EZEQUIEL 16 - Quichua Imbabura 2016

Jerusalenbi causajcuna, Taita Diosta na cazushcamanda

1Mandaj Diosca, cashnami nihuarca:

2“Huañuna aichayuj runa, Jerusalenbi causajcuna na alicunatalla rurashcataca villanami cangui.

3Paicunataca, cashna ningui: Mandaj Jatun Diosca, Jerusalén pueblotaca cashnami nijun: ‘Canga, Canaán llactapimi causai callarircangui. Cambaj taitaca, amorreo gentemanda, cambaj mamaca, heteo gentemanda miraimi carca.

4Can causai callarijui punllapica, jichushca huahua huacharishcashnami carcangui. Chashna cajpimi, puputapash pipash na fitirca, pipash na armachirca, cachihuambash na javirca, maituitapash na maiturcachu.

5Canda llaquishpa ima alita rurangapaca, pipash na tiyarcachu. Ashtahuangarin, huacharijhuanmi, huañuchun yashpa candaca pambapi shitarca.

6Ñucami, yahuarlla, mapa sirijujta candaca ricurcani. Shinata ricushpami: ¡Causanami cangui! nircani. Ari, candaca yahuarlla cajta ricushpami: ¡Causanami cangui! nircani.

7Ñucami, candaca, pambapi jihuatashna mirachircani. Ña viñashpaca, juyailla cuitsagushnami tucurcangui. Cambaj chuchucunapash, cambaj ajchapashmi viñarca. Shina cashpapash, churajuna illaj, lluchullami carcangui.

8Jipa punllacuna cutin ricushpaca, ña cazaranalla cajtami candaca ricurcani. Shina cajpimi, Ñuca jahualla churajunahuan, can lluchulla cajta quilpachishpa, canhuanga juyarishpa causangapa ari nirircanchi. Chaimandami, Ñucapajlla tucurcangui. Mandaj Jatun Dios Ñucami, chashna nini.

9Candaca, yahuarlla cajpipash, yacuhuan armachishpami, mishquilla ashnajun yacuta churarcani.

10Juyaillaguta sirashca churajunata churachishpami, chaquipipash tejón animalpaj caramanda rurashcata churachircani. Shinallata, linohuan, sedahuan rurashca churajunatapashmi churachircani.

11Candaca, juyaillaguta churachishpami, maqui huatanatapash, hualcatapash huatachircani.

12Singapica, punchapamba juyaillacunata churachishpami, rinripica, zarcillocunata churachircani. Shinallata, umapica juyailla coronatami churachircani.

13Shinami canga, curihuan, culquihuan, juyaillaguta alichishca tucurcangui. Shinallata, ali linota, sedata rurashca, juyailla sirashca churajunatami churajurcangui. Shinallata, cambaj micunaca, ashtahuan ali trigo jacuhuan, balun mishquita, aceitehuan rurashcami carca. Shinami canga, tucuimanda yali juyaillagupacha tucushpa, jatun mandaj tucurcangui.

14Can juyaillagu cashcamandami, candaca shuj llactacunapipash alicachinajurca. Ñucami candaca juyaillagupacha cachun rurarcani. Mandaj Jatun Dios Ñucami, chashna nini.

15Ashtahuangarin canga, juyaillagu cani yashpami, maipipash rijsi tucushpa, na alicunata rurai callarircangui. Chashnami shujcunahuan na alita rurashpa causai callarircangui.

16Chai tucui charishcacunata apashpami, lomacunapi rurashcalla dioscunaman altarcunata rurarcangui. Chashnataca napacha ricushcanichu, jipamambash chaitaca pipash na rurangachu.

17Ñuca carashca curita, culquita, ima juyaillacunatapash japishpami, runaman rijchaj dioscunata rurashpa, paicunata alicachijurcangui.

18Cambaj juyailla churajunacunata apashpami, chai rurashcalla dioscunaman churachircangui. Ñuca carashca aceitetapash, inciensotapashmi, paicunaman carangapa aparcangui.

19Can micuchun Ñuca carashca tandatapash, ashtahuan ali jacutapash, aceitetapash, balun mishquitapashmi, paicunaman aparcangui. Shina apashpami, paicunapaj ñaupajpi mishquilla ashnachun rupachijurcangui. Shinapachami na alicunata rurarcangui. Mandaj Jatun Dios Ñucami, chashna nini.

20Chashna rurashca jahuami, Ñucapajlla cachun agllashca, churicunatapash, ushicunatapash, chai rurashcalla dioscunaman cushpa rupachingapa aparcangui. ¿Can chashna na alita rurashcacuna, imallapash na canllu yashpachu causajungui?

21¿Shina yashpachu, Ñuca huahuacunatapash cungata cuchushpa, rurashcalla dioscunaman carashpa rupachircangui?

