirca.
2Siria llactamanda, macanajungapa shamushpami, Israel llactamandaca shuj cuitsata prezu apashca carca. Chai cuitsaca, Naamán runapaj huarmipajta rurajmi carca.
3Chai cuitsami, paita mandaj huarmitaca cashna nirca:
“Samaria pueblopi causaj profetata, cai lepra ungüimanda alichihuai ningapa ñucata mandaj rijpica, alichinmanmi” nircami.
4Shina nijpi jatun mandajpajman rishpami, Naamán runaca: “Israel llactamanda shuj cuitsami, shuj ali shimicunata villashca” nirca.
5Shina villajpimi, Siria llactata jatun mandajca, cashna nirca:
“Shina cashpaca rilla, ñucami Israel llactata jatun mandajman shuj quilcashca fangata cachasha” nirca.
Shina nijpimi Naamán runaca, sucta quintal chaupi yalita pezaj culquita, sucta huaranga curita, chunga mushuj churajunata apashpa rirca.
6Shinallata quilcashcatapash, Israel llactata jatun mandajman apashpami rirca. Chai quilcashcapica, cashnami nijurca: “Cai quilcashca fanga cambajman chayamujpica, ñucapajta ruraj Naamán runata, lepra ungüimanda alichipangui nishpa, ñuca cachajushcata yachachunmi cachamuni” nijurcami.
7Israel llactata jatun mandaj, chai quilcashcapi ima nijujta ricushpaca, paipaj churajushcatapash liquirishpami, cashna nirca:
“¿Causaita cungapa, causaita quichungapaca, Taita Dioschu cashcani? Cai runata lepra ungüimanda alichipai nishpami cachamushca. Caitaca, cangunallata ali ricuichi. Caita ningapa cachamushpaca, fiñanajuitami mascajun” nircami.
8Chaitaca, Diospajta ruraj Eliseo yachashpami, jatun mandajman cashna nichun cacharca: “¿Imashpata ninanda fiñarishpa cambaj churajushcata liquijungui? Chai runa ñucapajman shamushpami, Israel llactapica profeta tiyajta yachanga” nichunmi cacharca.
9Shina nijpimi Naamán runaca, paipaj caballocunandi, carretandi rishpa, Eliseopaj huasi pungupi shayarigrirca.
10Chaipi shayajujpimi Eliseoca, shuj runata cashna nichun cacharca: “Jordán yacupi canchiscaman armagri. Chashna rurashpami, cambaj aichapica lepra ungüi illaj saquiringui nigri” nircami.
11Shina nijpimi Naamán runaca, fiñarishpa cashna nirca:
“Paipacha llujshimushpa, ñuca ñaupajpi shayarishpa, Mandaj Taita Diospaj shutipi mañanga yarcanimi. Shinallata, maipilla lepra ungüi tiyajuj pushtucunapi, paipaj maquihuan tacarishpami alichihuanga yarcanimi.
12¿Nachu, Damasco pueblopi tiyaj Abana shuti, Farfar shuti jatun yacucunallata, cai Israel llactapi tiyaj yacucunataca yali ashtahuan ali canga? Chai yacucunapillata armashpaca, ¿nachu ali tucuimanlla carcani?” nishpami, fiñarishpa rijurca.
13Ashtahuangarin paipajta ruraj runacunami, cashna ninajurca:
“Ñucanchita mandaj taitalla, profeta runa ashtahuan imapash shinllita mandajpica, ¿nachu chaita ruranguiman carca? Ashtahuangarin ungüimanda ali tucungapa armagri nishcataca, ¿imashpata na ruranguiyari?” ninajurcami.
14Shina nijpimi Naamán runaca, Taita Diospajta ruraj runa ima nishcata cazushpa, Jordán yacupi canchiscaman armarca. Chashna rurajpimi, paipaj aichaca chairalla huahuapaj aichashna, ima ungüipash illaj saquirirca.
15Chai jipami Naamán runaca, paihuan rishca runacunandi tigrashpa cashna nirca:
“¡Cai pachapica, cai Israel llactapishna jatun Diosca na tiyanllu. Chaitaca cunanmi yachaj chayani! Chashna cashcamanda, cambajta ruraj ñuca, imaguta carashcatapash chasquihuai nipanimi” nircami.