22Chashna na alicunatalla rurashpa causajushpami, can chairalla viñajushpa, churajuna illaj, lluchulla, yahuar quilpashca cashcatapash cungarcangui.

23Cai tucui na alicunata rurashca jipaca, (¡aij, aij, canga imachari tucungui! Mandaj Jatun Dios Ñucami, cashna nini).

24Canga, lomacunapipash, plazacunapipashmi, altarcunata rurarcangui.

25Ñan tigranacunapipash altarcunata rurashpami, can juyailla cashcataca mapayachircangui. Canga, tucui rurashcalla dioscunata alicachishpami ashtahuan catijurcangui.

26Shinallata, cambaj quimiriapi causaj Egipto llactamanda jatun runacunahuan japirishpami, ashtahuan na alicunata rurajurcangui. Chashna rurashpami, Ñucataca ashtahuan fiñachihuarcangui.

27Shinamandami candapash, tucui charishcacunatapash asha asha quichushpa llaquichircani. Canda na ricunayachij filisteo gentecuna, paicuna munashcata ruranajuchunmi saquircani. Paicunapashmi, can na alita rurashpa causajushcata, na alicachinajun.

28Shinallata, Asiria llacta gentecunahuan tandanajushpami, paicunapaj rurashcalla dioscunata alicachishpa causarcangui. Paicunahuan chashna na alita rurajushpapash, ashtahuan shujcunahuambash na alita rurangapa munashpami causajurcangui.

29Shinallata, Canaán llactapi causajcunahuambash, caldeo gentecunahuambash, tandanajushpami na alicunata rurashpa catircangui. Shina rurashpapash, na shaijushpami ashtahuan na alicunata rurashpa catircangui.

30Culquimanda huainayashpa causaj, na pingaj huarmishnami cai tucui na alicunata rurajurcangui. Mandaj Jatun Diosmi, chashna nini.

31¡Canga, ñan tigranacunapipash, plazacunapipash, altarcunata rurashpa, rurashcalla dioscunata alicachishpami causajurcangui! Canga culquimanda huainayaj huarmitapash yali na ali cashpami, pihuambash yangata japirircangui.

32Canga, cazarashca jahua shujhuan causaj huarmishnami, cusapaj randica, shujcunatara ninanda juyajurcangui.

33Culquimanda na alita ruraj huarmicunaca, culquitaca paicunami japin. Ashtahuangarin canga, cambaj juyashcacunamanmi, canra culquita cujungui. Cambajman shamuchunmi, imapash juyaillacunata carajungui.

34Canga, chashna na alicunata rurajushpami, shuj huarmicunatapash yali na ali tucushcangui. Candaca, pipash na ricungapa shamujpimi, canra culquita cushpa shuyajurcangui. Chashna rurashpami, ashtahuan na alipacha cashcata ricuchijungui.

35Na alitalla rurashpa causaj huarmi. Mandaj Dios Ñuca ima nishcata uyai.

36Mandaj Jatun Dios Ñuca cashna rimashcata ali uyai: Canga, na pinganayachishpami, shuj llactacunamanda rurashcalla dioscunata alicachishpa, napacha alicunata rurajurcangui. Cambaj huahuacunatapash, chai dioscunaman carashpami huañuchircangui.

37Shina cajpimi, can juyashcacunatapash, canhuan na alita rurashcacunatapash, can na ricungapa munashcacunatapash tandachigrini. Chashna tandachishpami candaca, paicunapaj ñaupajpi ninanda pingaichigrini.

38Ñucami candaca, cazarashca jahua shujcunahuan causaj huarmicunatashna, shujcunata huañuchij huarmicunatashna, mandashcapi nijujshnallata llaquichigrini. Shina rurashpami candaca, ninandapacha fiñarishpa llaquichigrini.

39Candaca, paicuna tandanajushpami, lomacunapi rurashcalla dioscunata mañana huasicunatapash, altarcunatapash urmachinga. Cambaj churajunacunatapash, juyailla huatarinacunatapash quichushpami, candaca, lluchullata saquinga.

40Canda llaquichijcunaca, ashtacacunami vichai shamunga. Paicunami candaca, rumicunahuan, espadahuambash huañuchinga.

41Cambaj huasicunatapash rupachishpami tucuchinga. Ashtaca huarmicuna ricujtami, candaca llaquichinajunga. Shina rurajpimi canga, culquimanda na alita ruraj huarmishna causanataca saquingui. Shinallata, cambaj juyashcacunaman imatalla caranatapashmi saquingui.

42Shina rurashpami, Ñuca ninanda fiñarishcata yalichishpa, Ñucapajlla cachun munashpa ninanda fiñarishcatapash cungashami.

43Canga, chairalla cuitsashna cashpa, imashna causashcata cungashpami, cai tucui na alicunata rurashpa, Ñucataca fiñachircangui. Chashna na alita rurashcamandami, candaca ninanda llaquichisha. Canga, na alita rurana munaihuanlla purijushcataca, cunangamanbash na cungashcanguichu’ ninmi” nihuarcami Mandaj Jatun Diosca.

44“Candaca, yarichina shimicunata rimajcunami, cashna ninajunga: ‘Mama chashna cajpica, ushipash chashnallatami canga’ ninajungami.

45Canga, cusatapash, huahuacunatapash jichushpa causajuj huarmipaj ushimi cangui. Cusatapash, huahuacunatapash jichushpa causajuj huarmicunapaj ñañami cangui. Cambaj mamaca, heteo gentepurami carca. Cambaj taitaca, amorreo gentepurami carca.

46Cambaj paya ñañaca, Samaria pueblomi carca. Paica, paipaj ushicunandimi, janajman causanajun. Cambaj jipa ñañaca, Sodoma pueblomi carca. Paica, paipaj ushicunandimi, uraman causanajun.

47Shina cajpipash, paicuna na alicunata rurashcataca, ashtahuan yali na alitami rurashcangui. Chashnami ashtahuan huaglishpa catircangui.

48Mandaj Jatun Dios Ñucaca causajunipachami. Ñucami cashna nini: Cambaj ñaña Sodoma pueblotapash, paipaj ushicunatapash, ashtahuan yali na alitami, cambash, cambaj ushicunapash rurashcanguichi.

49Cambaj ñaña Sodoma puebloca, jariyashpami jatun tucurca. Micunatapash ashtacatami charirca. Paica, paipaj ushicunandimi, ninan quillacuna carca. Shina cashpami, llaquichi tucushpa causajcunatapash, na shinllichishpa imagupash illajcunatapash na yanaparcachu.

50Paicunaca jariyashpa jatun tucushpami, Ñuca ñaupajpica na alitalla ruranajurca. Chaita ricushpami, paicunataca tucuchircani.

51Samaria puebloca, can rurashca juchacunamandaca, chaupitallapash na rurarcachu. Canga, paicunatapash ashtahuan yali na alita rurajpimi, cambaj ñañacuna ima na alita rurashcapash, alishnalla ricurishca.

52Canga, cambaj ñañacunatapash yali juchata rurashcamandami, pingai tucuna cangui. Cambaj juchahuan chimbapurajpica, cambaj ñañacunapaj juchaca, ashallami ricurin. Cambash llaquita apashpami ninanda pingai tucuna cangui. Cambaj ñañacunaca, na canshnalla juchata rurashcachu.

53Prezu apai tucushcacunataca, Ñucami tigrachimusha. Sodoma pueblotaca, paipaj ushicunandi, Samaria pueblotapash paipaj ushicunandimi tigrachimusha. Prezu apai tucushcacunataca, tucuicunatami tandachimusha.

54Chai tucui na alicunata rurashcamandami canga ninanda pingai tucuna cangui. Shina cajpimi, chaita ricushpaca paicunata cushijunajunga.

55Sodoma shuti, Samaria shuti cambaj ñañacunaca, paipaj ushicunandimi, punda imashna cashcashnallata tigranga. Cambash, cambaj ushicunandimi, punda imashna cashcashnallata tigrangui.

56Can jariyashpa causajui punllacunapica, Sodoma pueblotaca na alicachishpami rimaj carcangui.

57Can na alita rurashcacunata nara ricuchijpimi, chashna jariyarcangui. Cunanga, cambash ñami Siria llactapi, Filistea llactapi causajcunapaj llaquitallata apajungui. Paicunaca, maipipash candaca, yangapimi churanajun.

58Canga, jatun na alicunata rurashpa causashcamandaca, llaquita apanapachami cangui” ninmi Mandaj Diosca.

59Ashtahuangarin Mandaj Jatun Diosca, cashnatapashmi nin: “¿Ñucapash, canshnallata na alita rurashpachu, llaquichina cani? ¿Ari ninajushpa juramentushcata yangapi churashpachu, llaquichina cani?

60Ashtahuangarin, chairalla viñai cashpa, Ñucahuan pactachingapa ari ninajushcataca yarijushallami. Canhuanga, causaita causaicaman pactachingapami ari nircani.

61Canga, na alita rurashpa causajushcata yarishpami ninanda pingai tucungui. Punda ñañacunata, jipa ñañacunata, cambaj ushicunashna cachun, Ñuca canman cujpimi, chashna pingai tucungui. Ashtahuangarin paicunaca, Ñucahuan ari ninajushcataca na chasquingachu.

62Ashtahuangarin Ñuca, canhuan ari nijushcata pactachingapami, paicunataca canman cusha. Shina rurajpimi Ñucataca, Mandaj Dios cajta yachangui.

63Ñuca, chai tucui na alicunata rurashcata canda perdonajpimi, chaita yarishpa pingai tucungui. Chaimandami canga upalla causangui” ninmi Mandaj Jatun Diosca.