16Ashtahuangarin Eliseoca, cashnami nirca:
“Mandaj Diosca ricujumbachami, ñucaca Paita cazushpami causani. Shina cashcamanda, can imata cujujpipash napacha japishachu” nircami.
Naamán runa, chasquihuaillayari nijujpipash, paica na chasquircachu.
17Chaimandami Naamán runaca, cashna nirca:
“Shina cashpaca, cai llactamanda alpata ishcai mulapi ñuca apachun, ¿nacha saquihuanguiman? nipanimi. Cambajta ruraj ñucaca, cunanmandaca shuj dioscunamanga na animalta cushpa tucuillata rupachishachu. Shinallata, na animalta cushpa huañuchishachu. Ashtahuangarin Mandaj Diosmanllami cusha.
18Mandaj Diosca, cambajta ruraj ñucataca: Rimón shuti paipaj diospaj huasiman, ñucata jatun mandaj alicachingapa yaicushpa, ñuca rigrapi marcarishpa cungurijpi, ñucapash cungurina cajpica, Mandaj Diosca, cambajta ruraj ñucataca perdonahuachun nipanimi” nircami.
19Shina nijpimi, Eliseoca:
“Ama manllashpa, rilla” nishpa cacharca.
Chashna cachajpimi Naamán runaca, carullaguta ña rijurca.
20Shina rijujpimi, Eliseopajta ruraj Giezi shuti runaca, pailla cashna yarijurca: “Ñucata mandajca, Siria llactamanda Naamán runataca, pai imatalla carangapa apamushcacunata, paipaj maquimanda na chasquishpami llaquichirca. Mandaj Diosca ricujumbachami. Naamán runata catishpa calpashpaca, imagutallapash japigrishami” yajurcami.
21Shina yajushpami Giezi shuti runaca, Naamán runata catishpa rirca. Shina catishpa calpamujujta Naamán runa ricushpami, carretamanda uriajushpa tuparirca. Ña chayajpimi, Naamán runaca:
“¿Alillachu cangui?” nishpa tapurca.
22Chashna tapujpimi Giezi shuti runaca, cashna nirca:
“Alillami cani. Ñucata mandajmi cashna nichun cachamuhuan: ‘Profetacunamanda ishcaipura huambracunami, Efraín urcumanda cunan ñucapajman shamurca. Paicunaman carangapa, quimsa chunga chuscu kilota pezaj culquita, ishcai mushuj churajunata cachamupai’ nichunmi cachamuhuarca” nircami.
23Shina nijpimi Naamán runaca, cashna nirca:
“Shuj quintal yalita pezaj culquita apapai nipanimi” nijushpallatami, shuj quintal yalita pezaj culquitaca, ishcai muchilapi huatarca.
Shinallata ishcai mushuj churajunatapashmi cacharca. Tucui chaicunataca, paipajta ruraj ishcai runacuna apashpa, Giezi runata ñaupashpa richunmi curca.
24Shinami pipash na ricunalla pushtuman chayashpa, chai runacunapaj maquimanda japishpa huasipi alichirca. Chai jipami, chai runacunataca tigrachun saquirca.
25Paicuna ña rijpi, paita mandaj Eliseopajman Giezi shuti runa yaicujpimi, Eliseoca:
“Giezi, ¿maimandata shamungui?” nishpa tapurca.
Shina tapujpimi paica:
“Cambajta ruraj ñucaca, maimambash na riparcanichu” nirca.
26Shina nijpimi Eliseoca, cashna nirca:
“Carretamanda uriajushpa, chai runa canhuan tuparij shamujujpica, ¿nachu ñuca espiritupash chaipi carca? ¿Culquita, churajunacunata, olivo chagracunata, uva chagracunata, llamacunata, huagracunata, gañan runacunata, huarmicunata, japina punllacunami yanguichu?
27Can chashna rurashcamandaca, Naamán runapaj lepra ungüica, cambajman chimbashpami candapash, cambaj miraicunatapash llaquichijungalla” nircami.
Shina nijpimi, lepra ungüi japijpi, chai runaca, rasushna yurajpamba, Eliseopaj ñaupajmanda llujshishpa rirca.
Who We AreWhat We EelieveWhat We Do
2025 by iamachristian.org,Inc All rights reserved.
